Iˉsaˍtaˆ lehˬ Yuˇdaꞈ chaw hpehꞈ leh Paˇshaˇ mvuhˇ miˬ Suˇsanˍ venˇ lo chehˇ ve yoˬ. Yawˇ ve yehˬ kʼa hkʼaw ve chaw hkʼa peu˗eˬ htaꞈ Neˍbuˍhkaˍneˍzaˍ Yeˍruˆsaˍlehnˍ venˇ lo shiˍ laˬ ve laiˉ hkʼawꞈ gaˬ peuˬ. Iˉsaˍtaˆ lehˬ Mawˍdaˍkehˇ ve awˬ shaˍ ma hpehꞈ leh Mawˍdaˍkehˇ yawˇ htaꞈ hu uiˍ la taˍ ve yoˬ. Mawˍdaˍkehˇ lehˬ Paˇshaˇ ve jawˇ mawˇ Aˍshaˍruˆ htaꞈ kanˉ te piˇ ve yoˬ.

Jawˇmawˇ Aˍshaˍruˆ lehˬ jawˇ mawˇ ma awˬ suhˉ heuˆ gaˇ ve yoˬ. Jawˇmawˇ ve awˬ ceˬ paˍ mvuhˇ miˬ hkʼaw daꞈ jaˇ ve yaˇ miˇ haˉ teˇ hpaˍ jawˇ mawˇ htaꞈ shiˍ maˍ piˇ htaˇ, Iˉsaˍtaˆ kaꞈ teˇ gʼaˇ hpehꞈ ve yoˬ. Jawˇmawˇ lehˬ yaˇ miˇ haˉ teˇ gʼaˇ le le htaꞈ mawˬ htaˇ, yawˇ Iˉsaˍtaˆ htaꞈ leuˆ yuˬ leh jawˇ mawˇ ma te tcuh ve yoˬ. Mawˍdaˍkehˇ Iˉsaˍtaˆ htaꞈ kʼoˆ piˇ ve, nawˬ Yuˇdaꞈ chaw hpehꞈ ve shu htaꞈ taˇ to piˇ.

Haˍmanˍ lehˬ caˆ muiˬ puiˉ jaˇ ve chaw teˇ gʼaˇ hpehꞈ ve yoˬ. Yawˇ shu aꞈ kehˉ uiˍ jaˇ ve a maꞈ lonˉ hpehꞈ leh chaw teˇ gʼaˇ le le yawˇ htaꞈ oˉ kʼoˍ pui tcuh gaˇ ve yoˬ. Yaꞈ hkʼaˇ, Mawˍdaˍkehˇ Haˍmanˍ htaꞈ oˉ kʼoˍ maˇ pui. Hkʼe te leh, Haˍmanˍ beuꞈ jaˇ leh yawˇ htaꞈ tiˇ pehˍ gaˇ ve yoˬ. Mawˍdaˍkehˇ Yuˇdaꞈ chaw hpehꞈ ve tehꞈ Haˍmanˍ shiˍ htaˇ, Yuˇdaꞈ chaw hkʼa peu˗eˬ htaꞈ tiˇ pehˍ tuˬ awˬ hkʼaˇ ca ve yoˬ. Haˍmanˍ jawˇ mawˇ htaꞈ kʼoˆ piˇ ve, ‘Yuˇdaꞈ chaw kawˆ tuˬ cawˬ leh yawˇ hui hkʼa peu˗eˬ htaꞈ tiˇ pehˍ piˇ˗oˆ.’ Jawˇmawˇ Aˍshaˍruˆ kʼoˆ piˇ ve, ‘nawˬ te gaˇ ve hkʼe te˗o.’ Haˍmanˍ awˬ liˇ tawˇ hkawˇ teh tuˬ a hkaw˗anˬ gʼa leh Ha pa 12 maˬ 13 nyi htaˇ, Paˇshaˇ chaw, Yuˇdaꞈ chaw hkʼa peu˗eˬ htaꞈ tiˇ pehˍ tuˬ tawˇ piˇ ve yoˬ. Yaꞈ hkʼaˇ, Yaˬhoˉvaˬ nyi chehˇ ve yoˬ.

Iˉsaˍtaˆ awˬ liˇ tawˇ hkawˇ chi ve htaꞈ maˇ shiˍ. Mawˍdaꞈkehˇ liꞈ oˇ ve htaꞈ kʼawꞈ gʼaꞈ bvuhꞈ leh Iˉsaˍtaˆ htaꞈ piˇ leh kʼoˆ ve, ‘liꞈ chi ve jawˇ mawˇ htaꞈ ca yuˬ piˇ˗oˆ.’ Iˉsaˍtaˆ hkʼawꞈ piˇ ve, ‘jawˇ mawˇ maˇ kuˬ leh kʼai ve kʼo, tiˇ pehˍ ve htaꞈ gʼa hkanˍ tuˬ yoˬ. Jawˇmawˇ ngaˬ htaꞈ maˇ kuˬ laˇ ve 30 nyi gaˬ˗oˬ. Yaꞈ hkʼaˇ, ngaˬ kʼai tuˬ yoˬ. Jawˇmawˇ juˇ fuiˍ mawˍ laˇ ve kʼo, ngaˬ ponˬ tuˬ yoˬ. Yaꞈ hkʼaˇ, maˇ mawˍ laˇ ve kʼo, ngaˬ gʼa suh tuˬ yoˬ.’

Iˉsaˍtaˆ jawˇ mawˇ geh kʼai ve yoˬ. Jawˇmawˇ Iˉsaˍtaˆ htaꞈ mawˬ htaˇ, juˇ fuiˍ mawˍ piˇ  ve yoˬ. Iˉsaˍtaˆ jawˇ mawˇ geh loꞈ˗e htaˇ jawˇ mawˇ yawˇ htaꞈ na piˇ ve, ‘Iˉsaˍtaˆ˗oˬ, nawˬ aˬ htoꞈ ma heuˆ gaˇ ve le?’ Iˉsaˍtaˆ kʼoˆ piˇ ve, ‘jawˇ mawˇ˗oˬ, nawˬ leh Haˍmanˍ htaꞈ awˍ te caˍ laˇ gaˇ ve yoˬ.’ Awˍ caˇ chehˇ htaˇ kaꞈ teˇ pawˆ kʼawꞈ laˬ˗oꞈ tehꞈ Iˉsaˍtaˆ yawˇ hui htaꞈ kʼoˆ piˇ ve yoˬ. Awˍ 2 pawˆ teˇ pawˆ caˇ htaˇ jawˇ mawˇ kʼawꞈ na piˇ ve, ‘nawˬ aˬ htoꞈ ma heuˆ gaˇ ve le?’ Yawˇ kʼawꞈ kʼoˆ piˇ ve, ‘ngaˬ leh ngaˬ ve chaw htaꞈ shu tiˇ pehˍ gaˇ ve yoˬ. Ngaˬ hui htaꞈ a ciˉ ga laˇ˗oˆ.’ Jawˇmawˇ na piˇ ve, ‘nawˬ htaꞈ tiˇ pehˍ gaˇ ve a shu le?’ kʼoˆ laˇ˗oˆ. Yawˇ kʼoˆ piˇ ve, ‘haiˬ jaˇ ve chaw chi teˇ gʼaˇ lehˬ Haˍmanˍ yoˬ.’ Jawˇmawˇ nyi ma zuhˆ jaˇ leh Haˍmanˍ htaꞈ laꞈ haˉ tiˇ pehˍ tuˬ tawˇ piˇ ve yoˬ.

Haˍmanˍ ve awˬ liˇ tawˇ hkawˇ teh taˍ ve htaꞈ jawˇ mawˇ htawˇ te luˬ maˇ gʼa. Jawˇmawˇ lehˬ, awˬ liˇ tawˇ hkawˇ awˬ suhˉ kʼawꞈ bvuhꞈ tawˆ tuˬ Mawˍdaˍkehˇ htaꞈ a hkaw˗anˬ piˇ ve yoˬ. Yuˇdaꞈ chaw htaꞈ shu bawˆ la htaˇ, a shu yawˇ awˬ to fanˬ taˍ tuˬ Mawˍdaˍkehˇ awˬ liˇ tawˇ hkawˇ piˇ ve yoˬ. Ha pa 12 maˬ 13 nyi gaˬ htaˇ, Yuˇdaꞈ chaw lehˬ canˇ paˍ htaꞈ bawˆ gʼaˇ ve yoˬ. Oˇ htaˇ tanˬ leh Yuˇdaꞈ chaw teˇ hkʼawꞈ le le maꞈ bawˆ gʼaˇ ve pawehˇ te ve yoˬ.