Yoˇsehꞈ leh Maˍriˆ Yeˍsuˆ htaꞈ shiˍ laˬ leh Naˍzaˍrehˆ venˇ lo chehˇ la peuˬ hkʼawꞈ nawˉ, yaˇ paˍ yaˇ miˇ laiˉ gʼaˇ kʼawꞈ cawˬ la ve yoˬ. Yoˇsehꞈ yehˬ kʼa htaꞈ hu tuˬ laꞈ shaˉ maˉ te leh yehˬ kʼa hkʼaw teˇ gʼaˇ le le htaꞈ kaꞈ Yaˬhoˉvaˬ ve awˬ lawn leh awˬ liˇ tawˇ hkawˇ maˍ piˇ ve yoˬ. Yawˇ teˇ pawˆ le le yawˇ hui htaꞈ Yuˇdaꞈ chaw ve hpawnˬ daꞈ kuiˬ lo shiˍ kʼai leh teˇ hkʼawꞈ le le Paˍsaˍhkaˍ pawehˇ te ve kaꞈ kʼai ve yoˬ.

Yeˍsuˆ a shaꞈ 12 hkʼawꞈ htaˇ, teˇ hkʼawꞈ le le Yeˍruˆsaˍlehnˍ venˇ lo Paˍsaˍhkaˍ pawehˇ te ve vuiˇ jaˇ ve htawˇ, yawˇ hui hkʼa peu˗eˬ kʼai ve yoˬ. Oˇ kaˬ lo chaw laˬ maˇ jaˇ. Pawehˇ te peuˬ hkʼawꞈ nawˉ, Yoˇsehꞈ leh Maˍriˆ chaw awˬ moˍ lonˉ geh teˇ geh kʼawꞈ la ve yoˬ. Yeˍsuˆ kaꞈ yawˇ hui geh kʼawꞈ la peuˬ hehˉ tehꞈ dawˇ ve yoˬ. Yaꞈ hkʼaˇ, yawˇ hui awˬ ceuˬ awˬ hkʼaˇ hkʼaw Yeˍsuˆ htaꞈ maˇ mawˬ.

Yawˇ hui Yeˍruˆsaˍlehnˍ venˇ lo kʼawꞈ kʼoꞈ˗e leh yawˇ hui ve yaˇ paˍ Yeˍsuˆ htaꞈ 3 nyi hkʼa gaˬ gʼaꞈ ca ve yoˬ. Awˬ leh meuˇ gaˬ leh bon yehˬ hkʼaw loꞈ˗e ve yoˬ. Yeˍsuˆ lehˬ mui taˍ leh saˍ laꞈ teˇ hpaˍ hui ve tawˇ hkawˇ htaꞈ na leh na nyi piˇ chehˇ ve htaꞈ gʼa mawˬ ve yoˬ. Yeˍsuˆ cuˇ yiˍ maˍ yiˍ hkʼa biˇ cawˬ leh Yaˬhoˉvaˬ ve  awˬ liˇ tawˇ hkawˇ na gʼa leh hkʼa dehꞈ shiˍ ve yoˬ tehꞈ gʼa mawˬ htaˇ, saˍ laꞈ teˇ hpaˍ anˇ ve yoˬ.

Yoˇsehꞈ leh Maˍriˆ dawˇ haˍ jaˇ. Maˍriˆ Yeˍsuˆ htaꞈ kʼoˆ piˇ ve, ‘Yaˇ paˍ˗oˬ, nawˬ pa ngaˬ huiˉ maˬ nawˬ htaꞈ ca hpfuhˆ nyi zuhˇ peuˬ! Nawˬ hkʼaˬ lo kʼai ve le?’ Yeˍsuˆ kʼoˆ piˇ ve, ‘ngaˬ e˗oˬ, ngaˬ Awˬ pa ve yehˬ hkʼaw chehˇ taˍ ve nawˬ hui maˇ shiˍ laˇ?’

Yeˍsuˆ awˬ pa awˬ e geh Naˍzaˍrehˆ venˇ lo kʼoꞈ˗e ve yoˬ. Oˇ ve hkʼawꞈ nawˉ, Yoˇsehꞈ Yeˍsuˆ htaꞈ laꞈ shaˉ maˉ te tuˬ maˍ piˇ ve yoˬ. Nawˬ dawˇ kʼo, Yeˍsuˆ uiˍ la htaˇ hkʼaˬ hkʼe ve chaw hpehꞈ tuˬ le? Yawˇ uiˍ laˇ htaˇ, cuˇ yiˍ maˍ yiˍ hkʼa biˇ cawˬ leh Gʼuiˬ sha maˇ kʼoˆ, chaw yaˇ maˇ kʼoˆ nyi ma cawˇ ve yoˬ.