Teˇ haˉ htaˇ Neˍbuˍhkaˍneˍzaˍ kawˆ lawꞈ lawꞈ ve zuhꞈ maˆ teˇ maˬ mawˬ ve yoˬ. Yawˇ lehˬ Baˍbuˍlonˍ mvuhˇ miˬ hkʼaw cuˇ yiˍ cawˬ paˍ htaꞈ kuˬ laˬ leh tcuhˉ kuiˬ na piˇ ve yoˬ. Yaꞈ hkʼaˇ, teˇ gʼaˇ kaꞈ hkʼawꞈ piˇ maˇ gʼa. Awˬ leh meuˇ htaˇ, jawˇ mawˇ Daˍyeˍlaˆ htaꞈ na piˇ ve yoˬ.

Neˍbuˍhkaˍneˍzaˍ Daˍyeˍlaˆ htaꞈ kʼoˆ piˇ ve, ‘ngaˬ suhˆ cehˬ teˇ cehˬ htaꞈ zuhꞈ maˆ mawˬ ve yoˬ. Suhˆ cehˬ oˇ ve mvuh jaˇ leh mvuhˇ naw ma htaꞈ dawꞈ ve pa taw, miˬ guiˬ chaw yaˇ hkʼa peu˗eˬ mawˬ ve yoˬ. Awˬ hpaꞈ nyi sha jaˇ leh awˬ shiˍ kaꞈ nawꞈ maˇ jaˇ. To nuˇ to shaˆ suhˆ cehˬ lonˉ awˬ hawˉ lo chehˇ taˍ leh Ngaˆ ehˉ htawˇ suhˆ cehˬ hkʼoˆ awˬ hpui te chehˇ ve yoˬ. Mvuhˇ naw ma tcuh yaˇ teˇ gʼaˇ mvuhˇ naw ma hkʼoˆ yaꞈ la leh kʼoˆ ve, “suhˆ cehˬ chi ve htaꞈ htu baˬ leh awˬ kʼaˉ htaꞈ tawˆ baˬ piˇ˗oˆ. Suhˆ muiˉ daw htaꞈ sho caˆ leh kuiˇ caˆ yuˬ hpeh taˍ˗oꞈ. 7 hkʼawꞈ hkʼa gaˬ, yawˇ chaw yaˇ ve nyi ma cawˬ tuˬ ve maˇ heˆ. To nuˇ to shaˆ ve nyi ma cawˬ tuˬ yoˬ. Gʼuiˬ sha lehˬ, mvuhˇ miˬ hkʼa peu˗eˬ htaꞈ uˉ peunˍ tuˬ kanˇ paˆ cawˬ ve htaꞈ miˬ guiˬ chaw yaˇ gʼa shiˍ tuˬ yoˬ. Yawˇ lehˬ mvuhˇ miˬ chi teˇ hpaˍ yawˇ piˇ gaˇ ve chaw htaꞈ piˇ gʼa ve yoˬ.”’

Zuhꞈ maˆ oˇ ve tcuhˉ kuiˬ htaꞈ Daˍyeˍlaˆ shiˍ tuˬ Yaˬhoˉvaˬ yawˇ htaꞈ ga piˇ ve yoˬ. Zuhꞈ maˆ ve tcuhˉ kuiˬ htaꞈ Daˍyeˍlaˆ gʼa shiˍ htaˇ kawˆ ve yoˬ. Yawˇ jawˇ mawˇ htaꞈ kʼoˆ piˇ ve, ‘jawˇ mawˇ˗oˬ, zuhꞈ maˆ oˇ ve nawˬ ve canˇ paˍ htaꞈ hpehꞈ tcuh gaˇ ve yoˬ. Yaꞈ hkʼaˇ, zuhꞈ maˆ chi ve nawˬ htaꞈ caˉ daꞈ ve yoˬ. Suhˆ cehˬ lonˉ oˇ ve lehˬ nawˬ awˬ to yoˬ. Nawˬ ve mvuhˇ miˬ shonˇ kʼai leh nawˬ to nuˇ to shaˆ hkʼa shuˍ zuhˇ gʼa caˇ tuˬ yoˬ. Yaꞈ hkʼaˇ, mvuhˇ naw ma tcuh yaˇ suhˆ muiˉ daw leuˉ taˍ piˇ sheˍ tehꞈ kʼoˆ ve tcuhˉ kuiˬ lehˬ, nawˬ jawˇ mawˇ gʼa kʼawꞈ te tuˬ yoˬ.

Teˇ hkʼawꞈ peuˬ leh, Neˍbuˍhkaˍneˍzaˍ yawˇ ve hawˉ yehˬ hkʼoˆ te toˇ chehˇ htaˇ, yawˇ Baˍbuˍlonˍ venˇ htaꞈ nyi leh kʼoˆ ve, ‘ngaˬ te taˍ ve venˇ htaꞈ nyi sheˍ. Aˬ htoꞈ ma te chi hkʼe taw daꞈ ve le? Ngaˬ ve awˬ meꞈ awˬ hponˇ hkʼaˬ ma uiˍ jaˇ ve htaꞈ hpeuꞈ maw piˇ chehˇ ve yoˬ!’ Oˇ teˇ hkui mvuhˇ naw ma hkʼoˆ awˬ hkawˇ bvuhˬ la leh kʼoˆ ve, ‘Neˍbuˍhkaˍneˍzaˍ˗oˬ! nawˬ mvuhˇ miˬ chi htaꞈ maˇ gʼa uˉ peunˍ˗oˬ.’

Oˇ ve hkʼawꞈ nawˉ, Neˍbuˍhkaˍneˍzaˍ lehˬ maˇ nawˇ maˇ hteh kʼai ve yoˬ. Yawˇ to nuˇ to shaˆ hkʼe hpehꞈ leh hawˉ yehˬ hkʼaw tawˆ kʼai leh to nuˇ to shaˆ geh ca chehˇ ve yoˬ. Neˍbuˍhkaˍneˍzaˍ ve oˉ kʼoˍ mvuh aˉ ceˬ mvuh hkʼa shuˍ hpehꞈ la ve yoˬ. Yawˇ ve hkui shiˍ kʼuˉ laꞈ shiˍ kʼuˉ htawˇ, ngaˆ hkui shiˍ kʼuˉ hkʼa shuˍ hpehꞈ la ve yoˬ.

 7 hkʼawꞈ biˇ la htaˇ, Neˍbuˍhkaˍneˍzaˍ chaw hkawˇ nawˇ la leh Yaˬhoˉvaˬ yawˇ htaꞈ Baˍbuˍlonˍ mvuhˇ miˬ ve jawˇ mawˇ kʼawꞈ te tcuh ve yoˬ. Neˍbuˍhkaˍneˍzaˍ kʼoˆ ve, ‘mvuhˇ naw ma hkʼoˆ Jawˇmawˇ Yaˬhoˉvaˬ htaꞈ ngaˬ chiˇ mvuh ve yoˬ. Yaˬhoˉvaˬ lehˬ miˬ guiˬ chaw yaˇ htaꞈ uˉ peunˍ shehˍ hpaˇ hpehꞈ ve tehꞈ chi teˇ hkui ngaˬ shiˍ la peuˬ. Caˆ muiˬ puiˉ ve chaw htaꞈ nuˇ nehˬ ve chaw hpehꞈ la tcuh ve yoˬ. Mvuhˇ miˬ teˇ hpaˍ yawˇ piˇ gaˇ ve chaw htaꞈ piˇ gʼa ve yoˬ.’