Yoˇhanˬ hkʼaˬ htaˆ kaꞈ kʼoˆ ve, ‘ngaˬ aꞈ kehˉ uiˍ ve teˇ gʼaˇ laˬ chehˇ ve yoˬ.’ Yeˍsuˆ a shaꞈ 30 hkʼawꞈ htaˇ, yawˇ Gaˍliˍlehˇ mvuhˇ miˬ lo tawˆ la leh Yawˇdanˍ gʼuiˬ ma lo kʼai ve yoˬ. Yoˇhanˬ oˇ kaˬ lo chehˇ ve chaw yaˇ htaꞈ Baˆtiˆsaˬ piˇ˗a te htaˇ, Yeˍsuˆ Yoˇhanˬ geh Baˆtiˆsaˬ peꞈ laˇ tuˬ lawˬ ve yoˬ. Yaꞈ hkʼaˇ yawˇ kʼoˆ ve, ‘nawˬ ngaˬ geh Baˆtiˆsaˬ hkanˍ yuˬ maˇ hpehꞈ. Ngaˬ nawˬ geh Baˆtiˆsaˬ hkanˍ yuˬ cawˇ ve yoˬ.’ Yeˍsuˆ Yoˇhanˬ htaꞈ kʼoˆ piˇ ve, ‘ngaˬ htaꞈ Baˆtiˆsaˬ hkanˍ yuˬ tcuh laˇ˗oˆ. Yaˬhoˉvaˬ kʼoˆ taˍ ve hkʼe biˇ la tuˬ yoˬ.’ Hkʼe te leh Yawˇ huiˉ maˬ Yawˇdanˍ gʼuiˬ ma hkʼaw loꞈ˗e ve yoˬ. Leh Yoˇhanˬ Yeˍsuˆ htaꞈ iˉ kaˆ hkʼaw tuˬ keu piˇ leh Baˆtiˆsaˬ piˇ ve yoˬ.

Yeˍsuˆ iˉ kaˆ hkʼaw tawˆ la peuˬ hkʼawꞈ nawˉ, yawˇ bon lawˬ ve yoˬ. Oˇ ve teˇ yanˇ mvuhˇ naw ma hpaw leh, Gʼuiˬ sha ve Awˬ ha hpu lehˬ, aˉ pui kʼaˍ hkʼe Yeˍsuˆ awˬ hkʼoˆ lo yaꞈ la ve yoˬ. Mvuhˇ naw ma hkʼoˆ lo Yaˬhoˉvaˬ ve awˬ hkawˇ bvuhˬ tawˆ la leh kʼoˆ ve, “nawˬ lehˬ ngaˬ haꞈ jaˇ ve ngaˬ ve Yaˇ hpu yoˬ. Nawˬ htaꞈ ngaˬ nyi hkʼaˇ suh jaˇ.”

Yeˍsuˆ Yaˬhoˉvaˬ ve awˬ ha hpu gʼa peuˬ hkʼawꞈ nawˉ, yawˇ lehˬ Hkriꞈ maˇ heˆ leh Meˍsiˉyaꞈ hpehꞈ ve yoˬ. Chi teˇ hkui Yaˬhoˉvaˬ yawˇ htaꞈ miˬ guiˬ hkʼoˆ peu laˇ ve kanˉ tanˬ te ve yoˬ.

Baˆtiˆsaˬ hkanˍ peuˬ hkʼawꞈ nawˉ Yeˍsuˆ heh puiˉ hkʼaw laꞈ haˉ loꞈ˗e leh oˇ kaˬ lo 40 nyi chehˇ peuˬ hkʼaw nawˉ Yoˇhanˬ geh kʼawꞈ kʼai ve yoˬ. Yeˍsuˆ laˬ chehˇ ve htaꞈ Yoˇhanˬ gʼa mawˬ leh kʼoˆ ve, ‘yawˇ Gʼuiˬ sha ve yawˬ ehˉ hpehꞈ leh miˬ guiˬ yaˇ ve venˇ baˆ htaꞈ yuˬ baˬ shehˍ hpaˇ hpehꞈ ve yoˬ.’ Yoˇhanˬ kʼoˆ ve tawˇ hkawˇ htaꞈ mvuhˇ miˬ yaˇ na gʼa leh Yeˍsuˆ lehˬ Meˍsiˉyaꞈ hpehꞈ ve yoˬ. Yeˍsuˆ heh puiˉ hkʼaw chehˇ htaˇ, aˬ htoꞈ ma hpehꞈ la ve shiˍ˗aˬ laˇ? Awˬ gʼuˇ suhˍ teˇ lawn hkʼaw teˇ geh nyi sheˍ.