Jawˇmawˇ Neˍbuˍhkaˍneˍzaˍ zuhꞈ maˆ chaw han lonˉ mawˬ peuˬ hkʼawꞈ nawˉ, yawˇ shi shaˉ hoꞈ lonˉ teˇ maˬ te leh Duˇraˆ miˬ tawˬ kuiˬ lo teh taˍ ve yoˬ. Oˇ ve hkʼawꞈ nawˉ, mvuhˇ miˬ hkʼaw chehˇ ve awˬ hoˉ awˬ naˬ hui htaꞈ shaˉ hoꞈ lonˉ gʼuˇ suhˍ lo kuˬ hpawnˬ la ve yoˬ. Shaˆdraˆ, Meˍshehˆ, Aˍbeˍdaˍneˍgoˍ hui htaꞈ kaꞈ kuˬ laˬ ve yoˬ. Jawˇmawˇ tawˇ piˇ ve, ‘behˬ heh ma, lehˉ lu meuˆ ve leh tinˍ hteˆ ve awˬ hkawˇ gʼa kaˇ htaˇ, nawˬ hui teˇ gʼaˇ le le shaˉ hoꞈ htaꞈ oˉ kʼoˍ gʼa pui ve yoˬ! Hkʼaˬ ve teˇ gʼaˇ oˉ kʼoˍ maˇ pui ve kʼo, chiˆ jaˇ ve aˬ miˍ buiˬ hpfuh hkʼaw baˬ keu tuˬ yoˬ.’ Shaˆdraˆ, Meˍshehˆ, Aˍbeˍdaˍneˍgoˍ shaˉ hoꞈ oˇ ve htaꞈ oˉ kʼoˍ pui tuˬ laˇ? Maˇ heˆ leh yawˇ hui Yaˬhoˉvaˬ htaꞈ ceh tiˉ oˉ kʼoˍ pui tuˬ laˇ?

Oˇ ve hkʼawꞈ nawˉ jawˇ mawˇ lehˬ behˬ heh ma meuˆ ve, tinˍ hteˆ ve, lehˉ lu meuˆ tcuh ve teˇ yanˇ, teˇ gʼaˇ le le shaˉ hoꞈ htaꞈ oˉ kʼoˍ gʼa pui ve yoˬ. Yaꞈ hkʼaˇ, Shaˆdraˆ, Meˍshehˆ, Aˍbeˍdaˍneˍgoˍ shaˉ hoꞈ htaꞈ oˉ kʼoˍ maˇ pui ve htaꞈ chaw teˇ hpaˍ mawˬ leh jawˇ mawˇ htaꞈ ca kʼoˆ piˇ ve, ‘Heˍbrehˇ chaw 3 gʼaˇ nawˬ te taˍ ve shaˉ hoꞈ htaꞈ oˉ kʼoˍ maˇ pui.’ Neˍbuˍhkaˍneˍzaˍ yawˇ hui 3 gʼaˇ htaꞈ kʼoˆ piˇ ve, ‘ngaˬ nawˬ hui htaꞈ awˬ yanˇ kʼawꞈ peꞈ laˇ shaˍ. Nawˬ hui shaˉ hoꞈ htaꞈ oˉ kʼoˍ maˇ pui ve kʼo, ngaˬ aˬ miˍ buiˬ hpfuh hkʼawˬ baˬ keu tuˬ yoˬ. Nawˬ hui htaꞈ ga laˇ gʼa ve Gʼuiˬ sha teˇ gʼaˇ kaꞈ maˇ cawˬ.’ Yawˇ hui kʼawꞈ yaw hkʼawꞈ piˇ ve, jawˇ mawˇ˗oˬ, nawˬ ngaˬ hui htaꞈ awˬ yanˇ peꞈ laˇ tuˬ maˇ loˬ. Ngaˬ hui ve Gʼuiˬ sha ga laˇ tuˬ yoˬ. Yaꞈ hkʼaˇ, ngaˬ hui ve Gʼuiˬ sha maˇ ga laˇ ve kʼo kaꞈ nawˬ ve shaˉ hoꞈ htaꞈ ngaˬ hui oˉ kʼoˍ pui tuˬ ve maˇ heˆ.

Neˍbuˍhkaˍneˍzaˍ beuꞈ jaˇ leh kʼoˆ ve, ‘ponˬ laˬ htaˇ aꞈ kehˉ 7 pun chiˆ jaˇ ve aˬ miˍ buiˬ hpfuh te˗o!’ ‘Chi 3 gʼaˇ htaꞈ hpeh tsuhꞈ leh baˬ keu˗o’ tehꞈ maꞈ yaˇ htaꞈ kʼoˆ piˇ ve yoˬ.  Aˬ miˍ buiˬ hpfuh oˇ ve chiˆ jaˇ leh awˬ paˇ lo kʼai ve maꞈ yaˇ teˇ hkui tiˉ suh˗e ve yoˬ. Heˍbrehˇ chaw 3 gʼaˇ htaꞈ aˬ miˍ buiˬ hpfuh hkʼaw baˬ keu piˇ ve yoˬ. Yaꞈ hkʼaˇ, Neˍbuˍhkaˍneˍzaˍ aˬ miˍ buiˬ hpfuh hkʼaw nyi peu ve teˇ yanˇ, Hawˉ hkʼaˆ 4 gʼaˇ te toˇ chehˇ ve htaꞈ gʼa mawˬ ve yoˬ. Yawˇ anˇ jaˇ leh awˬ hoˉ awˬ naˬ hui htaꞈ na piˇ ve, ‘aˬ miˍ buiˬ hpfuh hkʼaw ngaˬ 3 gʼaˇ ceh tiˉ hpeh keu tcuh taˍ ve maˇ heˆ laˇ? Aˬ htoꞈ ma te 4 gʼaˇ chehˇ taˍ ve le? 4 gʼaˇ teˇ gʼaˇ lehˬ mvuhˇ naw ma tcuh yaˇ htaꞈ shuˍ ve yoˬ!’

Neˍbuˍhkaˍneˍzaˍ aˬ miˍ buiˬ hpfuh awˬ paˇ lo kʼai leh kuˬ piˇ ve, ‘uiˍ jaˇ mvuh jaˇ ve Gʼuiˬ sha ve awˬ ceˬ paˍ˗oˬ tawˆ la˗o!’ Shaˆdraˆ, Meˍshehˆ, Aˍbeˍdaˍneˍgoˍ teꞈ chiˉ maˇ hpehꞈ leh aˬ miˍ buiˬ hpfuh hkʼaw tawˆ la ve htaꞈ mawˬ ve chaw teˇ gʼaˇ le le anˇ jaˇ. Yawˇ hui ve oˉ kʼoˍ mvuh, awˬ to, veuꞈ kʼaˇ aˬ miˍ maˇ toꞈ. Aˬ miˍ shaˉ kaꞈ maˇ nuˬ.

Neˍbuˍhkaˍneˍzaˍ tawˇ piˇ ve, Shaˆdraˆ, Meˍshehˆ, Aˍbeˍdaˍneˍgoˍ hui ve Gʼuiˬ sha lehˬ uiˍ jaˇ mvuh jaˇ ve Gʼuiˬ sha hpehꞈ ve yoˬ. Yawˇ hui htaꞈ mvuhˇ naw ma tcuh yaˇ ca ga la tcuh ve yoˬ. Gʼuiˬ sha chi teˇ gʼaˇ htaꞈ shuˍ ve awˬ nu ve gʼuiˬ sha teˇ gʼaˇ kaꞈ maˇ cawˬ.

Aˬ htoꞈ ma teˇ ceuˬ hpehꞈ la ve htawˇ maˇ kʼoˆ, Heˍbrehˇ chaw hawˉ hkʼaˆ chi 3 gʼaˇ hkʼa shuˍ nawˬ Yaˬhoˉvaˬ htaꞈ ka tiꞈ yeˬ tuˬ laˇ?