Tcuh yaˇ 12 gʼaˇ leuˆ peuˬ hkʼawꞈ nawˉ, hkʼaw pui hkʼoˆ lo chaw awˬ moˍ lonˉ chehˇ taˍ kuiˬ lo Yeˍsuˆ laˬ ve yoˬ. Chaw chi teˇ hpaˍ Gaˍliˍlehˇ mvuhˇ miˬ, Yuˇdaꞈ mvuhˇ miˬ, Tuˇruˆ venˇ, Siˉdonˍ venˇ, Suˇriˆ mvuhˇ miˬ leh Yawˇdanˍ gʼuiˬ ma mvuhˇ nyi tawˆ hpawˇ lo laˬ ve chaw hui hpehꞈ ve yoˬ. Yawˇ hui lehˬ naˬ ve chaw, neˇ geh ve chaw htaꞈ shiˍ laˬ leh Yeˍsuˆ haꞈ shaˉ tcuh ve yoˬ. Teˇ gʼaˇ le le htaꞈ haꞈ shaˉ piˇ peuˬ hkʼawꞈ nawˉ, yawˇ mui leh Gʼuiˬ sha htaꞈ awˬ chawˇ hkʼaˬ hkʼe te gʼa tuˬ mvuhˇ miˬ yaˇ htaꞈ maˍ piˇ ve yoˬ. Ngaˬ hui Gʼuiˬ sha htaꞈ gʼaˇ gʼa va ve yoˬ tehꞈ Yeˍsuˆ kʼoˆ maˍ piˇ ve yoˬ. Gʼuiˬ sha leh awˬ chawˇ awˬ paˆ htaꞈ gʼa haꞈ ve yoˬ. Ngaˬ hui teˇ gʼaˇ le le htaꞈ ha kʼaˉ leh daꞈ ve gʼa te piˇ ve yoˬ. Leh canˇ paˍ htaꞈ kaꞈ yoˬ.

Yeˍsuˆ kʼoˆ ve, ‘nawˬ hui awˬ paˇ awˬ kui lo chehˇ ve chaw htaꞈ ceh haꞈ ve kaꞈ maˇ lawꞈ. Nawˬ hui ve canˇ paˍ htaꞈ kaꞈ gʼa haꞈ leh nyi ma awˬ tawˬ hkʼa gaˬ venˇ baˆ gʼa hpehˇ piˇ ve yoˬ. Shu nawˬ htaꞈ nyi ma zuhˆ chehˇ ve kʼo, yawˇ geh haˆ lawˬ hkawˉ sheˍ. Shu nawˬ htaꞈ te piˇ lawˬ gaˇ ve hkʼe, nawˬ shu htaꞈ oˇ hkʼe te piˇ˗oˆ.’

 Yeˍsuˆ hpu shi mawˇ jeˬ ve awˬ lawn daꞈ ve beˆ maˍ piˇ hkawˇ cawˬ ve yoˬ. Yawˇ kʼoˆ ve, ‘hpu maˇ maˇ cawˬ ve aꞈ kehˉ, Yaˬhoˉvaˬ htaꞈ awˬ chawˇ te ve lehˬ daꞈ ve yoˬ. Chaw hkʼawˇ nawˬ ve hpu htaꞈ hkʼawˇ gʼa ve yoˬ. Yaꞈ hkʼaˇ, nawˬ Yaˬhoˉvaˬ geh meuˆ daꞈ ve htaꞈ shu te luˬ laˇ maˇ gʼa. Caˇ tuˬ leh veuꞈ tuˬ awˬ lawn nawˬ taˇ dawˇ hkiˉ. Ngaˆ htaꞈ nyi sheˍ. Gʼuiˬ sha yawˇ hui htaꞈ haꞈ shaˉ piˇ leh hkʼaˬ htaˆ kaꞈ caˇ tuˬ caˍ piˇ chehˇ ve yoˬ. Dawˇ haˍ ve nawˬ ve a shaꞈ teˇ jaˆ zuhˬ la tuˬ te laˇ maˇ gʼa. Nawˬ a shaꞈ teꞈ kuiˬ hkʼaw aˬ htoꞈ ma teˇ ceuˬ loˍ ve Yaˬhoˉvaˬ shiˍ ve yoˬ tehꞈ taˇ leunˇ sheˍ.’

Yeˍsuˆ kʼoˆ ve hkʼe, mvuhˇ miˬ yaˇ maˇ gʼa kaˇ jaw. Bon awˬ hoˉ Hpaˍriˍsehˇ leh Saˍduˆkehˇ chi hkʼe ve awˬ lawn yawˇ hui htaꞈ maˇ maˍ piˇ jaw. Yeˍsuˆ lehˬ Saˍlaꞈ lonˉ hpehꞈ ve yoˬ. Aˬ htoꞈ ma pa taw le? Awˬ lawn kʼo, yawˇ maˍ ve teˇ lawn le le Yaˬhoˉvaˬ geh laˬ ve yoˬ.