Yeˍsuˆ tcuh yaˇ hui geh yehˬ awˬ na teˇ htaiꞈ hkʼaw chehˇ htaˇ, yawˇ hui htaꞈ kʼoˆ piˇ ve, ‘yaꞈ puiˉ nawˬ hui ngaˬ htaꞈ baˬ taˉ laˇ tuˬ yoˬ.’ Peˍtruˆ kʼoˆ ve, ‘teˇ gʼaˇ le le nawˬ htaꞈ baˬ taˉ ve htawˇ, ngaˬ nawˬ htaꞈ maˇ baˬ taˉ!’ Yaꞈ hkʼaˇ, Yeˍsuˆ Peˍtruˆ htaꞈ kʼoˆ piˇ ve, “yaꞈ puiˉ gʼaˆ hpfuh maˇ bvuhˬ sheˍ htaˇ, nawˬ ngaˬ htaꞈ 3 pawˆ hkʼa gaˬ chiˇ baˬ tuˬ yoˬ.”

Maꞈ yaˇ Yeˍsuˆ htaꞈ Kaˍyaˍhpaˆ ve yehˬ lo shiˍ kʼai htaˇ, tcuh yaˇ maˇ˗awˍ ve hpaw˗e peuˬ. Yaꞈ hkʼaˇ, tcuh yaˇ 2 gʼaˇ lehˬ chaw awˬ moˍ lonˉ leh Yeˍsuˆ awˬ hkʼaˇ suh kʼai ve yoˬ. Teˇ gʼaˇ lehˬ Peˍtruˆ yoˬ. Yawˇ Kaˍyaˍhpaˆ ve yehˬ gʼuˇ suhˍ lo aˬ miˍ lehˬ chehˇ ve yoˬ. Awˬ ceˬ ma teˇ gʼaˇ Peˍtruˆ mehˆ hpfuhˇ htaꞈ mawˬ leh kʼoˆ ve, ‘ngaˬ nawˬ htaꞈ shiˍ ve! Nawˬ Yeˍsuˆ geh chehˇ jaw ve yoˬ!’

Peˍtruˆ gʼawˬ hkʼaˆ leh kʼoˆ ve, ‘nawˬ aˬ htoꞈ ma kʼoˆ ve le? Ngaˬ maˇ shiˍ!’ Hkʼe te leh yawˇ yaꞈ kʼaw loꞈ la kuiˬ hpawˇ lo juˇ kʼai ve yoˬ. Awˬ nu ve awˬ ceˬ ma teˇ gʼaˇ Peˍtruˆ htaꞈ mawˬ leh oˇ kaˬ chehˇ ve chaw htaꞈ kʼoˆ piˇ ve, ‘chi teˇ gʼaˇ Yeˍsuˆ geh chehˇ jaw ve yoˬ!’ Peˍtruˆ gʼawˬ hkʼaˆ leh kʼoˆ ve, ‘Yeˍsuˆ htaꞈ ngaˬ maˇ shiˍ!’ Leh hawˉ hkʼaˆ teˇ gʼaˇ kʼoˆ ve, ‘nawˬ Yeˍsuˆ ve awˬ moˍ hpehꞈ ve yoˬ! Nawˬ tawˇ yaw ve Gaˍliˍlehˇ chaw Yeˍsuˆ htaꞈ shuˍ ve yoˬ.’ Peˍtruˆ hkanˍ ve, ‘ngaˬ yawˇ htaꞈ maˇ shiˍ daꞈ!’

Oˇ teˇ hkui gʼaˆ hpfuh bvuhˬ la ve yoˬ. Yeˍsuˆ Peˍtruˆ htaꞈ chiˇ nyi leh yawˇ Yeˍsuˆ kʼoˆ ve tawˇ hkawˇ htaꞈ dawˇ nawˇ la leh yawˇ awˬ baˬ lo tawˆ kʼai leh gʼaˇ hteꞈ hawˬ ve yoˬ.

Oˇ ve teˇ haˉ Kaˍyaˍhpaˆ ve yehˬ lo Yeˍsuˆ ve awˬ lawn jehˬ daꞈ ve yoˬ. Yuˇdaꞈ chaw hui ve shaˉ nanˉ awˬ moˍ Yeˍsuˆ htaꞈ tiˇ pehˍ tuˬ dawˇ cheˆ˗oˬ ve yoˬ. Maˇ heˆ heˆ ve shaˉ hkiˆ ca leh yawˇ htaꞈ she pfuhˍ tuˬ te ve yoˬ. Yaꞈ hkʼaˇ, ca maˇ gʼa. Leh Kaˍyaˍhpaˆ Yeˍsuˆ htaꞈ hteˇ˗ehꞈ na piˇ ve, ‘nawˬ Gʼuiˬ sha ve Yaˇ hpehꞈ ve maˇ heˆ laˇ?’ Yeˍsuˆ kʼoˆ piˇ ve, “yoˬ.” Kaˍyaˍhpaˆ kʼoˆ ve, ‘ngaˬ hui aˬ htoꞈ ma shaˉ hkiˆ kʼawꞈ loˍ sheˍ le, yawˇ Gʼuiˬ sha htaꞈ maˇ shawˍ maˇ caˆ kʼoˆ ve yoˬ!’ Yuˇdaꞈ ve shaˉ nanˉ awˬ moˍ hkʼaw ve chaw sha hpawˇ cawˇ leh kʼoˆ ve, ‘hawˉ hkʼaˆ chi teˇ gʼaˇ suh keunˍ ve yoˬ.’ Yawˇ hui Yeˍsuˆ ve mehˆ hpfuhˇ htaꞈ hta pehˇ piˇ ve, ciˉ  gʼuiˇ hpeꞈ pfuhˍ piˇ ve, yawˇ ve mehˆ shiˍ htaꞈ beh leh chu˗iˬ pehˇ leh kʼoˆ ve, ‘nawˬ Gʼuiˬ sha ve tcuh kaˍ paˍ hpehꞈ ve kʼo, a shu te laˇ ve le hto laˇ sheꞈ!’

Mvuhˇ htiˇ la htaˇ yawˇ hui Yeˍsuˆ htaꞈ Yuˇdaꞈ chaw ve shaˉ nanˉ lo shiˍ kʼai leh kʼawꞈ na piˇ ve, ‘nawˬ Gʼuiˬ sha ve Yaˇ hpehꞈ ve maˇ heˆ laˇ?’ Yeˍsuˆ kʼoˆ ve, ‘ngaˬ nawˬ hui kʼoˆ ve hkʼe hpehꞈ ve yoˬ.’ Yawˇ hui Yeˍsuˆ Gʼuiˬ sha htaꞈ maˇ shawˍ maˇ caˆ kʼoˆ ve tehꞈ suhˉ jehˬ cheˆ piˇ leh yawˇ htaꞈ Roˉmaꞈ jawˇ mawˇ Poˍtiˆ Piˉlaꞈ geh shiˍ kʼai ve yoˬ. Hkʼaˬ hkʼe kʼawꞈ hpehꞈ la tuˬ le? Caˉ leh nyi sheˍ.