Iˉsaˍreˍlaˆ mvuhˇ miˬ mvuhˇ nyi tawˆ hpawˇ lo chehˇ ve chaw, meuꞈ keu shiˍ yaꞈ kʼaw maˍ laˇ gʼa ve tehꞈ yonˍ ve yoˬ. Mvuhˇ miˬ chi hkʼaw chehˇ ve chaw teˇ moˍ mvuhˇ naw ma hkʼoˆ “meuꞈ keu shiˍ” kʼai chehˇ ve htaꞈ mawˬ leh gʼaꞈ yuˬ kʼai ve yoˬ. Meuꞈ keu shiˍ oˇ ve yawˇ hui htaꞈ Yeˍruˆsaˍlehnˍ venˇ lo shiˍ laˬ ve yoˬ. Yawˇ hui oˇ kaˬ lo chehˇ ve chaw htaꞈ na piˇ ve, ‘Yuˇdaꞈ ve hkunˉ hawˉ hkanˇ paw la ve yaˇ ehˉ hkʼaˬ lo le? Ngaˬ hui yawˇ htaꞈ oˉ kʼoˍ pui tuˬ laˬ ve yoˬ.’

Yeˍruˆsaˍlehnˍ venˇ htaꞈ uˉ peunˍ ve jawˇ mawˇ Heˍroˆ lehˬ, Jawˇmawˇ awˬ suhˉ awˬ lawn gʼa kaˇ htaˇ, dawˇ haˍ jaˇ. Yawˇ paw hkuˇ lonˉ htaꞈ na piˇ ve, ‘hkunˉ hawˉ hkanˇ chi ve hkʼaˬ lo paw la tuˬ le?’ Yawˇ hui kʼoˆ ve, ‘tcuh kaˍ paˍ kʼoˆ taˍ ve hkʼe Beˍlehˍhehnˍ venˇ lo paw la tuˬ yoˬ.’ Heˍroˆ mvuhˇ nyi tawˇ hpawˇ lo laˬ ve chaw htaꞈ kʼoˆ piˇ ve, ‘Beˍlehˍhehnˍ venˇ lo yaˇ ehˉ htaꞈ ca nyi loˬ. Yaˇ ehˉ htaꞈ mawˬ peuˬ hkʼawꞈ nawˉ, ngaˬ htaꞈ htawˇ hto laˇ˗oˆ. Ngaˬ htawˇ oˉ kʼoˍ ca pui tuˬ yoˬ.’ Yaꞈ hkʼaˇ, jawˇ mawˇ Heˍroˆ heˍ ve yoˬ.

“Meuꞈ keu shiˍ” oˇ ve kʼawꞈ kʼai leh yawˇ hui htaꞈ Beˍlehˍhehnˍ venˇ lo shiˍ kʼai ve yoˬ. “Meuꞈ keu shiˍ” oˇ ve yehˬ teˇ yehˬ hkʼoˆ jehˇ sheˬ ve yoˬ. Hkʼe te leh, yawˇ hui yehˬ hkʼaw loꞈ˗e htaˇ, Maˍriˆ leh Yeˍsuˆ htaꞈ mawˬ ve yoˬ. Yawˇ hui Yeˍsuˆ htaꞈ oˉ kʼoˍ pui leh shi, lawˇbanˍ, leh muˇraˍ, laꞈ shawnˍ piˇ ve yoˬ. Yaˬhoˉvaˬ chaw chi teˇ hpaˍ htaꞈ Yeˍsuˆ geh laˬ tcuh ve laˇ? Maˇ heˆ.

Oˇ ve teˇ haˉ, Yaˬhoˉvaˬ Yoˇsehꞈ htaꞈ zuhꞈ maˆ hkʼaw kʼoˆ piˇ ve, ‘Heˍroˆ yaˇ ehˉ htaꞈ tiˇ pehˍ gaˇ ve yoˬ. Yaˇ ehˉ leh awˬ e htaꞈ shiˍ veu leh Eˇjiˇtuꞈ mvuhˇ miˬ lo hpaw˗e loˬ. Ngaˬ nawˬ htaꞈ kʼawꞈ kʼoˆ laˇ htaˇ hkʼa gaˬ oˇ kaˬ lo chehˇ taˍ˗oꞈ.’ Hkʼe te leh, Yoˇsehꞈ yaˇ ehˉ leh awˬ e htaꞈ shiˍ hpaw˗e ve yoˬ.

Yaˬhoˉvaˬ lehˬ mvuhˇ nyi tawˆ hpawˇ lo laˬ ve chaw Heˍroˆ geh taˇ kʼawꞈ kʼoꞈ˗e tehꞈ kʼoˆ piˇ ve yoˬ. Yawˇ hui maˇ kʼawꞈ la ve htaꞈ Heˍroˆ gʼa shiˍ ve teˇ yanˇ, yawˇ nyi ma zuhˆ jaˇ. Heˍroˆ Yeˍsuˆ htaꞈ gʼaꞈ ca kuiˬ maˇ shiˍ ve pa taw, yawˇ lehˬ Beˍlehˍhehnˍ venˇ lo yaˇ paˍ ehˉ a shaꞈ 2 hkʼawꞈ ve awˬ hawˉ lo ve hkʼa peu˗eˬ htaꞈ tiˇ pehˍ tcuh ve yoˬ. Yaꞈ hkʼaˇ, Yeˍsuˆ Eˇjiˇtuꞈ mvuhˇ miˬ hkʼaw chehˇ taˍ ve yoˬ.

Heˍroˆ suh peuˬ hkʼawꞈ nawˉ, Yaˬhoˉvaˬ Yoˇsehꞈ htaꞈ kʼoˆ piˇ ve, ‘chi teˇ hkui kawˆ tuˬ maˇ cawˬ. Nawˬ ve yehˬ kʼa htaꞈ  shiˍ kʼoꞈ˗e loˬ.’ Yoˇsehꞈ lehˬ Maˍriˆ leh Yeˍsuˆ htaꞈ Iˉsaˍreˍlaˆ mvuhˇ miˬ hkʼaw shiˍ kʼoꞈ˗e leh Naˍzaˍrehˆ venˇ lo chehˇ taˍ ve yoˬ.