Yuˇdaꞈ chaw Yaˬhoˉvaˬ htaꞈ baˬ taˉ leh shaˉ hoꞈ htaꞈ laiˉ pawˆ oˉ kʼoˍ ca pui leh yawˇ hui kʼawꞈ la tuˬ Yaˬhoˉvaˬ coˇ caˇ leh ga piˇ ve yoˬ. Yaˬhoˉvaˬ tcuh kaˍ paˍ laiˉ gʼaˇ htaꞈ kʼai tcuh leh shaˍ tiꞈ ca piˇ ve htawˇ, yawˇ hui maˇ na yuˬ. Yaꞈ hkʼaˇ, yawˇ hui Gʼuiˬ sha ve tcuh kaˍ paˍ htaꞈ maˇ shawˍ maˇ caˆ kʼoˆ ve yoˬ. Yuˇdaꞈ chaw shaˉ hoꞈ htaꞈ oˉ kʼoˍ maˇ pui tuˬ Yaˬhoˉvaˬ hkʼaˬ hkʼe te tuˬ le?

Baˍbuˍlonˍ ve jawˇ mawˇ Neˍbuˍhkaˍneˍzaˍ laiˉ venˇ htaꞈ bawˆ gʼaˇ ve yoˬ. Yawˇ Yeˍruˆsaˍlehnˍ htaꞈ bawˆ gʼaˇ ve teˇ yanˇ, Yuˇdaꞈ ve jawˇ mawˇ Yeˍhkawˇniˆ, awˬ hoˉ awˬ naˬ, maꞈ poˍ, leh laꞈ meuˇ puiˉ ve chaw htaꞈ hpeh yuˬ leh Baˍbuˍlonˍ mvuhˇ miˬ lo awˬ ceˬ te tcuh ve yoˬ. Neˍbuˍhkaˍneˍzaˍ lehˬ Yaˬhoˉvaˬ ve bon yehˬ hkʼaw awˬ hpfuhˇ hkʼaˆ ve mawˇ hkʼa peu˗eˬ yuˬ kʼai ve yoˬ. Hkʼe te leh yawˇ Zeˍdaˍkiˆ htaꞈ leuˆ yuˬ leh Yuˇdaꞈ mvuhˇ miˬ hkʼaw jawˇ mawˇ te tcuh ve yoˬ.

Awˉ lawˉ htaˇ, Zeˍdaˍkiˆ Neˍbuˍhkaˍneˍzaˍ hkawˇ na yuˬ ve yoˬ. Yaꞈ hkʼaˇ, awˬ hkʼawꞈ nawˉ htaˇ, Baˍbuˍlonˍ mvuhˇ miˬ htaꞈ hpfuhˆ tuˬ awˬ paˇ awˬ kui chehˇ ve mvuhˇ miˬ leh maˇ heˆ heˆ ve tcuh kaˍ paˍ yawˇ htaꞈ awˬ gʼaˇ piˇ ve yoˬ. Tcuh kaˍ paˍ Yeˍraˍmiˆ yawˇ htaꞈ shaˍ tiꞈ piˇ ve, ‘nawˬ Baˍbuˍlonˍ htaꞈ hpfuhˆ ve kʼo, Yuˇdaꞈ mvuhˇ miˬ hkʼaw chaw gʼa suh ve, meuꞈ ve kaˆ ve leh naˬ beuˬ gaˬ la tuˬ yoˬ.’

Zeˍdaˍkiˆ jawˇ mawˇ te ve 8 hkʼawꞈ gaˬ peuˬ hkʼawꞈ nawˉ, yawˇ Baˍnuˍlonˍ htaꞈ hpfuhˆ leh Eˇjiˇtuꞈ maꞈ yaˇ ga la tcuh ve yoˬ. Hkʼe te leh Neˍbuˍhkaˍneˍzaˍ Yeˍruˆsaˍlehnˍ venˇ htaꞈ maꞈ yaˇ ca hoˆ tcuh ve yoˬ. Yeˍraˍmiˆ Zeˍdaˍkiˆ htaꞈ kʼoˆ piˇ ve, ‘Yaˬhoˉvaˬ kʼoˆ ve, nawˬ Baˍbuˍlonˍ mvuhˇ miˬ htaꞈ maˇ ca bawˆ˗e ve kʼo, nawˬ awˬ to leh Yeˍruˆsaˍvenˇ kawˆ tuˬ maˇ cawˬ. Yaꞈ hkʼaˇ, nawˬ maꞈ ca bawˆ˗e ve kʼo, Baˍbuˍlonˍ chaw Yeˍruˆsaˍlehnˍ venˇ htaꞈ tuˉ baˬ leh nawˬ htaꞈ kaꞈ hpeh kʼai tuˬ yoˬ.’ Zeˍdaˍkiˆ kʼawꞈ kʼoˆ piˇ ve, ‘ngaˬ maꞈ ca bawˆ˗e tuˬ yoˬ.’

 Teˇ hkʼawꞈ hpaˆ gaˬ leh Baˍbuˍlonˍ ve maꞈ yaˇ Yeˍruˆsaˍlehnˍ ve laˇ venˇ htaꞈ dawˆ paˆ ve yoˬ. Yawˇ hui venˇ leh Gʼuiˬ sha ve bon yehˬ htaꞈ tuˉ baˬ ve yoˬ. Venˇ yaˇ maˇ maˇ htaꞈ tiˇ pehˍ piˇ leh laiˉ hinˉ gʼaˇ htaꞈ hpeh kʼai ve yoˬ.

Zeˍdaˍkiˆ Yeˍruˆsaˍlehnˍ venˇ lo hpaw tawˆ˗e ve yoˬ. Yaꞈ hkʼaˇ, Baˍbuˍlonˍ maꞈ yaˇ gʼaꞈ yuˬ kʼai leh Yeˍriˆhkoˇ venˇ paˇ lo hpeh gʼa leh yawˇ htaꞈ Baˍbuˍlonˍ jawˇ mawˇ Neˍbuˍhkaˍneˍzaˍ geh shiˍ kʼai ve yoˬ. Neˍbuˍhkaˍneˍzaˍ lehˬ Zeˍdaˍkiˆ mehˆ gʼuˇ suhˍ lo yawˇ ve yaˇ paˍ htaꞈ tiˇ pehˍ maˍ piˇ ve yoˬ. Oˇ ve hkʼawꞈ nawˉ, yawˇ ve mehˆ shiˍ htaꞈ juˆ peꞈ piˇ leh suh htaˇ hkʼa gaˬ htawnˍ hkʼaw haw taˍ ve yoˬ. Yaꞈ hkʼaˇ, Yaˬhoˉvaˬ Yuˇdaꞈ chaw htaꞈ ka tiꞈ te piˇ ve, ‘70 hkʼawꞈ biˇ peuˬ hkʼawꞈ nawˉ, ngaˬ nawˬ hui htaꞈ Yeˍruˆsaˍlehnˍ venˇ lo shiˍ kʼoꞈ˗e laˇ tuˬ yoˬ.’

Baˍbuˍlonˍ venˇ lo hpeh kʼai taˍ ve yaˇ nehˬ teˇ hpaˍ hkʼaˬ hkʼe kʼai ve le? Yawˇ hui Yaˬhoˉvaˬ htaꞈ ka tiꞈ yeˬ chehˇ˗aw laˇ?