Teˇ hkʼawꞈ le le Niˆsanˍ Ha pa 14 nyi htaˇ, Yuˇdaꞈ chaw Paˍsaˍhkaˍ pawehˇ te ve yoˬ. Pawehˇ chi ve lehˬ Yaˬhoˉvaˬ yawˇ hui htaꞈ Eˇjiˇtuꞈ mvuhˇ miˬ hkʼaw shu ceˬ te chehˇ ve htaꞈ shiˍ tawˆ la leh, Gʼuiˬ sha ka tiꞈ te taˍ ve mvuhˇ miˬ hkʼaw shiˍ loꞈ˗e ve htaꞈ dawˇ nawˇ tuˬ te piˇ ve yoˬ. Peˍteˍkoˆteˍ 33 hkʼawꞈ C.E. htaˇ, Yeˍsuˆ leh yawˇ ve tcuh yaˇ Yeˍruˆsaˍlehnˍ venˇ lo yehˬ teˇ yehˬ hkʼaw awˬ na teˇ htaiꞈ Paˍsaˍhkaˍ pawehˇ caˇ ve yoˬ. Pawehˇ chi te peuˬ hkʼawꞈ nawˉ Yeˍsuˆ kʼoˆ ve, ‘nawˬ hui awˬ hkʼaw lo teˇ gʼaˇ ngaˬ htaꞈ hpfuhˆ tuˬ yoˬ.’ Yawˇ hui dawˇ haˍ jaˇ leh Yeˍsuˆ htaꞈ na piˇ ve, ‘a shu teˇ gʼaˇ le?’ Yeˍsuˆ yawˇ hui htaꞈ hkʼawꞈ piˇ ve, ‘ngaˬ hkaoˍ monˇ yuˬ piˇ ve teˇ gʼaˇ yoˬ.’ Hkʼe te leh, yawˇ Yuˇdaꞈ Iˉsaˍkaˍriˍoˆ htaꞈ hkaoˍ monˇ piˇ ve yoˬ. Leh Yuˇdaꞈ bawehˇ hkʼaw laꞈ haˉ tawˆ˗e ve yoˬ.

Yeˍsuˆ bon htaꞈ chiˇ mvuh peuˬ hkʼawꞈ nawˉ, hkaoˍ monˇ hkʼehꞈ leh yawˇ tcuh yaˇ hui htaꞈ piˇ leh kʼoˆ ve, ‘caˇ loˬ. Chi leh nawˬ hui awˬ pon tanˇ piˇ ve ngaˬ ve awˬ to yoˬ.’ Yawˇ a pehˉ meuˇ gʼuiˬ yuˬ leh bon htaꞈ chiˇ mvuh peuˬ hkʼawꞈ nawˉ tcuh yaˇ hui htaꞈ piˇ leh kʼoˆ ve, ‘dawˬ loˬ. Chi lehˬ nawˬ hui gʼa ponˬ tuˬ awˬ pon tanˇ piˇ ve ngaˬ ve awˬ suhˍ yoˬ. Mvuhˇ naw ma hkʼoˆ lo nawˬ hui ngaˬ geh teˇ geh Jawˇmawˇ te tuˬ, ka tiꞈ te laˇ ve yoˬ. Hkʼe te leh, teˇ hkʼawꞈ le le ngaˬ htaꞈ dawˇ nawˇ tuˬ chi hkʼe te˗o.’ Chi beuꞈ teˇ co˗e htawˇ teˇ hkʼawꞈ le le Niˆsanˍ Ha pa 14 nyi htaˇ, Yeˍsuˆ ve awˬ laꞈ gʼawˇ teˇ gʼaˇ le le hpawnˬ daꞈ ve yoˬ. Hpawnˬ daꞈ ve chi lehˬ Yeˍsuˆ Hkriꞈ ve mvuhˇ haˉ awˍ caˇ ve htaꞈ kʼoˆ gaˇ ve yoˬ.

 Paˍsaˍhkaˍ pawehˇ te peuˬ hkʼawꞈ nawˉ, tcuh yaˇ hui awˬ hkʼaw lo hkʼaˬ ve teˇ gʼaˇ shu aꞈ kehˉ uiˍ tuˬ le tehꞈ teˇ gʼaˇ leh teˇ gʼaˇ gʼawˬ daꞈ ve yoˬ. Yeˍsuˆ yawˇ hui htaꞈ kʼoˆ piˇ ve, ‘shu aꞈ kehˉ uiˍ ve teˇ gʼaˇ lehˬ, shu aꞈ kehˉ i ve teˇ gʼaˇ hkʼe te leh shu hkʼe taw a yeˇ maˇ uiˍ ve tehꞈ gʼa shawˍ ve yoˬ.’

‘Nawˬ hui lehˬ ngaˬ ve awˬ chawˇ hpehꞈ ve yoˬ. Mvuhˇ naw ma hkʼoˆ chehˇ ve ngaˬ ve Awˬ pa nawˬ hui htaꞈ shiˍ tcuh gaˇ ve teˇ lawn le le ngaˬ hto laˇ peuˬ. Ngaˬ Awˬ pa geh kʼoꞈ˗e tuˬ yoˬ. Yaꞈ hkʼaˇ, nawˬ hui miˬ guiˬ hkʼoˆ lo gʼa chehˇ sheˍ. Leh nawˬ hui haꞈ daꞈ ve kʼo, nawˬ hui ngaˬ ve awˬ laꞈ gʼawˇ hpehꞈ ve htaꞈ shu gʼa shiˍ tuˬ yoˬ. Ngaˬ nawˬ hui htaꞈ haꞈ ve hkʼe nawˬ hui htawˇ gʼa haꞈ daꞈ ve yoˬ.’

Awˬ leh meuˇ htaˇ, awˬ laꞈ gʼawˇ teˇ gʼaˇ le le htaꞈ Yaˬhoˉvaˬ haꞈ shaˉ piˇ tuˬ Yeˍsuˆ bon lawˬ ve yoˬ. Yaˬhoˉvaˬ ga piˇ leh Yeˍsuˆ ve awˬ laꞈ gʼawˇ cawˇ daꞈ hawˍ daꞈ leh kanˉ teˇ geh te gʼa tuˬ Yeˍsuˆ bon lawˬ ve yoˬ. Yeˍsuˆ Yaˬhoˉvaˬ ve awˬ meh daꞈ kehˬ leh yawˆ yan te piˇ tuˬ kaꞈ bon lawˬ ve yoˬ. Yeˍsuˆ leh tcuh yaˇ hui Yaˬhoˉvaˬ htaꞈ chiˇ mvuh peuˬ hkʼawꞈ nawˉ, awˬ baˬ hpawˇ lo tawˆ kʼai ve yoˬ. Oˇ ve teˇ yanˇ, shu Yeˍsuˆ htaꞈ hpeh yuˬ la paˇ neˇ ve yoˬ.