Yeˍruˆsaˍlehnˍ lanˇ venˇ awˬ suhˉ gu te ve 400 hkʼawꞈ hpaˆ gaˬ peuˬ. Paw hkuˇ Zaˍhkaˍriˆ leh yawˇ ve awˬ miˇ ma Eˇliˇsaˍbehˆ Yeˍruˆsaˍlehnˍ venˇ awˬ paˇ lo chehˇ taˍ ve yoˬ. Yawˇ huiˉ maˬ heuˆ daꞈ ve maw jaˇ peuˬ ve htawˇ, yaˇ maˇ cawˬ. Teˇ nyi htaˇ Zaˍhkaˍriˆ bon yehˬ hkʼaw sha hawˉ tuˉ tanˇ chehˇ ve teˇ yanˇ, mvuhˇ naw ma tcuh yaˇ Gaˍbeˍlaˆ yawˇ htaꞈ mawˬ tcuh piˇ ve yoˬ. Zaˍhkaˍriˆ nyi ma shoꞈ shaꞈ leh kawˆ jaˇ. Yaꞈ hkʼaˇ, Gaˍbeˍlaˆ kʼoˆ ve, ‘taˇ kawˆ. Daꞈ ve awˬ lawn hto laˇ tuˬ Yaˬhoˉvaˬ ngaˬ htaꞈ peu laˇ ve yoˬ. Nawˬ awˬ miˇ ma Eˇliˇsaˍbehˆ yaˇ paˍ cawˬ la tuˬ yoˬ. Yawˇ htaꞈ Yoˇhanˬ tehꞈ gʼa meh piˇ ve yoˬ. Yaˬhoˉvaˬ Yoˇhanˬ htaꞈ leuˆ yuˬ leh a yeˇ uiˍ ve kanˉ te tcuh tuˬ yoˬ.’ Zaˍhkaˍriˆ kʼawꞈ na piˇ ve, ‘ngaˬ nawˬ htaꞈ hkʼaˬ hkʼe te yonˍ gʼa tuˬ le? Ngaˬ leh ngaˬ miˇ ma kaꞈ mawˇ jaˇ peuˬ. Hkʼaˬ hkʼe te yaˇ cawˬ gʼa tuˬ le?’ Gaˍbeˍlaˆ kʼoˆ piˇ ve, ‘ha lehˬ ve tawˇ hkawˇ chi nawˬ htaꞈ hto laˇ tuˬ Gʼuiˬ sha ngaˬ htaꞈ peu laˇ ve yoˬ. Yaꞈ hkʼaˇ, nawˬ maˇ yonˍ ve pa taw yaˇ maˇ paw la ve ceh ceh nawˬ tawˇ yaw maˇ gʼa.’

Teˇ pawˆ le le aꞈ kehˉ Zaˍhkaˍriˆ bon yehˬ hkʼaw chehˇ maw jaˇ. Yawˇ tawˆ la htaˇ, awˬ baˬ hpawˇ lo law chehˇ ve chaw yawˇ htaꞈ aˬ htoꞈ ma hpehꞈ ve shiˍ gaˇ ve yoˬ. Yaꞈ hkʼaˇ, Zaˍhkaˍriˆ tawˇ yaw maˇ gʼa. Yawˇ chaw kʼaˍ hkʼe laꞈ sheh te maˍ piˇ ve yoˬ. Zaˍhkaˍriˆ Gʼuiˬ sha ve tawˇ hkawˇ kaˇ ve tehꞈ yawˇ hui shiˍ la ve yoˬ.

Oˇ ve hkʼawꞈ nawˉ, mvuhˇ naw ma tcuh yaˇ kʼoˆ taˍ ve hkʼe, Eˇliˇsaˍbehˆ yaˇ paˍ paw la ve yoˬ. Awˬ chawˇ leh awˬ ceuˬ awˬ hkʼaˇ yaˇ ehˉ htaꞈ ca nyi la leh yawˇ geh gʼa ga ha lehˬ piˇ ve yoˬ. Eˇliˇsaˍbehˆ kʼoˆ ve, ‘ngaˬ yawˇ htaꞈ Yoˇhanˬ tehꞈ meh piˇ tuˬ yoˬ.’ Yaꞈ hkʼaˇ, yawˇ geh guiˇ la ve chaw kʼoˆ ve, ‘nawˬ ve awˬ ceuˬ awˬ hkʼaˇ Yoˇhanˬ meh ve maˇ cawˬ. Yawˇ awˬ pa ve awˬ meh hkʼa shuˍ Zaˍhkaˍriˆ meh piˇ˗oˆ.’ Yaꞈ hkʼaˇ, Zaˍhkaˍriˆ awˬ baˉ hkʼoˆ bvuhꞈ ve, ‘yawˇ ve awˬ meh Yoˇhanˬ yoˬ.’ Oˇ ve teˇ hkui Zaˍhkaˍriˆ tawˇ kʼawꞈ yaw la gʼa ve yoˬ. Yaˇ ehˉ chi teˇ gʼaˇ ve awˬ lawn Yuˇdaꞈ mvuhˇ miˬ lo bvuhˬ kʼai ve yoˬ. Yaˇ ehˉ chi uiˍ la kʼo, hkʼaˬ hkʼe ve chaw hpehꞈ la tuˬ naˍ tehꞈ chaw yaˇ shiˍ gaˇ ve yoˬ.

Oˇ htaˇ Zaˍhkaˍriˆ Gʼuiˬ sha ve awˬ ha hpu biˇ la ve yoˬ. Yawˇ kʼoˆ ve, ‘Yaˬhoˉvaˬ htaꞈ chiˇ mvuh˗o. Meˍsiˉyaꞈ ngaˬ hui htaꞈ ponˬ laˇ tuˬ peu laˇ ve yoˬ tehꞈ Aˍbraˍhanˍ htaꞈ Gʼuiˬ sha ka tiꞈ te piˇ taˍ ve  yoˬ. Yoˇhanˬ lehˬ tcuh kaˍ paˍ hpehꞈ leh Meˍsiˉyaꞈ laˬ tuˬ yaꞈ kʼaw gu laˇ paˍ hpehꞈ ve yoˬ.’

Eˇliˇsaˍbehˆ ve awˬ ceuˬ awˬ hkʼaˇ Maˍriˆ htaꞈ kaꞈ anˇ tuˬ hpehꞈ la ve yoˬ. Gʼuˇ suhˍ teˇ lawn hkʼaw awˬ lawn chi ve htaꞈ ngaˬ hui henˇ tuˬ yoˬ.