Eˇzaˍraˆ ve awˬ co˗e htaˇ, Paˇshaˇ mvuhˇ miˬ Suˇsanˍ venˇ hkʼaw Iˉsaˍreˍlaˆ chaw Neˍhaˍmiˆ meh ve teˇ gʼaˇ chehˇ taˍ ve yoˬ. Yawˇ lehˬ jawˇ mawˇ Aˍtaˍyeˍziˆ ve hawˉ yehˬ hkʼaw kanˉ te chehˇ ve yoˬ. Teˇ nyi htaˇ, Yuˇdaꞈ mvuhˇ miˬ hkʼaw laˬ ve Neˍhaˍmiˆ ve awˬ viˉ awˬ nyi yawˇ htaꞈ kʼoˆ piˇ ve, ‘Yeˍruˆsaˍlehnˍ venˇ hkʼaw kʼoꞈ˗e ve chaw hpehꞈ haˍ jaˇ ve awˬ ceuˬ htaꞈ gʼa hpuˇ leh kawˆ tuˬ cawˬ ve yoˬ. Awˬ lawn kʼo, lanˇ venˇ leh, venˇ taˍ meuꞈ hpeꞈ Baˍbuˍlonˍ chaw te luˬ taˍ ve maˇ kʼawꞈ gu te sheˍ.’ Hkʼe te leh, Neˍhaˍmiˆ dawˇ haˍ jaˇ. Yawˇ Yeˍruˆsaˍlehnˍ venˇ htaꞈ kʼawꞈ gu te gaˇ leh jawˇ mawˇ a hkaw˗anˬ peꞈ laˇ tuˬ yawˇ bon lawˬ ve yoˬ.

Oˇ ve hkʼawꞈ nawˉ, Neˍhaˍmiˆ dawˇ haˍ ve htaꞈ jawˇ mawˇ Aˍtaˍyeˍziˆ gʼa mawˬ ve yoˬ. ‘Nawˬ chi hkʼe taw dawˇ haˍ ve ngaˬ maˇ mawˬ jaw. Aˬ htoꞈ ma hpehꞈ ve le?’ tehꞈ na piˇ ve yoˬ. Hkʼe te leh, Neˍhaˍmiˆ hkʼawꞈ piˇ ve, ‘ngaˬ paw kuiˬ Yeˍruˆsaˍlehnˍ venˇ luˬ kʼai peuˬ ve pa taw, hkʼaˬ hkʼe te ngaˬ nyi ma maˇ luˬ ve hpehꞈ gʼa ve le?’ Jawˇmawˇ kʼawꞈ na piˇ ve, ‘ngaˬ aˬ htoꞈ ma ga laˇ gʼa ve le?’ Neˍhaˍmiˆ nyi ma hkʼaw bon lawˬ peuˬ hkʼawꞈ nawˉ hkʼawꞈ piˇ ve, ‘ngaˬ kʼoꞈ˗e leh Yeˍruˆsaˍlehnˍ lanˇ venˇ kʼawꞈ gu te hpehꞈ˗aw laˇ?’ Jawˇmawˇ Aˍtaˍyeˍziˆ Neˍhaˍmiˆ Yeˍruˆsaˍlehnˍ venˇ lo kʼoꞈ˗e tuˬ a hkaw˗anˬ piˇ leh haꞈ shaˉ piˇ ve yoˬ. Jawˇmawˇ lehˬ Neˍhaˍmiˆ Yuˇdaꞈ mvuhˇ miˬ htaꞈ uˉ peunˍ tcuh leh venˇ taˍ meuꞈ hpeꞈ te tuˬ suhˆ teˇ hpaˍ piˇ ve yoˬ.

Neˍhaˍmiˆ Yeˍruˆsaˍlehnˍ venˇ lo gaˬ la htaˇ, lanˇ venˇ htaꞈ ca chaˬ nyi ve yoˬ. Oˇ ve hkʼawꞈ nawˉ, paw hkuˇ leh awˬ hoˉ awˬ naˬ htaꞈ kʼoˆ piˇ ve, ‘lanˇ venˇ luˬ kʼai jaˇ˗oˬ. Ngaˬ hui haˆ gʼa gu cawˇ ve yoˬ.’ Teˇ gʼaˇ le le nyi ma cawˇ leh lanˇ venˇ awˬ suhˉ kʼawꞈ gu te ve yoˬ.

Iˉsaˍreˍlaˆ chaw ve canˇ paˍ yawˇ hui htaꞈ kʼoˆ guiˇ piˇ ve, ‘lanˇ venˇ oˇ ve heh hpuiˇ teˇ hkeh ceh taˆ˗e ve kaꞈ paˆ ce la tuˬ yoˬ.’ Yaꞈ hkʼaˇ, yawˇ hui maˇ na leh lanˇ venˇ kʼawꞈ caˉ kawˍ ve yoˬ. Leh Lanˇ venˇ yeˬ leh mvuh jaˇ ve yoˬ.

Yawˇ hui ve canˇ paˍ Yeˍruˆsaˍlehnˍ venˇ htaꞈ laiˉ hpawˇ lo bawˆ tuˬ awˬ hkʼaˇ gu chehˇ ve Yuˇdaꞈ chaw gʼa kaˇ htaˇ, kawˆ jaˇ. Yaꞈ hkʼaˇ, Neˍhaˍmiˆ kʼoˆ piˇ ve, ‘taˇ kawˆ. Yaˬhoˉvaˬ ngaˬ hui geh chehˇ taˍ ve yoˬ.’ Lanˇ venˇ kawˍ chehˇ ve chaw htaꞈ nyi haꞈ shaˉ tuˬ, chaw shaw tcuh taˍ ve yoˬ. Hkʼe te leh, canˇ paˍ ca bawˆ la maˇ gʼa.

 52 nyi ceh kaꞈ Yeˍruˆsaˍlehnˍ lanˇ venˇ leh venˇ taˍ meuꞈ hpeꞈ hkʼa peu˗eˬ te peuˬ ve yoˬ. Yaˬhoˉvaˬ htaꞈ lanˇ venˇ awˬ suhˉ chiˇ aꞈ piˇ tuˬ, Neˍhaˍmiˆ Leˍviˆ chaw hui htaꞈ Yeˍruˆsaˍlehnˍ venˇ lo kuˬ laˬ ve yoˬ. Yawˇ Leˍviˆ chaw hui htaꞈ 2 moˍ pehˬ leh Gʼuiˬ sha htaꞈ kʼa muiˬ chiˇ mvuh tcuh ve yoˬ. Yawˇ hui lanˇ venˇ ve go htaꞈ taˆ˗e leh venˇ htaꞈ caw tuˬ teˇ moˍ teˇ hpawˇ lo kʼai tcuh ve yoˬ. Yawˇ hui behˬ heh ma meuˆ ve, shehˍ hehˆ ve, leh tinˍ hteˆ ve, chi ve teˇ hpaˍ htaꞈ yehˇ leh Yaˬhoˉvaˬ htaꞈ kʼa muiˬ chiˇ mvuh ve yoˬ. Eˇzaˍraˆ lehˬ kʼa muiˬ hkawˇ kʼa paˍ teˇ moˍ geh kʼai leh Neˍhaˍmiˆ kʼo awˬ nu ve teˇ moˍ geh kʼai ve yoˬ. Yawˇ hui 2 moˍ htawˇ Gʼuiˬ sha ve bon yehˬ lo ca mawˬ daꞈ la ve yoˬ. Oˇ ve hkʼawꞈ nawˉ, hawˉ hkʼaˆ, yaˇ miˇ, leh yaˇ ehˉ teˇ gʼaˇ le le Yaˬhoˉvaˬ htaꞈ tuˉ tanˇ tuˬ tuˉ tanˇ piˇ leh yawˇ hui ha lehˬ jaˇ ve awˬ hkawˇ venˇ baˬ lo bvuhˬ kʼai ve yoˬ.