Hpaˍriˍsehˇ hui Yeˍsuˆ htaꞈ nyi bawˬ leh yawˇ htaꞈ gʼaꞈ hpeh tuˬ awˬ hkʼaˇ ca chehˇ ve yoˬ. Yawˇ hui kʼoˆ ve, ‘shinˉ nyi htaˇ Yeˍsuˆ chaw naˬ htaꞈ gu na˗e piˇ ve maˇ cawˇ.’ Teˇ nyi htaˇ yaꞈ kʼaw hpuiˇ lo mehˆ cuˉ paˍ teˇ gʼaˇ lawˬ lehꞈ chehˇ ve htaꞈ Yeˍsuˆ mawˬ ve yoˬ. Yawˇ awˬ laꞈ gʼawˇ hui htaꞈ kʼoˆ piˇ ve, ‘nyi loˬ. Gʼuiˬ sha ve awˬ ha hpu hawˉ hkʼaˆ chi teˇ gʼaˇ htaꞈ ga piˇ tuˬ yoˬ.’ Yeˍsuˆ ciˉ gʼuiˬ hpeꞈ leh jeꞈ nehˆ te leh mehˆ cuˉ paˍ ve mehˆ shiˍ htaꞈ shehˍ piˇ leh yawˇ htaꞈ kʼoˆ piˇ ve, “Siˉlonˍ gʼuiˬ po lo kʼai leh tsuhˇ baˬ˗oꞈ.” Yawˇ tsuhˇ baˬ peuˬ hkʼawꞈ nawˉ, awˉ lawˉ teˇ pawˆ mehˆ mawˬ la ve yoˬ. Awˬ lawn chi shinˉ nyi htaˇ hpehꞈ ve yoˬ.

Awˬ paˇ awˬ kui chehˇ ve chaw anˇ jaˇ leh kʼoˆ ve, ‘yawˇ leh lawˬ lehꞈ paˍ oˇ ve teˇ gʼaˇ hpehꞈ ve laˇ, maˇ heˆ leh mehˆ hpfuhˇ shuˍ daꞈ ve chaw cawˬ ve laˇ?’ Mehˆ cuˉ paˍ kʼoˆ ve, ‘ngaˬ paw la htaˇ kaꞈ mehˆ cuˉ leh lawˬ lehꞈ chehˇ ve oˇ ve teˇ gʼaˇ ngaˬ yoˬ.’ Shu na piˇ ve, ‘nawˬ hkʼaˬ hkʼe te mehˆ mawˬ la gʼa ve le?’ Yawˇ mehˆ hkʼaˬ hkʼe te mawˬ la gʼa ve kʼoˆ maˍ piˇ ve teˇ yanˇ, mvuhˇ miˬ yaˇ yawˇ htaꞈ Hpaˍriˍsehˇ hui geh shiˍ kʼai ve yoˬ.

Mehˆ cuˉ jaw ve hawˉ hkʼaˆ chi teˇ gʼaˇ Hpaˍriˍsehˇ hui htaꞈ kʼoˆ piˇ ve, ‘Yeˍsuˆ jeꞈ nehˆ te leh ngaˬ ve mehˆ shiˍ htaꞈ shehˍ laˇ leh ca tsuhˇ baˬ˗oꞈ tehꞈ kʼoˆ laˇ ve yoˬ. Ngaˬ jeꞈ nehˆ tsuhˇ baˬ peuˬ hkʼawꞈ nawˉ mehˆ mawˬ la ve yoˬ.’ Hpaˍriˍsehˇ hui kʼoˆ ve, ‘Yeˍsuˆ shinˉ nyi htaˇ chaw naˬ htaꞈ gu na˗e piˇ ve kʼo, yawˇ ve kanˇ paˆ Gʼuiˬ sha geh laˬ ve maˇ heˆ.’ Yaꞈ hkʼaˇ, chaw teˇ hpaˍ kʼoˆ ve, ‘yawˇ kanˇ paˆ Gʼuiˬ sha geh laˬ ve maˇ heˆ kʼo, yawˇ hkʼaˬ hkʼe te chaw naˬ htaꞈ gu na˗e piˇ gʼa ve le?’

 Mehˆ cuˉ paˍ ve awˬ pa awˬ e htaꞈ Hpaˍriˍsehˇ hui kuˬ leh na piˇ ve, ‘nawˬ ve yaˇ paˍ hkʼaˬ hkʼe te mehˆ mawˬ la gʼa ve le?’ Awˬ lawn kʼo, ‘Yeˍsuˆ htaꞈ hkʼa yonˍ ve chaw Yuˇdaꞈ chaw ve hpawnˬ daꞈ kuiˬ hkʼaw gʼaꞈ tawˆ piˇ tuˬ yoˬ’ tehꞈ Hpaˍriˍsehˇ hui kʼoˆ jaw ve pa taw, yawˇ ve awˬ pa awˬ e kawˆ jaˇ leh hkʼawꞈ piˇ ve, ‘ngaˬ hui maˇ shiˍ, yawˇ htaꞈ na nyi˗o.’ Hpaˍriˍsehˇ hui mehˆ cuˉ jaw ve chaw htaꞈ kʼawꞈ kuˬ laˬ leh na piˇ ve yoˬ. Leh yawˇ hkʼawꞈ piˇ ve, ‘ngaˬ nawˬ hui htaꞈ kʼoˆ piˇ peuˬ. Aˬ htoꞈ ma te ngaˬ htaꞈ kʼawꞈ na laˇ sheˍ ve le? Hpaˍriˍsehˇ hui nyi ma zuhˆ jaˇ leh yawˇ htaꞈ gʼaꞈ kʼoˍ piˇ ve yoˬ.

Yeˍsuˆ hawˉ hkʼaˆ chi teˇ gʼaˇ geh kʼai leh na piˇ ve, ‘nawˬ Meˍsiˉyaꞈ htaꞈ yonˍ˗aw laˇ?’ Yawˇ hkʼawꞈ piˇ ve, ‘yawˇ a shu hpehꞈ ve htaꞈ ngaˬ shiˍ ve kʼo, ngaˬ yonˍ tuˬ yoˬ.’ Yeˍsuˆ yawˇ htaꞈ kʼoˆ piˇ ve, ‘ngaˬ lehˬ Meˍsiˉyaꞈ yoˬ.’ Yeˍsuˆ hawˉ hkʼaˆ chi teˇ gʼaˇ htaꞈ ha kʼaˉ piˇ ve yoˬ. Yawˇ htaꞈ gu na˗e piˇ leh mehˆ mawˬ la gʼa ve ceh maˇ heˆ. Yaꞈ hkʼaˇ, yawˇ yonˍ ve cawˬ la tuˬ kaꞈ ga piˇ ve yoˬ.