Yeˍsuˆ leh yawˇ ve tcuh yaˇ hui Keˍdronˍ lawˬ kʼaˉ htaꞈ hpanˍ kʼai leh Shaˍlonˍ hkʼaw lo kʼai ve yoˬ. Oˇ ve teˇ haˉ shehˍ kʼaw hkui hpaˆ gaˬ˗oˬ ve htawˇ, ha pa ba jaˇ. Geˍseˍmaˍniˆ hko hkʼaw gaˬ la htaˇ, Yeˍsuˆ tcuh yaˇ hui htaꞈ kʼoˆ piˇ ve, ‘nawˬ hui choˬ kaˬ lo chehˇ leh hkʼa dehꞈ shaw taˍ˗oꞈ.’ Yeˍsuˆ yawˇ hui awˬ gʼuˇ suhˍ kʼai leh dawˇ haˍ jaˇ ve pa taw, yawˇ hkui tcuhˉ teh leh Yaˬhoˉvaˬ geh bon lawˬ ve hkʼaw kʼoˆ ve, ‘A pa˗oˬ, nawˬ ve a loˍ cawˇ ve hkʼe hpehꞈ la piˇ tcuh˗oˆ.’ Yaˬhoˉvaˬ mvuhˇ naw ma tcuh yaˇ htaꞈ peu piˇ leh Yeˍsuˆ htaꞈ awˬ gʼaˇ piˇ tcuh ve yoˬ. Yeˍsuˆ tcuh yaˇ hui geh kʼawꞈ la htaˇ, yawˇ hui zuhꞈ muiˉ kʼa chehˇ ve htaꞈ mawˬ ve yoˬ. Yawˇ kʼoˆ ve, ‘tu˗o! Chi nawˬ hui zuhꞈ muiˉ kʼa chehˇ ve awˬ yanˇ maˇ heˆ! Canˇ paˍ ngaˬ htaꞈ ca hpeh la tuˬ laˬ chehˇ ve yoˬ.’

Maˇ maw Yuˇdaꞈ kaꞈ chaw awˬ moˍ lonˉ teˇ hpaˍ geh aˉ htaw leh suhˆ taˬ yuˬ veu laˇ ve geh laˬ ve yoˬ. Yeˍsuˆ hko chi ve hkʼaw lo chehˇ taˍ ve htaꞈ Yuˇdaꞈ shiˍ ve yoˬ. Awˬ lawn kʼo, yawˇ tcuh yaˇ geh oˇ kaˬ lo laiˉ pawˆ laˬ jaw ve yoˬ. Yuˇdaꞈ maꞈ yaˇ htaꞈ kʼoˆ piˇ ve, Yeˍsuˆ htaꞈ yawˇ beˆ maˍ laˇ tuˬ yoˬ. Yawˇ Yeˍsuˆ geh juˇ kʼai leh kʼoˆ ve, ‘Saˍlaꞈ˗oˬ, chehˇ sha chehˇ˗aw laˇ?’ Leh yawˇ Yeˍsuˆ htaꞈ boˆ nu piˇ ve yoˬ. Yeˍsuˆ kʼawꞈ kʼoˆ ve, ‘Yuˇdaꞈ˗oˬ, nawˬ ngaˬ htaꞈ hpfuhˆ ve lehˬ boˆ nu ve awˬ heˆ te ve laˇ?’

Yeˍsuˆ awˬ gʼuˇ suhˍ lo tawˆ la leh yawˇ htaꞈ ca hpeh la ve chaw htaꞈ na piˇ ve, ‘a shu htaꞈ ca la ve le?’ Yawˇ hui kʼoˆ ve, ‘Naˍzaˍrehˆ chaw Yeˍsuˆ htaꞈ ca la ve yoˬ.’ Yeˍsuˆ kʼoˆ ve, “ngaˬ lehˬ yawˇ yoˬ.” Yawˇ hui kawˆ jaˇ leh hkʼawꞈ nawˉ lo htunˍ kʼoꞈ˗e ve yoˬ. Yeˍsuˆ na piˇ ve, “a shu htaꞈ ca ve le?” Yawˇ hui kʼawꞈ kʼoˆ ve, “Naˍzaˍrehˆ chaw Yeˍsuˆ htaꞈ ca la ve yoˬ.” Yeˍsuˆ kʼawꞈ kʼoˆ ve, ‘ngaˬ lehˬ yawˇ yoˬ. Ngaˬ ve awˬ laꞈ gʼawˇ hui htaꞈ hpehˇ piˆ˗oˆ.’

Oˇ htaˇ Peˍtruˆ aˉ htaw gʼawˬ tawˆ leh paw hkuˇ lonˉ ve awˬ ceˬ paˍ Maˍlaˍhkuˆ ve naˍ paw htaꞈ chaw cheˆ piˇ ve yoˬ. Yaꞈ hkʼaˇ, Yeˍsuˆ Maˍlaˍhkuˆ ve naˍ paw htaꞈ htawˇ leh na˗e ve yoˬ. Yeˍsuˆ Peˍtruˆ htaꞈ kʼoˆ piˇ ve, ‘aˉ htaw awˬ hpui hkʼaw kʼawꞈ keu˗o. Aˉ htaw yehˇ ve chaw lehˬ aˉ htaw htaꞈ pa taw gʼa suh tuˬ  yoˬ.’ Maꞈ yaˇ hui lehˬ Yeˍsuˆ ve laꞈ sheh htaꞈ hpeh tiˍ taˍ ve yoˬ. Hkʼe te leh, tcuh yaˇ teˇ gʼaˇ le le hpaw˗e ve yoˬ. Yeˍsuˆ htaꞈ Paw hkuˇ lonˉ Aˍnaˆ geh shiˍ kʼai ve yoˬ. Aˍnaˆ Yeˍsuˆ htaꞈ na piˇ peuˬ hkʼawꞈ nawˉ, paw hkuˇ lonˉ Kaˍyaˍhpaˆ yehˬ lo shiˍ kʼai ve yoˬ. Tcuh yaˇ hui htaꞈ aˬ htoꞈ ma hpehꞈ la ve le?