Yeˍsuˆ bon maˍ ve aˬ laˬ hkʼe 1 hkʼawꞈ hpaˆ gaˬ leh yawˇ a yeˇ uiˍ jaˇ ve awˬ lawn gʼa dawˇ cheˆ ve yoˬ. Yawˇ geh kanˉ te tuˬ a shu htaꞈ leuˆ tuˬ ve le, leh Hkriꞈ yaˇ awˬ moˍ htaꞈ nyi haꞈ shaˉ tuˬ a shu htaꞈ maˍ piˇ ve le? Yeˍsuˆ dawˇ cheˆ ve htaꞈ Yaˬhoˉvaˬ ga laˇ tcuh ve yoˬ. Yawˇ teˇ gʼaˇ ceh tiˉ hkʼaw pui hkʼoˆ lo taˆ˗e leh teˇ haˉ mvuhˇ hkʼa htiˇ bon lawˬ ve yoˬ. Mvuhˇ shawˉ gaˬ leh Yeˍsuˆ awˬ laꞈ gʼawˇ htaꞈ kuˬ piˇ leh tcuh yaˇ te tuˬ 12 gʼaˇ htaꞈ leuˆ yuˬ ve yoˬ. Tcuh yaˇ hkʼaˬ ve teˇ gʼa ve awˬ meh htaꞈ nawˬ lawnˇ gʼa ve le? Yawˇ hui ve awˬ meh lehˬ Peˍtruˆ, Anˍdrehˍ, Yaˍkoˆ, Yoˇhanˬ, Hpiˇliˇpuˆ, Baˍhtawˇlaˍmehˇ, Htoˉmaꞈ, Maꞈhtehˍ, Aˍlaˍhpehˇ ve yaˇ paˍ Yaˍkoˆ, Htaˍdehˇ, Siˉmonˍ leh Yuˇdaꞈ iˉsaˍkaˍriˍoˆ hui yoˬ.

Tcuh yaˇ 12 gʼaˇ Yeˍsuˆ hkʼa kʼai kuiˬ teˇ kaˬ le le lo kʼai ve yoˬ. Yeˍsuˆ yawˇ hui htaꞈ hkʼa dehꞈ maˍ piˇ peuˬ hkʼawꞈ nawˉ, yawˇ hui htaꞈ bon maˍ˗e tcuh ve yoˬ. Yaˬhoˉvaˬ yawˇ hui htaꞈ neˇ gʼaꞈ kʼoˬ gʼa tuˬ leh naˬ ve chaw htaꞈ gu na˗e piˇ gʼa tuˬ kanˇ paˆ piˇ ve yoˬ.

Yeˍsuˆ tcuh yaˇ 12 gʼaˇ htaꞈ yonˍ gʼa leh yawˇ hui htaꞈ awˬ chawˇ tehꞈ kuˬ ve yoˬ. Hpaˍriˍsehˇ teˇ hpaˍ lehˬ Yeˍsuˆ ve tcuh yaˇ hui htaꞈ liꞈ maˇ gʼa henˇ jaw ve chaw tehꞈ shawˍ ve yoˬ. Yaꞈ hkʼaˇ, Yeˍsuˆ yawˇ hui htaꞈ bon  maˍ tuˬ maˍ piˇ ve yoˬ. A yeˇ uiˍ jaˇ ve lehˬ, yawˇ hui Yeˍsuˆ maˇ suh sheˍ htaˇ leh kʼawꞈ teꞈ tu la peuˬ hkʼawꞈ nawˉ htaˇ kaꞈ Yeˍsuˆ geh chehˇ ve yoˬ. Tcuh yaˇ maˇ˗awˍ ve Yeˍsuˆ hkʼa shuˍ Gaˍliˍlehˇ chaw hpehꞈ ve yoˬ. Leh tcuh yaˇ teˇ hpaˍ kʼo, awˬ miˇ ma heuˆ˗oˬ.

Tcuh yaˇ hui maˇ biˇ ve chaw hpehꞈ leh te yaꞈ ve yoˬ. Teˇ pawˆ pawˆ kʼo, maˇ dawˇ nyi leh tawˇ yaw ve yoˬ. Dawˇ cheˆ ve maˇ cawˇ leh yeunˇ hkanˍ ve kaꞈ maˇ cawˬ. Teˇ pawˆ pawˆ kʼo, hkʼaˬ ve teˇ gʼaˇ shu aꞈ kehˉ uiˍ ve le tehꞈ deˇ daꞈ ve yoˬ. Yaꞈ hkʼaˇ, yawˇ hui daꞈ ve chaw hpehꞈ leh Yaˬhoˉvaˬ htaꞈ haꞈ ve yoˬ. Yeˍsuˆ suh peuˬ hkʼawꞈ nawˉ, yawˇ hui Hkriꞈ yaˇ awˬ moˍ htaꞈ nyi haꞈ shaˉ tuˬ awˉ lawˉ teˇ moˍ hpehꞈ ve yoˬ.