Yeˍsuˆ Baˆtiˆsaˬ haꞈ yuˬ peuˬ hkʼawꞈ nawˉ maˇ maw ‘Gʼuiˬ sha ve mvuhˇ miˬ gaˬ la paˇ neˇ˗oˬ tehꞈ yawˇ bon tanˬ maˍ ve yoˬ. Yeˍsuˆ Gaˍliˍlehˇ venˇ leh Yuˇdaꞈ venˇ teˇ kaˬ le le lo kʼai htaˇ, awˬ laꞈ gʼawˇ kaꞈ yawˇ awˬ hkʼaˇ suh kʼai ve yoˬ. Yeˍsuˆ Naˍzaˍrehˆ venˇ yawˇ paw kuiˬ lo kaꞈ kʼai ve yoˬ. Leh Yuˇdaꞈ chaw ve hpawnˬ daꞈ kuiˬ hkʼaw loꞈ˗e leh yawˇ Iˉsaˍyaˆ ve liꞈ daw hpeuꞈ leh awˬ hkawˇ bvuhˬ chaweh gʼaw maˍ piˇ ve yoˬ. ‘Ngaˬ Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ maˍ tuˬ, Yaˬhoˉvaˬ˗oˬ ngaˬ htaꞈ daꞈ kehˬ ve awˬ ha hpu peꞈ laˇ˗oˆ.’ Chaw maˇ maˇ Yeˍsuˆ anˇ tuˬ te ve htaꞈ mawˬ gaˇ ve htawˇ, yawˇ daꞈ kehˬ ve awˬ ha hpu gʼa ve lehˬ ha lehˬ ve bon hkawˇ maˍ tuˬ awˬ pon yoˬ. Leh na taˍ ve chaw htaꞈ Yeˍsuˆ kʼoˆ piˇ ve, ‘yaꞈ nyi tcuh kaˍ paˍ ve tawˇ hkawˇ chi biˇ la peuˬ.’

Oˇ ve hkʼawꞈ nawˉ, Yeˍsuˆ lehˬ Gaˍliˍlehˇ gʼuiˬ po lo kʼai ve yoˬ. Yawˇ ngaˇ ca paˍ 4 gʼaˇ htaꞈ mawˬ leh yawˇ ve awˬ laꞈ gʼawˇ te la tuˬ kuˬ piˇ ve yoˬ. Yeˍsuˆ kʼoˆ ve, ‘ngaˬ hkʼaˇ suh laˬ˗oꞈ. Ngaˇ ca ve aꞈ kehˉ ngaˬ nawˬ hui htaꞈ chaw ca shehˍ hpaˇ te tcuh laˇ tuˬ yoˬ. Awˬ laꞈ gʼawˇ 4 gʼaˇ chi lehˬ Peˍtruˆ, Anˍdrehˍ,Yaˍkoˆ leh Yoˇhanˬ yoˬ. Yawˇ hui ngaˇ ca ve htaꞈ baˬ taˉ leh Yeˍsuˆ awˬ hkʼaˇ suh laꞈ haˉ kʼai ve yoˬ. Yawˇ hui Yaˬhoˉvaˬ ve mvuhˇ miˬ awˬ lawn Gaˍliˍlehˇ venˇ teˇ kaˬ le le lo maˍ piˇ ve yoˬ. Yuˇdaꞈ chaw ve hpawnˬ daꞈ kuiˬ hkʼaw leh tcuh hkʼaw lo leh yaꞈ kʼaw lo kaꞈ maˍ ve yoˬ. Chaw maˇ maˇ yawˇ awˬ hkʼaˇ suh teˇ kaˬ le le lo gʼaꞈ kʼai ve yoˬ. Leh Yeˍsuˆ ve awˬ meh kaꞈ Suˇriˆ venˇ lo hkʼa gaˬ bvuhˬ kʼai ve yoˬ.

Peuˬ hkʼawꞈ nawˉ, Yeˍsuˆ lehˬ yawˇ ve awˬ laꞈ gʼawˇ chaw naˬ htaꞈ gu na˗e piˇ tuˬ leh neˇ teˇ hpaˍ htaꞈ gʼaꞈ kʼoˬ tuˬ kanˇ paˆ piˇ ve yoˬ. Yeˍsuˆ venˇ hkʼaw lo leh hkʼaˆ hkʼaw lo bon maˍ toˇ htaˇ, yawˇ awˬ hkʼaˇ suh shu gʼaꞈ kʼai ve yoˬ. Ka tiꞈ yeˬ ve yaˇ miˇ teˇ hpaˍ ve awˬ meh lehˬ, Maˍriˆ Maˍgaˍdaˍlaˆ, Yoˇhaˍnaˆ Suˇsaˍnaˆ, leh awˬ kaˍ awˬ nu ve yaˇ miˇ htawˇ, Yeˍsuˆ leh awˬ laꞈ gʼawˇ hui htaꞈ te caˍ te taw piˇ ve yoˬ.

Yeˍsuˆ awˬ laꞈ gʼawˇ htaꞈ maˍ piˇ leh yawˇ hui Gaˍliˍlehˇ venˇ lo bon maˍ kʼai tcuh ve yoˬ. Chaw laiˉ gʼaˇ Yeˍsuˆ ve awˬ laꞈ gʼawˇ hpehꞈ la leh Baˆtiˆsaˬ haꞈ yuˬ ve yoˬ. Oˇ ve teˇ yanˇ chaw maˇ maˇ Yeˍsuˆ ve awˬ laꞈ gʼawˇ hpehꞈ gaˇ ve yoˬ. Yawˇ chaw chi teˇ hpaˍ htaꞈ ti mi hkʼaw caˬ gʼeuꞈ yanˇ gaˬ˗oˬ ve htaꞈ tehˆ maˍ piˇ leh kʼoˆ ve, ‘caˬ gʼeuꞈ shehˍ hpaˇ cawˬ maˇ la tuˬ Yaˬhoˉvaˬ geh bon lawˬ˗oꞈ.’ Oˇ ve hkʼawꞈ nawˉ, Yeˍsuˆ awˬ laꞈ gʼawˇ 70 gʼaˇ htaꞈ leuˆ yuˬ leh Yuˇdaꞈ venˇ teˇ kaˬ le  le lo 2 gʼaˇ teˇ kaˬ 2 gʼaˇ teˇ kaˬ kʼai tcuh ve yoˬ. Yawˇ hui lehˬ teˇ gʼaˇ le le htaꞈ Gʼuiˬ sha ve mvuhˇ miˬ awˬ lawn maˍ piˇ ve yoˬ. Yawˇ hui ha lehˬ ha kʼa kʼawꞈ la leh Yeˍsuˆ htaꞈ kʼoˆ maˍ piˇ ve yoˬ. Awˬ lawn kʼo, Saˍtanˍ lehˬ bon maˍ ve chi htaꞈ tawˍ piˇ maˇ gʼa.

Yeˍsuˆ mvuhˇ naw ma hkʼoˆ kʼawꞈ˗e peuˬ hkʼawꞈ nawˉ kaꞈ yawˇ ve awˬ laꞈ gʼawˇ htaꞈ a yeˇ uiˍ jaˇ ve kanˉ chi caˉ leh kʼawꞈ te tcuh gaˇ ve yoˬ. Yeˍsuˆ yawˇ hui htaꞈ kʼoˆ piˇ ve, ‘miˬ guiˬ chi hkʼoˆ teˇ kaˬ le le lo nawˬ hui daꞈ ve awˬ lawn sha tanˇ ca maˍ piˇ leh Gʼuiˬ sha ve tawˇ hkawˇ gʼa kaˇ ve chaw teˇ gʼaˇ le le htaꞈ Baˆtiˆsaˬ piˇ˗oˆ.’