Yeˍsuˆ miˬ guiˬ hkʼoˆ laˬ ve lehˬ Gʼuiˬ sha ve mvuhˇ miˬ daꞈ ve awˬ lawn sha tanˇ maˍ tuˬ laˬ ve yoˬ. Leh Yeˍsuˆ anˇ tuˬ te gʼa tuˬ Yaˬhoˉvaˬ daꞈ kehˬ ve awˬ ha hpu kaꞈ piˇ ve yoˬ. Yeˍsuˆ anˇ tuˬ te ve chi awˬ gʼuˇ suhˍ hpawˇ yawˇ Jawˇmawˇ te htaˇ kʼo, chaw yaˇ htaꞈ hkʼaˬ hkʼe ga piˇ gʼa tuˬ hpeuꞈ maw laˇ ve yoˬ. Yeˍsuˆ a naˍ teˇ ceuˬ le le htaꞈ gu na˗e piˇ gʼa ve yoˬ. Yeˍsuˆ hkʼaˬ kaˬ lo kʼai ve htawˇ, chaw naˬ yawˇ geh laˬ leh teˇ gʼaˇ le le htaꞈ yawˇ gu na˗e piˇ ve yoˬ. Mehˆ cuˉ ve chaw mehˆ kʼawꞈ mawˬ la ve, naˍ paw pawˇ ve chaw kʼawꞈ kaˇ la ve, hkui sheh laꞈ sheh suh ve chaw kʼawꞈ juˇ gʼa la ve, neˇ geh ve chaw htaꞈ kaꞈ gʼaꞈ kʼoˬ piˇ gʼa ve yoˬ. Chaw teˇ hpaˍ yawˇ ve aˉ poꞈ awˬ caˍ meuˇ htaꞈ ceh htawˇ ve kaꞈ na˗e la ve yoˬ. Yeˍsuˆ kʼai kuiˬ teˇ kaˬ le le lo yawˇ hui kaꞈ gʼaꞈ kʼai ve yoˬ. Yeˍsuˆ yawˇ teˇ gʼaˇ tiˉ chehˇ gaˇ ve htawˇ, yawˇ geh laˬ ve chaw teˇ gʼaˇ le le htaꞈ haꞈ yuˬ piˇ ve yoˬ.

Teˇ pawˆ htaˇ, Yeˍsuˆ yehˬ teˇ yehˬ awˬ hkʼaw lo chehˇ taˍ htaˇ, hkui sheh laꞈ sheh suh ve hawˉ hkʼaˆ htaꞈ shu yawˇ geh taˆ laˬ ve yoˬ. Chaw maˇ jaˇ ve pa taw, yawˇ hui yehˬ hkʼaw loꞈ˗e maˇ gʼa. Yawˇ hui yehˬ awˬ hkʼoˆ hpaˆ pawnˍ leh hkui sheh laꞈ sheh suh ve chaw htaꞈ hpehˇ ce piˇ leh Yeˍsuˆ htaꞈ haꞈ shaˉ tcuh ve yoˬ. Yeˍsuˆ yawˇ htaꞈ ‘tu leh juˇ kʼai˗lo’ tehꞈ kʼoˆ piˇ ve yoˬ. Yawˇ tu leh juˇ kʼai ve yoˬ. Hkʼe te leh yawˇ htaꞈ mawˬ ve chaw teˇ gʼaˇ le le anˇ jaˇ.

Teˇ lawn kʼawꞈ cawˬ sheˍ. Yeˍsuˆ hkʼaˆ teˇ hkʼaˆ hkʼaw loꞈ˗e htaˇ, hkiˬ tuꞈ paˍ 10 gʼaˇ vuiˇ kuiˬ lo chehˇ leh kuˬ ve, ‘Yeˍsuˆ˗oˬ, ngaˬ hui htaꞈ ha kʼaˉ laˇ˗oˆ.’ Oˇ htaˇ teˇ co˗e ve hkiˬ tuꞈ paˍ lehˬ shu awˬ paˇ lo maˇ gʼa chehˇ. Yaˬhoˉvaˬ ve awˬ liˇ tawˇ hkawˇ cawˬ taˍ ve hkʼe, Yeˍsuˆ yawˇ hui htaꞈ bon yehˬ lonˉ awˬ hkʼaw lo paw hkuˇ geh kʼai tuˬ kʼoˆ piˇ ve yoˬ. Hkiˬ tuꞈ paˍ 10 gʼaˇ bon yehˬ lonˉ lo kʼai chehˇ htaˇ  kaꞈ yawˇ hui ve a naˍ na˗e la ve yoˬ. Yaꞈ hkʼaˇ, teˇ gʼaˇ ceh tiˉ kʼawꞈ la leh Yeˍsuˆ htaꞈ awˬ bon uiˍ jaˇ kʼoˆ piˇ leh Gʼuiˬ sha htaꞈ chiˇ mvuh ve yoˬ.

12 hkʼawꞈ hkʼa gaˬ naˬ ve yaˇ miˇ teˇ gʼaˇ htaꞈ chaw teˇ gʼaˇ kaꞈ gu na˗e piˇ maˇ gʼa. Yawˇ chaw awˬ moˍ lonˉ hkʼaw beuˆ loꞈ˗e leh Yeˍsuˆ awˬ hkʼawꞈ nawˉ hpawˇ lo laˬ leh yawˇ ve aˉ poꞈ awˬ caˍ meuˇ htaꞈ ceh htawˇ ve kaꞈ yawˇ laꞈ haˉ na˗e la ve yoˬ. Yeˍsuˆ na piˇ ve, ‘ngaˬ htaꞈ a shu htawˇ ve le?’ Yaˇ miˇ chi teˇ gʼaˇ kawˆ jaˇ ve htawˇ, yawˇ awˬ tehˬ ve awˬ lawn Yeˍsuˆ htaꞈ kʼoˆ piˇ ve yoˬ. Yeˍsuˆ yawˇ htaꞈ awˬ gʼaˇ piˇ ve, ‘yaˇ miˇ˗oˬ, ha lehˬ chehˇ˗oˆ. Nawˬ htaꞈ na˗e la piˇ peuˬ.’

Yuˇdaꞈ chaw ve hpawnˬ daꞈ kuiˬ hkʼaw Yaˍiˉruˆ meh ve awˬ hoˉ teˇ gʼaˇ Yeˍsuˆ htaꞈ lawˬ hkawˉ piˇ ve, ‘ngaˬ ve aˉ hkʼaw lo a ciˉ laˬ˗oꞈ. Ngaˬ ve yaˇ miˇ ehˉ naˬ jaˇ. Yawˇ a shaꞈ kaꞈ i jaˇ sheˍ.’ Yaꞈ hkʼaˇ, yawˇ Yaˍiˉruˆ aˉ hkʼaw lo maˇ gaˬ sheˍ htaˇ kaꞈ yaˇ suh˗oˬ. Yeˍsuˆ gaˬ la htaˇ, yehˬ kʼa hkʼaw ve chaw geh chaw maˇ maˇ nyi ma luˬ leh hawˬ chehˇ ve htaꞈ yawˇ gʼa mawˬ ve yoˬ. Yeˍsuˆ yawˇ hui htaꞈ kʼoˆ piˇ ve, ‘taˇ hawˬ loˬ. Yaˇ ehˉ chi zuhꞈ muiˉ kʼa chehˇ ve yoˬ.’ Yeˍsuˆ yaˇ miˇ ehˉ ve laꞈ sheh htaꞈ htawˇ leh kʼoˆ ve, ‘yaˇ miˇ ehˉ˗oˬ, tu la˗o!’ Leh yawˇ laꞈ haˉ tu mui ve yoˬ. Yeˍsuˆ awˬ pa awˬ e htaꞈ kʼoˆ piˇ ve, yawˇ htaꞈ caˇ tuˬ caˍ piˇ˗oˆ. Yaˇ miˇ ehˉ ve awˬ pa awˬ e hkʼaˬ hkʼe taw taw ha lehˬ ve htaꞈ dawˇ nyi sheˍ!