Eˇliˇsaˍbehˆ awˬ ceuˬ awˬ hkʼaˇ teˇ gʼaˇ cawˬ ve lehˬ Maˍriˆ meh ve yoˬ. Yawˇ Gaˍliˍlehˇ mvuhˇ miˬ Naˍzaˍrehˆ venˇ lo chehˇ ve yaˇ miˇ haˉ hpehꞈ ve yoˬ. Maˍriˆ lehˬ laꞈ shaˉ maˉ te paˍ Yoˇsehꞈ htaꞈ heuˆ daꞈ tuˬ ka tiꞈ te taˍ peuˬ. Oˇ htaˇ, Eˇliˇsaˍbehˆ yaˇ hu ve 6 ha pa gaˬ peuˬ. Mvuhˇ naw ma tcuh yaˇ Gaˍbeˍraˆ Maˍriˆ geh laˬ leh kʼoˆ piˇ ve, ‘Maˍriˆ˗oˬ, chehˇ sha chehˇ˗aw laˇ? Yaˬhoˉvaˬ nawˬ htaꞈ nyi ma cawˇ ve yoˬ.’ Maˍriˆ mvuhˇ naw ma tcuh yaˇ kʼoˆ ve gʼa kaˇ htaˇ, nyi ma shoꞈ shaꞈ jaˇ. Gaˍbeˍraˆ kʼoˆ ve, ‘nawˬ yaˇ hu leh yaˇ paˍ paw la tuˬ yoˬ. Yawˇ htaꞈ Yeˍsuˆ tehꞈ meh piˇ˗oˆ. Yawˇ Jawˇmawˇ te leh co co taiˍ taiˍ uˉ peunˍ tuˬ yoˬ.’

Maˍriˆ kʼoˆ ve, ‘ngaˬ daꞈ kehˬ ve yaˇ miˇ haˉ hpehꞈ leh ngaˬ hawˉ hkʼaˆ geh maˇ zuhꞈ jaw. Hkʼaˬ hkʼe te leh yaˇ cawˬ gʼa tuˬ le?’ Gaˍbeˍraˆ kʼoˆ ve, ‘Yaˬhoˉvaˬ te maˇ gʼa ve maˇ cawˬ. Nawˬ Gʼuiˬ sha ve daꞈ kehˬ ve awˬ ha hpu gʼa leh Yaˇ paˍ paw la tuˬ yoˬ. Nawˬ ve awˬ ceuˬ awˬ hkʼaˇ Eˇliˇsaˍbehˆ kaꞈ yaˇ  cawˬ la tuˬ yoˬ.’ Maˍriˆ kʼawꞈ kʼoˆ ve, ‘ngaˬ Yaˬhoˉvaˬ ve awˬ ceˬ ma yoˬ. Nawˬ kʼoˆ ve hkʼe hpehꞈ la piˇ˗oˆ.’

Hkʼaw hkʼoˆ lo venˇ teˇ venˇ hkʼaw Eˇliˇsaˍbehˆ chehˇ taˍ ve geh Maˍriˆ ca guiˇ˗e ve yoˬ. Eˇliˇsaˍbehˆ Maˍriˆ hkawˇ gʼa kaˇ htaˇ, gʼoˇ peˬ hkʼaw yaˇ hiˆ hiˆ naˇ naˇ te ve yoˬ. Eˇliˇsaˍbehˆ daꞈ ve kehˬ ve awˬ ha hpu biˇ la leh kʼoˆ ve, ‘Maˍriˆ˗oˬ, Yaˬhoˉvaˬ nawˬ htaꞈ awˬ bon naꞈ laˇ piˇ˗oˆ. Meˍsiˉyaꞈ ve awˬ e ngaˬ geh ca guiˇ la ve awˬ bon hkʼaˬ hkʼe taw gʼa ve le?’ Maˍriˆ kʼoˆ ve, ‘ngaˬ nyi ma awˬ tawˬ hkʼa gaˬ Yaˬhoˉvaˬ htaꞈ chiˇ mvuh ve yoˬ.’ Maˍriˆ Eˇliˇsaˍbehˆ geh 3 ha pa chehˇ taˉ leh Naˍzaˍrehˆ venˇ lo kʼoꞈ˗e ve yoˬ.

Maˍriˆ yaˇ hu ve Yoˇsehꞈ gʼa shiˍ htaˇ, taꞈ iˉ baˬ taˉ tuˬ dawˇ taˍ ve yoˬ. Yaꞈ hkʼaˇ, mvuhˇ naw ma tcuh yaˇ Yoˇsehꞈ htaꞈ zuhꞈ maˆ hkʼaw kʼoˆ piˇ ve, ‘taˇ kawˆ. Maˍriˆ htaꞈ heuˆ loˬ. Yawˇ teꞈ chiˉ maˇ te yaꞈ.’ Yoˇsehꞈ Maˍriˆ htaꞈ heuˆ leh yawˇ ve aˉ hkʼaw lo shiˍ chehˇ la ve yoˬ.