Peˍteˍkoˆteˍ 32 hkʼawꞈ C.E. htaˇ, Paˍsaˍhkaˍ pawehˇ gaˬ la paˇ neˇ htaˇ, tcuh yaˇ hui venˇ teˇ hpaˍ hkʼaw bon maˍ toˇ taˉ leh kʼawꞈ la ve yawˇ hui heuˬ jaˇ. Yeˍsuˆ yawˇ hui geh haw loꞈ kʼoˍ ciˇ veu leh Behˇsehˇdaˆ venˇ lo gʼaˇ ca jehˇ˗e ve yoˬ. Haw loꞈ kʼoˍ jehˇ kuiˬ lo gaˬ htaˇ mvuhˇ miˬ yaˇ laiˉ hinˉ gʼaˇ chehˇ taˍ ve htaꞈ Yeˍsuˆ mawˬ ve yoˬ. Yeˍsuˆ tcuh yaˇ hui geh gʼaˇ jehˇ gaˇ ve htawˇ, Yeˍsuˆ mvuhˇ miˬ yaˇ htaꞈ ha kʼaˉ ve hkʼaw haꞈ yuˬ piˇ ve yoˬ. Yawˇ naˬ ve gawˬ ve chaw htaꞈ gu na˗e piˇ leh bon tanˬ maˍ piˇ ve yoˬ. Yeˍsuˆ teˇ nyi mvuhˇ hkʼa hpeuꞈ Gʼuiˬ sha ve mvuhˇ miˬ awˬ lawn maˍ piˇ ve yoˬ. Mvuhˇ hpeuꞈ la htaˇ tcuh yaˇ hui Yeˍsuˆ htaꞈ kʼoˆ piˇ ve, ‘chaw awˬ moˍ lonˉ caˇ tuˬ ca vuiˬ˗e tuˬ hpehˇ piˇ˗oˆ.’

Yeˍsuˆ hkʼawꞈ piˇ ve, ‘yawˇ hui kʼaiˬ tuˬ maˇ loˬ. Nawˬ hui yawˇ hui htaꞈ caˍ piˇ˗oˆ.’ Tcuh yaˇ hui kʼawꞈ na piˇ ve, ‘hkaoˍ monˇ vuiˬ laˬ leh yawˇ hui htaꞈ caˍ piˇ cawˇ˗aw laˇ?’ Tcuh yaˇ Hpiˇliˆpuˆ kʼawꞈ kʼoˆ ve, ‘yawˇ hui htaꞈ hkaoˍ monˇ vuiˬ caˍ piˇ tuˬ ngaˬ hui hpu maˇ lawꞈ.’

Yeˍsuˆ kʼawꞈ na piˇ ve, ‘ngaˬ hui caˇ tuˬ hkʼaˬ ma cawˬ le?’ Anˍdrehˍ hkʼawꞈ piˇ ve, ‘hkaoˍ monˇ ngaˇ diˍ leh ngaˇ nyiˇ hkeh ceh tiˉ cawˬ ve yoˬ. Teˇ gʼaˇ le le htaꞈ caˍ piˇ maˇ lawꞈ.’ Yeˍsuˆ kʼoˆ ve, ‘hkaoˍ monˇ leh ngaˇ ngaˬ geh yuˬ veu laˇ˗oˆ.’ Oˇ htaˇ chaw awˬ moˍ lonˉ teˇ hpaˍ htaꞈ mvuhꞈ hkʼoˆ awˬ moˍ awˬ moˍ te mui tcuh ve yoˬ. Teˇ moˍ kʼo, 50 gʼaˇ, teˇ moˍ kʼo, 100 gʼaˇ cawˬ ve yoˬ. Yeˍsuˆ hkaoˍ monˇ leh ngaˇ htaꞈ yuˬ peuˬ hkʼawꞈ nawˉ, mvuhˇ naw ma lo chiˇ nyi leh bon htaꞈ chiˇ mvuh ve yoˬ. Peuˬ leh hkaoˍ monˇ tcuh yaˇ hui htaꞈ piˇ leh mvuhˇ miˬ yaˇ htaꞈ pehˬ piˇ tcuh ve yoˬ. Hawˉ hkʼaˆ ceh tiˉ 5,000 gʼaˇ hkʼe cawˬ leh yaˇ miˇ yaˇ ehˉ teˇ gʼaˇ le le hkʼa bvuhˆ gʼa caˇ ve yoˬ. Oˇ ve hkʼawꞈ nawˉ, caˇ leuˉ taˍ ve kʼawꞈ gʼawˆ leh  12 hkʼawˍ lawˇ hkʼa biˇ gʼa ve yoˬ. Yeˍsuˆ anˇ tuˬ te ve anˇ jaˇ ve maˇ heˆ laˇ?

Yeˍsuˆ te ve htaꞈ mvuhˇ miˬ yaˇ anˇ jaˇ leh yawˇ htaꞈ hkunˉ hawˉ hkanˇ te tcuh gaˇ ve yoˬ. Yaꞈ hkʼaˇ, Yaˬhoˉvaˬ Yeˍsuˆ htaꞈ hkunˉ hawˉ hkanˇ te tcuh tuˬ awˬ yanˇ maˇ gaˬ sheˍ ve htaꞈ yawˇ shiˍ ve yoˬ. Yawˇ mvuhˇ miˬ yaˇ htaꞈ kʼoꞈ˗e tcuh leh tcuh yaˇ hui htaꞈ Gaˍliˍlehˇ gʼuiˬ po coˇ paˉ lo kʼai tcuh ve yoˬ. Tcuh yaˇ hui htaꞈ haw loꞈ kʼoˍ ciˇ kʼai tcuh leh Yeˍsuˆ teˇ gʼaˇ tiˉ hkʼaw pui hkʼoˆ lo taˆ˗e ve yoˬ. Aˬ htoꞈ ma pa taw le? Awˬ lawn kʼo, yawˇ Awˬ pa geh bon lawˬ gaˇ ve yoˬ. Yeˍsuˆ kanˉ hkʼaˬ ma cawˬ ve htawˇ, yawˇ Awˬ pa geh bon lawˬ tuˬ awˬ yanˇ fuiˍ teh taˍ ve yoˬ.