Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ, Gʼuiˬ sha ve awˬ ha hpu yawˇ htaꞈ heh puiˉ hkʼaw lo shiˍ kʼai leh, Yeˍsuˆ 40 nyi ve hkʼaw teꞈ chiˉ maˇ gʼa caˇ leh awˍ meuꞈ jaˇ. Saˍtanˍ Yeˍsuˆ htaꞈ lawˇ nyi piˇ ve leh Saˍtanˍ kʼoˆ ve, ‘nawˬ Gʼuiˬ sha ve Yaˇ hpu hpehꞈ ve kʼo, ha pui shiˍ chi teˇ hpaˍ htaꞈ hkaoˍ monˇ hpehꞈ la tuˬ tawˇ piˇ˗oˆ.’ Yeˍsuˆ Saˍtanˍ htaꞈ kʼoˆ piˇ ve, ‘Liꞈ hpu hkʼaw chi hkʼe bvuhꞈ taˍ ve, chaw yaˇ lehˬ hkaoˍ monˇ htaꞈ pa taw ceh tiˉ gʼa teꞈ ve maˇ heˆ. Gʼuiˬ sha ve mawꞈ kʼaw hkʼaw lo tawˆ la ve tawˇ teˇ hkawˇ le le htaꞈ pa taw gʼa teꞈ ve yoˬ.’

Oˇ ve hkʼawꞈ nawˉ Saˍtanˍ Yeˍsuˆ htaꞈ tanˬ daꞈ ve, ‘nawˬ Gʼuiˬ sha ve Yaˇ hpu hpehꞈ ve kʼo, bon yehˬ lonˉ hkʼoˆ lo pawˆ ce hkʼa nyi. Awˬ lawn kʼo, Gʼuiˬ sha yawˇ ve mvuhˇ naw ma tcuh yaˇ htaꞈ peu laˇ leh nawˬ htaꞈ haꞈ shaˉ laˇ tuˬ yoˬ.’ Yaꞈ hkʼaˇ, Yeˍsuˆ Saˍtanˍ htaꞈ kʼoˆ piˇ ve, ‘Liꞈ hpu hkʼaw bvuhꞈ taˍ ve nawˬ Yaˬhoˉvaˬ htaꞈ maˇ gʼa lawˇ nyi.’

Saˍtanˍ lehˬ Yeˍsuˆ htaꞈ miˬ guiˬ hkʼoˆ ve kanˇ paˆ hkʼa peu˗eˬ leh awˬ meꞈ awˬ hponˇ mawˬ tcuh ve yoˬ. Saˍtanˍ Yeˍsuˆ htaꞈ kʼoˆ piˇ ve, ‘nawˬ ngaˬ htaꞈ hkui tcuhˉ teh leh oˉ kʼoˍ teˇ pawˆ ceh pui laˇ ve kʼo, mvuhˇ miˬ leh awˬ meꞈ awˬ hponˇ hkʼa peu˗eˬ ngaˬ nawˬ htaꞈ peꞈ laˇ tuˬ yoˬ. Yeˍsuˆ yawˇ kʼawꞈ kʼoˆ piˇ ve, ‘Saˍtanˍ˗oˬ kʼai loˬ. Liꞈ hpu hkʼaw bvuhꞈ taˍ ve, nawˬ Yaˬhoˉvaˬ htaꞈ ceh tiˉ oˉ kʼoˍ gʼa pui ve yoˬ.’

Saˍtanˍ Yeˍsuˆ geh tawˆ kʼai leh mvuhˇ naw ma tcuh yaˇ Yeˍsuˆ htaꞈ caˇ tuˬ caˍ piˇ ve yoˬ. Oˇ htaˇ tanˬ leh Yeˍsuˆ mvuhˇ naw ma hkʼoˆ Gʼuiˬ sha ve mvuhˇ miˬ awˬ lawn tanˬ maˍ ve yoˬ. Awˬ lawn kʼo, kanˉ chi ve te tuˬ yawˇ htaꞈ miˬ guiˬ hkʼoˆ lo peu laˇ ve yoˬ. Mvuhˇ miˬ yaˇ Yeˍsuˆ maˍ ve htaꞈ dawˇ cawˇ leh yawˇ awˬ hkʼaˇ suh gʼaꞈ kʼai ve yoˬ.