Zaˍhkaˍriˆ leh Eˇliˇsaˍbehˆ ve yaˇ paˍ Yoˇhanˬ uiˍ la htaˇ Gʼuiˬ sha ve tcuh kaˍ paˍ hpehꞈ ve yoˬ. Yaˬhoˉvaˬ Yoˇhanˬ htaꞈ Meˍsiˉyaꞈ laˬ tuˬ ve awˬ lawn mvuhˇ miˬ yaˇ htaꞈ maˍ piˇ tcuh ve yoˬ. Yoˇhanˬ Yuˇdaꞈ chaw hpawnˬ daꞈ kuiˬ leh venˇ hkʼaw maˍ piˇ cawˇ ve htawˇ, yawˇ heh puiˉ hkʼaw lo maˍ piˇ ve yoˬ. Yeˍruˆsaˍlehnˍ venˇ leh Yuˇdaꞈ venˇ hkʼaw chehˇ ve chaw hkʼa peu˗eˬ Yoˇhanˬ geh ca henˇ la ve yoˬ. Gʼuiˬ sha nyi ma cawˇ tuˬ te gaˇ ve kʼo, maˇ daꞈ ve awˬ ceuˬ htaꞈ maˇ gʼa te tehꞈ yawˇ maˍ piˇ ve htaꞈ mvuhˇ miˬ yaˇ gʼa kaˇ htaˇ, chaw maˇ maˇ venˇ baˆ dawˇ hpfuhˆ leh venˇ baˆ maˇ kʼawꞈ te ve yoˬ. Yoˇhanˬ yawˇ hui htaꞈ Yawˇdanˍ gʼuiˬ ma lo Baˆtiˆsaˬ piˇ ve yoˬ.

Yoˇhanˬ ve a shaꞈ teꞈ hkʼaˇ sha jaˇ. Yawˇ ve veuꞈ kʼaˇ kaˍlaˍoˆ ve awˬ mvuh hpehꞈ leh yawˇ ve caˇ tuˬ paˉ ceꞈ leh heh puiˉ hkʼaw ve pehˇ gʼuiˬ hpehꞈ ve yoˬ. Yawˇ hui Yoˇhanˬ a shu hpehꞈ ve htaꞈ shiˍ gaˇ ve yoˬ. Caˆ muiˬ puiˉ ve Hpaˍriˍsehˇ leh Saˍduˆkehˇ htawˇ yawˇ geh laˬ ve yoˬ. Yoˇhanˬ yawˇ hui htaꞈ kʼoˆ piˇ ve, ‘nawˬ hui a shaꞈ teꞈ hkʼaˇ pa leh venˇ baˆ gʼa dawˇ hpfuhˆ ve yoˬ. Aˍbraˍhanˍ ve awˬ yaˇ awˬ duˬ hpehꞈ ve pa taw, nawˬ hui shu aꞈ kehˉ daꞈ ve tehꞈ taˇ dawˇ. Oˇ hkʼe dawˇ ve chaw htaꞈ Gʼuiˬ sha maˇ haꞈ yuˬ.’

Yuˇdaꞈ chaw laiˉ gʼaˇ Yoˇhanˬ htaꞈ na piˇ ve, ‘Gʼuiˬ sha nyi ma cawˇ tuˬ ngaˬ hui hkʼaˬ hkʼe gʼa te tuˬ le?’ Yoˇhanˬ kʼoˆ piˇ ve, ‘nawˬ aˉ poꞈ 2 hkʼoˆ cawˬ ve kʼo, maˇ cawˬ ve chaw htaꞈ 1 hkʼoˆ pehˬ piˇ˗oˆ.’ Aˬ htoꞈ ma pa taw Yoˇhanˬ oˇ hkʼe kʼoˆ piˇ ve nawˬ shiˍ˗aw laˇ? Gʼuiˬ sha nyi ma cawˇ tuˬ shu htaꞈ gʼa haꞈ ve yoˬ tehꞈ yawˇ ve awˬ laꞈ gʼawˇ htaꞈ maˍ piˇ ve yoˬ.

Yoˇhanˬ awˬ hkawnˍ shaw paˍ htaꞈ kʼoˆ piˇ ve, ‘nawˬ hui gʼa hteˇ cawˇ leh shu mawˇ taˇ hiˉ yuˬ.’ Yoˇhanˬ maꞈ yaˇ htaꞈ kʼoˆ piˇ ve, ‘shu htaꞈ maˇ heˆ heˆ ve taˇ ca kʼoˆ. Leh heˍ caˇ ve kaꞈ taˇ te.’

 Paw hkuˇ leh Leˍviˆ chaw Yoˇhanˬ htaꞈ na piˇ ve, ‘nawˬ a shu hpehꞈ ve chaw teˇ gʼaˇ le le shiˍ gaˇ ve yoˬ.’ Yoˇhanˬ kʼoˆ piˇ ve, ‘Iˉsaˍyaˆ kʼoˆ taˍ ve hkʼe, ngaˬ lehˬ heh puiˉ hkʼaw lo shu htaꞈ bon maˍ piˇ leh Yaˬhoˉvaˬ geh shiˍ kʼawꞈ la piˇ chehˇ ve chaw hpehꞈ ve yoˬ.’

Yoˇhanˬ maˍ ve htaꞈ mvuhˇ miˬ yaˇ laiˉ gʼaˇ dawˇ cawˇ leh yawˇ htaꞈ Meˍsiˉyaꞈ hpehꞈ ve yoˬ tehꞈ mvuhˇ miˬ yaˇ dawˇ ve yoˬ. Yaꞈ hkʼaˇ, Yoˇhanˬ kʼoˆ piˇ ve, ‘ngaˬ aꞈ kehˉ kanˇ paˆ uiˍ ve chaw teˇ gʼaˇ laˬ chehˇ ve yoˬ. Yawˇ ve hkuiˉ nuˆ caˆ htaꞈ hpui tuˬ ve ceh kaꞈ ngaˬ te maˇ keunˍ. Ngaˬ lehˬ iˉ kaˆ hkʼaw Baˆtiˆsaˬ piˇ ve yoˬ. Yaꞈ hkʼaˇ, yawˇ lehˬ daꞈ ve kehˬ ve Awˬ ha hpu awˬ hkʼaw lo Baˆtiˆsaˬ piˇ tuˬ yoˬ.’