Yeˍsuˆ meuˆ daꞈ ve awˬ chawˇ 3 gʼaˇ cawˬ ve lehˬ, Beˍtaˍniˆ hkʼaˆ lo chehˇ ve yoˬ. Yawˇ hui lehˬ Laˍzaˍruˆ, Maˍriˆ leh Maˍhtaˆ awˬ viˉ awˬ nyi hpehꞈ ve yoˬ. Teˇ nyi htaˇ Yawˇdanˍ gʼuiˬ ma mvuhˇ nyi tawˆ hpawˇ lo Yeˍsuˆ chehˇ taˍ htaˇ, Maˍriˆ leh Maˍhtaˆ shu htaꞈ Yeˍsuˆ geh kʼai leh kʼoˆ piˇ tcuh ve, ‘Laˍzaˍruˆ naˬ jaˇ. Nawˬ haˆ laˬ˗oꞈ.’ Yaꞈ hkʼaˇ, Yeˍsuˆ laꞈ haˉ maˇ kʼai. Nyiˇ nyi peuˬ hkʼawꞈ nawˉ yawˇ awˬ laꞈ gʼawˇ htaꞈ kʼoˆ piˇ ve, ‘Beˍtaˍniˆ hkʼaˆ lo kʼai a veu. Laˍzaˍruˆ zuhꞈ muiˉ kʼa chehˇ ve htaꞈ ngaˬ nawˍ piˇ tuˬ yoˬ.’ Tcuh yaˇ hui yawˇ htaꞈ kʼoˆ piˇ ve, ‘Laˍzaˍruˆ zuhꞈ muiˉ kʼa chehˇ ve kʼo, yawˇ nawˇ la tuˬ yoˬ.’ Yeˍsuˆ yawˇ hui htaꞈ hteˇ leh kʼoˆ piˇ ve, ‘Laˍzaˍruˆ suh peuˬ.’

Beˍtaˍniˆ hkʼaˆ lo Yeˍsuˆ gaˬ la htaˇ, Laˍzaˍruˆ htaꞈ tuˍ ve 4 nyi gaˬ˗oˬ. Chaw laiˉ gʼaˇ Maˍhtaˆ leh Maˍriˆ geh laˬ leh nyi ma sha tuˬ awˬ gʼaˇ piˇ ve yoˬ. Yeˍsuˆ gaˬ la ve htaꞈ Maˍhtaˆ gʼa kaˇ htaˇ yawˇ haˆ kʼai leh kʼoˆ piˇ ve, “Jawˇmawˇ˗oˬ, nawˬ choˬ kaˬ chehˇ taˍ ve hkʼe kʼo, ngaˬ ve awˬ nyi paˍ suh tuˬ ve maˇ heˆ.” Yeˍsuˆ yawˇ htaꞈ kʼoˆ piˇ ve, ‘Maˍhtaˆ˗oˬ, Laˍzaˍruˆ kʼawꞈ teꞈ tu la tuˬ ve htaꞈ nawˬ yonˍ˗aw laˇ?’ Yawˇ hkʼawꞈ piˇ ve, ‘yawˇ kʼawꞈ teꞈ tu la tuˬ ve htaꞈ ngaˬ yonˍ ve yoˬ.’ Yeˍsuˆ yawˇ htaꞈ kʼoˆ piˇ ve, ‘ngaˬ lehˬ suh peuˬ ve chaw htaꞈ kʼawꞈ teꞈ tu la piˇ gʼa leh yawˇ a shaꞈ gʼa teꞈ tuˬ yoˬ.’

Maˍhtaˆ Maˍriˆ geh kʼai leh kʼoˆ piˇ ve, ‘Yeˍsuˆ gaˬ la˗o.’ Hkʼe te leh, Maˍriˆ Yeˍsuˆ geh kʼai leh chaw laiˉ gʼaˇ kaꞈ yawˇ hkʼaˇ suh kʼai ve yoˬ. Maˍriˆ Yeˍsuˆ hkui paˇ lo boˆ sheꞈ leh hawˬ ve yoˬ. Yawˇ kʼoˆ ve, ‘Jawˇmawˇ˗oˬ, nawˬ choˬ kaˬ chehˇ ve kʼo, Laˍzaˍruˆ maˇ suh taˬ.’ Maˍriˆ nyi ma luˬ jaˇ ve htaꞈ Yeˍsuˆ mawˬ htaˇ yawˇ kaꞈ hawˬ ve yoˬ. Shu Yeˍsuˆ ve mehˆ gʼuiˬ htaꞈ mawˬ leh kʼoˆ ve, ‘nyi lo, Yeˍsuˆ Laˍzaˍruˆ htaꞈ haꞈ jaˇ law.’ Yaꞈ hkʼaˇ, chaw teˇ hpaˍ kʼoˆ ve, ‘aˬ htoꞈ ma te yawˇ awˬ chawˇ htaꞈ maˇ ga piˇ ve le?’ Leh Yeˍsuˆ aˬ htoꞈ ma kʼawꞈ te tuˬ le?

Tuˍ hpfuh haˉ pui shiˍ lonˉ hoˆ taˍ ve awˬ ti lo Yeˍsuˆ kʼai ve yoˬ. Yeˍsuˆ kʼoˆ piˇ ve, ‘haˉ pui shiˍ htaꞈ hpfuhˆ baˬ˗oꞈ.’ Maˍhtaˆ kʼoˆ ve, “yawˇ suh ve chi beuꞈ 4 nyi gaˬ peuˬ ve pa taw, kuiˇ nuˬ la peuˬ.” Yaꞈ hkʼaˇ, yawˇ hui haˉ pui shiˍ htaꞈ hpfuhˆ baˬ ve yoˬ. Yeˍsuˆ bon lawˬ leh kʼoˆ ve, ‘A pa˗oˬ nawˬ ngaˬ ve hkawˇ htaꞈ hkʼaˬ htaˆ kaꞈ na yuˬ ve pa taw, nawˬ ve bon htaꞈ chiˇ mvuh ve yoˬ. Yaꞈ hkʼaˇ, ngaˬ chi teˇ pawˆ nawˬ geh lawˬ ve lehˬ, ngaˬ awˬ paˇ lo huˉ chehˇ ve chaw nawˬ ngaˬ htaꞈ peu laˇ ve tehꞈ yonˍ gʼa tuˬ lawˬ ve yoˬ. Bon lawˬ peuˬ hkʼawꞈ nawˉ Yeˍsuˆ awˬ  hkawˇ bvuhˬ chaweh kuˬ ve, ‘Laˍzaˍruˆ˗oˬ, tawˆ la˗o.’ Hkʼe te leh anˇ tuˬ hpehꞈ la ve yoˬ. Laˍzaˍruˆ hpa hawˆ taˍ sheˍ ve kaꞈ tuˍ hpfuh hkʼaw juˇ tawˆ la ve yoˬ. Yeˍsuˆ kʼoˆ piˇ ve, ‘yawˇ juˇ sha tuˬ hpa hawˆ taˍ ve htaꞈ hpui baˬ piˇ˗oˆ.’

Laˍzaˍruˆ kʼawꞈ teꞈ tu la ve htaꞈ chaw laiˉ gʼaˇ gʼa mawˬ ve pa taw, Yeˍsuˆ htaꞈ yonˍ la ve yoˬ. Yaꞈ hkʼaˇ, chaw teˇ hpaˍ awˬ lawn chi Hpaˍriˍsehˇ hui htaꞈ ca hto piˇ ve yoˬ. Oˇ htaˇ tanˬ leh Yeˍsuˆ leh Laˍzaˍruˆ htaꞈ tiˇ pehˍ tuˬ Hpaˍriˍsehˇ hui awˬ hkʼaˇ ca ve yoˬ. Tcuh yaˇ teˇ gʼaˇ Yuˇdaꞈ Iˉsaˍkaˍriˍoˆ meh ve Hpaˍriˍsehˇ hui geh kʼai leh na piˇ ve, ‘nawˬ hui Yeˍsuˆ htaꞈ hpeh gʼa tuˬ ngaˬ ga laˇ ve kʼo, ngaˬ htaꞈ hpu hkʼaˬ ma peꞈ laˇ tuˬ le?’ Hkʼe te leh, Hpaˍriˍsehˇ hui yawˇ htaꞈ 30 htehꞈ peꞈ laˇ tuˬ yoˬ. Oˇ htaˇ tanˬ leh Yeˍsuˆ htaꞈ hpeh gʼa tuˬ Yuˇdaꞈ yawˇ hui htaꞈ kʼoˆ piˇ tuˬ awˬ hkʼaˇ ca ve yoˬ.