Yaˬhoˉvaˬ Yeˍraˍmiˆ htaꞈ leuˆ yuˬ leh Yuˇdaꞈ chaw awˬ pon tcuh kaˍ paˍ te tcuh ve yoˬ. Mvuhˇ miˬ yaˇ haiˬ ve maˇ te tuˬ, Gʼuiˬ sha yawˇ htaꞈ shaˍ tiꞈ ca piˇ tcuh ve yoˬ. Yaꞈ hkʼaˇ, Yeˍraˍmiˆ kʼoˆ ve, ‘Yaˬhoˉvaˬ˗oˬ ngaˬ a shaꞈ i jaˇ sheˍ. Mvuhˇ miˬ yaˇ htaꞈ ngaˬ hkʼaˬ hkʼe kʼoˆ piˇ tuˬ maˇ shiˍ.’ Yaˬhoˉvaˬ yawˇ htaꞈ kʼoˆ piˇ ve, ‘taˇ kawˆ nawˬ hkʼaˬ hkʼe gʼa kʼoˆ tuˬ ngaˬ nawˬ htaꞈ ga laˇ tuˬ yoˬ.’

Yaˬhoˉvaˬ Yeˍraˍmiˆ htaꞈ Yuˇdaꞈ chaw hui ve awˬ hoˉ awˬ naˬ venˇ baˬ lo shiˍ kʼai tcuh ve yoˬ. Oˇ ve hkʼawꞈ nawˉ, yawˇ hui mehˆ gʼuˇ suhˍ lo jeꞈ muꞈ hkʼu baˬ hkoˇ leh kʼoˆ piˇ tcuh ve, ‘Yeˍruˆsaˍlehnˍ venˇ htaꞈ chi hkʼe te piˇ tuˬ yoˬ.’ Yeˍraˍmiˆ Yaˬhoˉvaˬ kʼoˆ ve hkʼe te ve yoˬ. Yaꞈ hkʼaˇ, awˬ hoˉ awˬ naˬ nyi ma zuhˆ jaˇ. Pawˇ hkuˇ Paˍshuˇraˆ meh ve teˇ gʼaˇ Yeˍraˍmiˆ htaꞈ dawˆ peuˬ hkʼawꞈ nawˉ, suhˆ htawˆ taˍ ve hkʼaw keu piˇ leh teˇ haˉ mvuhˇ hkʼa htiˇ yawˇ naˇ naˇ te maˇ gʼa. Teˇ shawˉ gaˬ leh Paˍshuˇraˆ hpehˇ piˇ ve yoˬ. Yeˍraˍmiˆ kʼoˆ ve, ‘ngaˬ yeunˇ hkanˍ maˇ gʼaˇ˗o. Ngaˬ bon maˇ maˍ gaˇ˗o.’ Yawˇ bon maˇ maˍ˗o ve laˇ? Maˇ heˆ. Yawˇ hkʼa dehꞈ dawˇ nyi sheˍ leh kʼoˆ ve, ‘Yaˬhoˉvaˬ ve tawˇ hkawˇ ngaˬ awˬ to hkʼaw aˬ miˍ hkʼe cawˬ taˍ ve pa taw, ngaˬ maˇ te maˇ hpehꞈ.’ Yeˍraˍmiˆ Yuˇdaꞈ chaw htaꞈ shaˍ tiꞈ kʼawꞈ piˇ ve yoˬ.

Laiˉ hkʼawꞈ gaˬ leh Yuˇdaꞈ mvuhˇ miˬ hkʼaw jawˇ mawˇ awˬ suhˉ cawˬ la ve yoˬ. Yeˍraˍmiˆ bon maˍ ve awˬ lawn paw hkuˇ leh maˇ heˆ heˆ ve tcuh kaˍ paˍ yawˇ htaꞈ nyi bawˬ jaˇ. Yawˇ hui awˬ hoˉ awˬ naˬ htaꞈ kʼoˆ piˇ ve, ‘chi hpaˇ htaꞈ tiˇ pehˍ cawˇ ve yoˬ.’ Yeˍraˍmiˆ kʼoˆ ve, ‘nawˬ hui ngaˬ htaꞈ tiˇ pehˍ ve kʼo, maˇ te yaꞈ ve chaw htaꞈ tiˇ pehˍ ve yoˬ. Awˬ lawn kʼo, ngaˬ hkʼaˇ ngaˬ kʼoˆ ve maˇ heˆ. Yaˬhoˉvaˬ kʼoˆ tcuh laˇ ve hkʼe ngaˬ kʼoˆ ve yoˬ.’ Awˬ hoˉ awˬ naˬ hui gʼa kaˇ htaˇ, yawˇ hui kʼoˆ ve, ‘chi hpaˇ htaꞈ maˇ tiˇ pehˍ piˇ cawˇ.’

Oˇ ve hkʼawꞈ nawˉ, Yeˍraˍmiˆ bon kʼawꞈ maˍ ve yoˬ. Oˇ teˇ yanˇ awˬ hoˉ awˬ naˬ hui beuꞈ jaˇ. Yawˇ hui Yeˍraˍmiˆ htaꞈ tiˇ pehˍ tuˬ jawˇ mawˇ htaꞈ kʼoˆ piˇ ve yoˬ. Yawˇ  hui Yeˍraˍmiˆ htaꞈ hkʼaˬ hkʼe te piˇ gaˇ ve htawˇ maˇ kʼoˆ, jawˇ mawˇ a hkaw˗anˬ piˇ ve yoˬ. Yawˇ hui Yeˍraˍmiˆ suh˗e tuˬ naˉ jaˇ ve naˍ bawˍ jeꞈ nehˆ cawˬ ve hkʼaw baˬ keu piˇ leh yawˇ jeꞈ nehˆ hkʼaw tuˍ loꞈ˗e ve yoˬ.

Hawˉ yehˬ hkʼaw kanˉ te chehˇ ve Eˇbaˆdaˍmeˍlehˆ meh ve hawˉ hkʼaˆ teˇ gʼaˇ jawˇ mawˇ htaꞈ kʼoˆ piˇ ve, ‘awˬ hoˉ awˬ naˬ hui Yeˍraˍmiˆ htaꞈ iˉ kaˆ naˍ bawˍ hkʼaw baˬ keu piˇ ve yoˬ. Maˇ ga piˇ ve kʼo, yawˇ suh˗e tuˬ yoˬ.’ Yeˍraˍmiˆ htaꞈ iˉ kaˆ nanˍ bawˍ hkʼaw gʼawˬ tawˆ tuˬ jawˇ mawˇ Eˇbaˆdaˍmeˍlehˆ htaꞈ hawˉ hkʼaˆ 30 gʼaˇ shiˍ kʼai tcuh ve yoˬ. Shu ngaˬ hui htaꞈ Yeˍraˍmiˆ hkʼa shuˍ tawˍ laˇ ve kʼo kʼawꞈ hto toˇ˗e tuˬ laˇ?