Paw hkuˇ lonˉ hui Yeˍsuˆ htaꞈ jawˇ mawˇ Piˉlaꞈ ve aˉ hkʼaw lo shiˍ kʼai ve yoˬ. Piˉlaꞈ Paw hkuˇ lonˉ hui htaꞈ na piˇ ve, ‘chi hpaˇ awˬ hkʼoˆ nawˬ hui aˬ htoꞈ ma venˇ baˆ taˍ kuiˬ cawˬ le?’ Yawˇ hui kʼoˆ ve, ‘yawˇ Jawˇmawˇ hpehꞈ ve tehꞈ kʼoˆ ve yoˬ.’ Piˉlaꞈ Yeˍsuˆ htaꞈ na piˇ ve, “nawˬ lehˬ Yuˇdaꞈ chaw hui ve Hkunˉ hawˉ hkanˇ yoˬ laˇ?” Yeˍsuˆ hkʼawꞈ piˇ ve, “ngaˬ hkunˉ hawˉ hkanˇ te kuiˬ lehˬ, chi miˬ guiˬ htaꞈ maˇ caˉ daꞈ.”

Piˉlaꞈ Yeˍsuˆ htaꞈ Gaˍliˍlehˇ mvuhˇ miˬ jawˇ mawˇ Heˍroˆ geh shiˍ kʼai tcuh leh aˬ htoꞈ ma yaꞈ kuiˬ cawˬ ve na nyi tcuh ve yoˬ. Yeˍsuˆ teꞈ chiˉ yaꞈ kuiˬ maˇ mawˬ leh Piˉlaꞈ geh kʼawꞈ kʼoꞈ˗e tcuh ve yoˬ. Piˉlaꞈ chaw awˬ moˍ lonˉ htaꞈ kʼoˆ piˇ ve, ‘ngaˬ leh Heˍroˆ chaw chi hpaˇ teꞈ chiˉ te yaꞈ kuiˬ maˇ mawˬ leh hpehˇ piˇ tuˬ yoˬ.’ Yawˇ hui kʼoˆ ve, ‘yawˇ htaꞈ tiˇ pehˍ loˬ, tiˇ pehˍ loˬ!’ Maꞈ yaˇ aˉ chuˇ yuˬ leh shi uˉ tcuhˍ hkʼe te leh, Yeˍsuˆ htaꞈ hkʼawˆ piˇ ve ‘Yuˇdaꞈ ve hkunˉ hawˉ hkanˇ chehˇ sha chehˇ˗aw laˇ?’ kʼoˆ guiˇ gʼuiˬ guiˇ piˇ ve yoˬ. Piˉlaꞈ chaw awˬ moˍ lonˉ htaꞈ kʼoˆ piˇ ve, ‘yawˇ teꞈ chiˉ yaꞈ kuiˬ maˇ cawˬ ve htaꞈ ngaˬ mawˬ ve yoˬ.’ Yawˇ hui kuˬ leh kʼoˆ ve, ‘suhˆ hkuiˉ daw hkʼoˆ lo htaꞈ pehˍ loˬ!’ Leh yawˇ hui Yeˍsuˆ htaꞈ tiˇ pehˍ tuˬ piˉlaꞈ a hkaw˗anˬ piˇ ve yoˬ.

Gawˇlaˍgawˇtaˆ meh ve teˇ kaˬ lo maꞈ yaˇ Yeˍsuˆ htaꞈ shiˍ kʼai ve yoˬ. Leh yawˇ htaꞈ suhˆ hkuiˉ daw hkʼoˆ htaꞈ keu piˇ ve yoˬ. Yeˍsuˆ bon lawˬ leh kʼoˆ ve, ‘A pa˗oˬ, yawˇ hui htaꞈ venˇ baˆ hpehˇ piˇ˗oˆ. Yawˇ hui aˬ htoꞈ ma te chehˇ ve htaꞈ maˇ shiˍ ve pa taw yoˬ.’ Mvuhˇ miˬ yaˇ Yeˍsuˆ htaꞈ kʼoˆ piˇ ve, ‘nawˬ Gʼuiˬ sha ve yaˇ hpehꞈ ve kʼo, nawˬ awˬ to htaꞈ suhˆ hkuiˉ daw hkʼoˆ yaꞈ la tcuh˗oˬ! tehꞈ kʼoˆ guiˇ gʼuiˬ guiˇ piˇ ve yoˬ.’

Suhˆ hkuiˉ daw hkʼoˆ Yeˍsuˆ awˬ paˇ lo ve chaw haiˬ teˇ gʼaˇ kʼoˆ ve, “nawˬ hkunˉ hawˉ hkanˇ te la ve teˇ yanˇ, ngaˬ htaꞈ dawˇ nawˇ laˇ˗oˆ.” Yeˍsuˆ yawˇ htaꞈ ka tiꞈ te piˇ ve, “nawˬ ngaˬ geh teˇ geh Paˍraˍdiˇsuˆ awˬ hkʼaw lo gʼa chehˇ tuˬ yoˬ.” Mvuhˇ lawꞈ kʼaw tcuhˆ htaˇ kaꞈ tanˬ leh 3 naˍ riˍ hkʼa gaˬ, miˬ guiˬ hkʼa peu˗eˬ naˆ hoꞈ lehˍ hpehꞈ sheˬ ve yoˬ. Awˬ laꞈ gʼawˇ teˇ hpaˍ Yeˍsuˆ awˬ paˇ lo huˉ taˍ ve yoˬ. Yeˍsuˆ ve awˬ e Maˍriˆ kaꞈ oˇ kaˬ lo chehˇ taˍ ve yoˬ. Yeˍsuˆ lehˬ Yoˇhanˬ Maˍriˆ htaꞈ yawˇ ve awˬ e hkʼe nyi haꞈ shaˉ piˇ tuˬ lawˬ ve yoˬ.

Awˬ leh meuˇ htaˇ Yeˍsuˆ kʼoˆ ve, ‘ngaˬ kanˉ te peuˬ.’ Leh yawˇ oˉ kʼoˍ kʼawꞈ lehˍ te sheˬ leh shaˉ cheˆ ve yoˬ. Oˇ teˇ hkui miˬ hiˆ hehnˇ jaˇ. Bon yehˬ lonˉ hkʼaw daꞈ kehˬ ve leh daꞈ kehˬ jaˇ ve bawehˇ awˬ kaˍ lo kaˬ taˍ ve hpaꞈ kaˍ awˬ na te leh awˬ  hawˉ lo hkʼa gaˬ 2 hkoˇ te tzuhꞈ sheˬ ve yoˬ. Maꞈ yaˇ teˇ gʼaˇ kʼoˆ ve, ‘chaw chi teˇ gʼaˇ lehˬ awˬ tehˬ awˬ na Gʼuiˬ sha ve yaˇ hpehꞈ ve yoˬ.’