Teˇ haˉ htaˇ jawˇ mawˇ Neˍbuˍhkaˍneˍzaˍ anˇ lawꞈ lawꞈ ve zuhꞈ maˆ mawˬ ve pa taw, yawˇ dawˇ haˍ leh zuhꞈ muiˉ maˇ kʼa. Yawˇ mawˉ paˍ htaꞈ kuˬ leh na piˇ ve, ‘ngaˬ aˬ htoꞈ ma zuhꞈ maˆ mawˬ ve kʼoˆ laˇ sheˍ.’ Mawˉ paˍ yaw hkʼawꞈ piˇ ve, ‘jawˇ mawˇ˗oˬ nawˬ zuhꞈ maˆ mawˬ ve ngaˬ hui htaꞈ a ciˉ kʼoˆ maˍ laˇ˗oˆ.’ Yaꞈ hkʼaˇ, Neˍbuˍhkaˍneˍzaˍ kʼoˆ ve, ‘ngaˬ aˬ htoꞈ ma zuhꞈ maˆ mawˬ ve nawˬ hui kʼoˆ laˇ cawˇ ve, maˇ heˆ kʼo nawˬ hui gʼa suh tuˬ yoˬ.’ Yawˇ hui kʼawꞈ kʼoˆ piˇ ve, ‘ngaˬ hui tcuhˉ kuiˬ kʼoˆ maˍ laˇ gʼa tuˬ nawˬ ve zuhꞈ maˆ ngaˬ hui htaꞈ a ciˉ kʼoˆ maˍ laˇ˗oˆ.’ Jawˇmawˇ kʼoˆ ve, ‘nawˬ hui teˇ moˍ tiˉ te leh ngaˬ htaꞈ heˍ chehˇ ve, ngaˬ aˬ htoꞈ ma zuhꞈ maˆ mawˬ ve kʼoˆ laˇ sheˍ!’ Yawˇ hui kʼawꞈ yaw hkʼawꞈ piˇ ve, ‘nawˬ na laˇ ve awˬ lawn haˍ jaˇ. Miˬ guiˬ hkʼoˆ nawˬ kʼoˆ ve hkʼe te gʼa ve chaw teˇ gʼaˇ kaꞈ maˇ cawˬ.’

Neˍbuˍhkaˍneˍzaˍ nyi ma zuhˆ jaˇ leh Baˍbuˍlonˍ mvuhˇ miˬ hkʼaw cuˇ yiˍ cawˬ paˍ teˇ gʼaˇ le le leh, Daˍyeˍlaˆ, Haˍnaˍniˆ, Miˆsheˍlaˆ leh Aˍzaˍriˆ hui htaꞈ htawˇ tiˇ pehˍ tuˬ kʼoˆ piˇ ve yoˬ. Yaꞈ hkʼaˇ, Daˍyeˍlaˆ lehˬ jawˇ mawˇ htaꞈ zuhꞈ maˆ tcuhˉ kuiˬ kʼoˆ maˍ piˇ gʼa tuˬ awˬ yanˇ peꞈ laˇ tuˬ yawˇ geh lawˬ ve yoˬ. Oˇ ve hkʼawꞈ nawˉ, Daˍyeˍlaˆ leh awˬ chawˇ Yaˬhoˉvaˬ geh bon lawˬ ve yoˬ. Yaˬhoˉvaˬ yawˇ hui htaꞈ hkʼaˬ hkʼe ga piˇ tuˬ le?

Yaˬhoˉvaˬ lehˬ Neˍbuˍhkaˍneˍzaˍ ve zuhꞈ maˆ Daˍyeˍlaˆ ve awˬ han hkʼaw lo zuhꞈ maˆ oˇ ve tcuhˉ kuiˬ hpeuꞈ maˍ piˇ ve yoˬ. Shawˉ pawˍ gaˬ leh, Daˍyeˍlaˆ jawˇ mawˇ ve awˬ ceˬ paˍ geh kʼai leh kʼoˆ piˇ ve, ‘Baˍbuˍlonˍ mvuhˇ miˬ hkʼaw cuˇ yiˍ cawˬ paˍ hui htaꞈ taˇ tiˇ pehˍ piˇ sheˍ. Jawˇmawˇ ve zuhꞈ maˆ tcuhˉ kuiˬ htaꞈ ngaˬ yuˬ tawˆ piˇ tuˬ ngaˬ htaꞈ jawˇ mawˇ geh shiˍ kʼai laˇ˗oˆ,’ tehꞈ yawˇ htaꞈ kʼoˆ piˇ ve yoˬ. Hkʼe te leh, yawˇ Daˍyeˍlaˆ htaꞈ jawˇ mawˇ Neˍbuˍhkaˍneˍzaˍ geh shiˍ kʼai piˇ ve yoˬ. Daˍyeˍlaˆ jawˇ mawˇ htaꞈ kʼoˆ piˇ ve, ‘awˬ gʼuˇ suhˍ hpawˇ hkʼaˬ hkʼe hpehꞈ la tuˬ, Gʼuiˬ sha nawˬ htaꞈ kʼoˆ maˍ laˇ ve yoˬ. Nawˬ chaw han lonˉ teˇ maˬ htaꞈ mawˬ ve yoˬ. Yawˇ ve oˉ kʼoˍ lehˬ shi hpehꞈ leh, yawˇ ve nyi ma pui leh laꞈ sheh teˇ hpaˍ lehˬ hpu hpehꞈ ve yoˬ. Yawˇ ve cawꞈ cehˍ nyi leh pfuhˬ tehˉ kʼu lehˬ, kuiˇ hpehꞈ leh, yawˇ ve hkui sheh lehˬ, sho teˇ tawn leh jeꞈ teˇ tawn hpehꞈ ve yoˬ Oˇ ve hkʼawꞈ nawˉ, haˉ hpawˇ hkʼoˆ lo haˉ pui shiˍ teˇmaˬ pu yaꞈ la leh, chaw awˬ han lonˉ oˇ ve hkui sheh htaꞈ pu teˍ ve yoˬ. Chaw han lonˉ oˇ ve paiˍ leh jeꞈ meu˗e  hkʼa shuˍ hpehꞈ leh mvuhˇ haw meuˆ baˬ leh mehˉ kʼai ve yoˬ. Hkʼe te leh, haˉ pui shiˍ oˇ ve shaˬ te shaˬ uiˍ la leh miˬ guiˬ hkʼoˆ biˇ sheˬ ve yoˬ.’

Hkʼe te leh, Daˍyeˍlaˆ kʼoˆ ve, ‘chi teˇ hpaˍ lehˬ zuhꞈ maˆ ve tcuh kuiˬ hpehꞈ ve yoˬ. Oˉ kʼoˍ teˇ taw shi hpehꞈ ve lehˬ, nawˬ ve mvuhˇ miˬ hpehꞈ ve yoˬ. Hpu teˇ taw lehˬ, nawˬ hkʼawꞈ nawˉ ve mvuhˇ miˬ hpehꞈ ve yoˬ. Kuiˇ teˇ taw lehˬ, nawˬ peuˬ hkʼawꞈ nawˉ, uˉ peunˍ la tuˬ ve mvuhˇ miˬ htaꞈ kʼoˆ gaˇ ve yoˬ. Peuˬ leh sho hkʼe heh ve mvuhˇ miˬ cawˬ la leh awˬ leh meuˇ ve mvuhˇ miˬ lehˬ maˇ cawˇ maˇ hawˍ daꞈ ve mvuhˇ miˬ hpehꞈ la tuˬ yoˬ. Mvuhˇ miˬ oˇ ve teˇ hpaˍ sho hkʼe heh ve teˇ tawn, leh jeꞈ nehˆ hkʼa shuˍ awˬ gʼaˇ nuˇ ve teˇ tawn cawˬ tuˬ yoˬ. Haˉ pui shiˍ oˇ ve haˉ hpawˇ lonˉ hkʼe hpehꞈ la ve lehˬ Gʼuiˬ sha ve mvuhˇ miˬ hpehꞈ leh awˬ nu ve mvuhˇ miˬ hkʼa peu˗eˬ htaꞈ te luˬ te sheˆ piˇ leh co co taiˍ taiˍ uˉ peunˍ tuˬ yoˬ.’

Jawˇmawˇ Neˍbuˍhkaˍneˍzaˍ miˬ chaˇ hkʼoˆ boꞈ sheˬ leh Daˍyeˍlaˆ htaꞈ oˉ kʼoˍ pui ve yoˬ. Yawˇ kʼoˆ ve, ‘nawˬ ve Gʼuiˬ sha zuhꞈ maˆ chi ve nawˬ htaꞈ kʼoˆ laˇ ve yoˬ. Nawˬ ve Gʼuiˬ sha htaꞈ shuˍ ve awˬ nu ve gʼuiˬ sha teˇ gʼaˇ kaꞈ maˇ cawˬ.’ Neˍbuˍhkaˍneˍzaˍ Daˍyeˍlaˆ htaꞈ maˇ tiˇ pehˍ, yawˇ htaꞈ cuˇ yiˍ cawˬ paˍ hui ve awˬ hoˉ te tcuh leh Baˍbuˍlonˍ mvuhˇ miˬ htaꞈ uˉ peunˍ tcuh ve yoˬ. Daˍyeˍlaˆ ve bon lawˬ hkawˇ htaꞈ Yaˬhoˉvaˬ hkʼaˬ hkʼe yaw hkʼawꞈ piˇ ve nawˬ mawˬ˗aw laˇ?