Paˍsaˍhkaˍ pawehˇ te peuˬ hkʼawꞈ nawˉ, Yeˍsuˆ leh yawˇ ve awˬ laꞈ gʼawˇ Gaˍliˍlehˇ venˇ lo kʼawꞈ la htaˇ, Saˍmaˍriˆ venˇ lo hpanˍ ve yoˬ. Suˇ hkaˍ venˇ paˇ lo Yaˍkoˆ ve nanˬ bawˍ lo yawˇ hui gʼaˇ jehˇ leh mui taˍ ve yoˬ. Yeˍsuˆ oˇ kaˬ lo jehˇ taˍ leh yawˇ ve awˬ laꞈ gʼawˇ venˇ hkʼaw caˇ tuˬ ca vuiˬ kʼai ve yoˬ.

Yaˇ miˇ teˇ gʼaˇ iˉ kaˆ nanˬ bawˍ lo iˉ kaˆ ca hkʼo la ve yoˬ. Yeˍsuˆ yawˇ htaꞈ kʼoˆ piˇ ve, ‘iˉ kaˆ a ciˉ taw laˇ˗oˆ.’ Yaˇ miˇ na piˇ ve, ‘aˬ htoꞈ ma te nawˬ ngaˬ Saˍmaˍriˆ chaw hpehꞈ ve htaꞈ tawˇ yaw laˇ ve le? Yuˇdaꞈ chaw lehˬ Saˍmaˍriˆ chaw htaꞈ tawˇ maˇ yaw daꞈ ve maˇ heˆ laˇ?’ Yeˍsuˆ hkʼawꞈ piˇ ve, ‘nawˬ lehˬ ngaˬ a shu hpehꞈ ve nawˬ shiˍ ve kʼo, nawˬ ngaˬ geh iˉ kaˆ lawˬ dawˬ tuˬ yoˬ. Leh ngaˬ nawˬ htaꞈ a shaꞈ teꞈ piˇ law ve iˉ kaˆ taw laˇ tuˬ yoˬ.’ Yaˇ miˇ kʼawꞈ na piˇ ve, ‘nawˬ hkʼaˬ hkʼe kʼoˆ gaˇ ve le? Nawˬ iˉ kaˆ nyiˉ tuˬ kaꞈ maˇ cawˬ.’ Yeˍsuˆ yawˇ htaꞈ hkʼawꞈ piˇ ve, ‘ngaˬ geh iˉ kaˆ hkʼa dawˬ ve chaw lehˬ iˉ kaˆ maˇ kʼawꞈ shiˉ˗o.’ Saˍmaˍriˆ yaˇ miˇ kʼawꞈ kʼoˆ ve, ‘ngaˬ htaꞈ iˉ kaˆ oˇ hkʼe ve a ciˉ taw laˇ˗oˆ.

Yeˍsuˆ yaˇ miˇ htaꞈ kʼoˆ piˇ ve, ‘nawˬ ve awˬ hpawˇ htaꞈ choˬ kaˬ lo shiˍ laˬ˗oꞈ.’ Yawˇ kʼoˆ ve, ‘ngaˬ awˬ hpawˇ maˇ cawˬ.’ Yeˍsuˆ kʼawꞈ kʼoˆ ve, ‘nawˬ awˬ hpawˇ 5 gʼaˇ heuˆ jaw peuˬ leh chi beuꞈ teˇ geh chehˇ taˍ ve kaꞈ nawˬ ve awˬ hpawˇ maˇ heˆ sheˍ.’ Yaˇ miˇ kʼoˆ ve, ‘nawˬ lehˬ Gʼuiˬ sha ve tcuh kaˍ paˍ hpehꞈ ve yoˬ. Ngaˬ hui Saˍmaˍriˆ chaw lehˬ hkʼaw chi hkʼoˆ Gʼuiˬ sha htaꞈ oˉ kʼoˍ pui gʼa ve yoˬ. Yaꞈ hkʼaˇ, Yuˇdaꞈ chaw kʼoˆ ve, Yeˍruˆsaˍlehnˍ venˇ lo ceh tiˉ oˉ kʼoˍ gʼa pui ve yoˬ. Ngaˬ yonˍ gʼa ve Meˍsiˉyaꞈ laˬ ve kʼo, ngaˬ hui Gʼuiˬ sha htaꞈ oˉ kʼoˍ hkʼaˬ hkʼe pui cawˇ ve yawˇ kʼoˆ laˇ gʼa tuˬ yoˬ.’ Yeˍsuˆ yawˇ htaꞈ kʼoˆ piˇ ve, ‘ngaˬ lehˬ Meˍsiˉyaꞈ yoˬ.’ Chi Yeˍsuˆ yawˇ Meˍsiˉyaꞈ hpehꞈ ve yoˬ tehꞈ shu htaꞈ kʼoˆ piˇ ve awˉ lawˉ teˇ pawˆ hpehꞈ ve yoˬ.

 Yaˇ miˇ chi teˇ gʼaˇ venˇ hkʼaw haˆ kʼawꞈ˗e leh Saˍmaˍriˆ chaw htaꞈ kʼoˆ piˇ ve, ‘ngaˬ Meˍsiˉyaꞈ htaꞈ gʼa mawˬ peuˬ. Ngaˬ aˬ htoꞈ ma te jaw ve yawˇ hkʼa peu˗eˬ kʼoˆ laˇ gʼa ve yoˬ. Ca nyi la˗o.’ Yawˇ hui yaˇ miˇ awˬ hkʼaˇ suh kʼai leh nanˬ bawˍ awˬ paˇ lo Yeˍsuˆ maˍ piˇ ve htaꞈ na chehˇ ve yoˬ.

Saˍmaˍriˆ chaw Yeˍsuˆ htaꞈ yawˇ hui geh haˉ sheˍ tehꞈ kʼoˆ piˇ ve yoˬ. Yawˇ venˇ oˇ ve hkʼaw chehˇ leh yawˇ hui htaꞈ 2 nyi maˍ piˇ ve yoˬ. Yeˍsuˆ htaꞈ chaw maˇ maˇ yonˍ la ve yoˬ. Yawˇ hui Saˍmaˍriˆ yaˇ miˇ htaꞈ kʼoˆ piˇ ve, ‘Yeˍsuˆ maˍ laˇ ve htaꞈ gʼa kaˇ htaˇ, yawˇ miˬ guiˬ yaˇ htaꞈ htaiˍ hkʼawꞈ laˇ shehˍ hpaˇ hpehꞈ ve tehꞈ ngaˬ hui yonˍ ve yoˬ.’