Yeˍsuˆ suh peuˬ hkʼawꞈ nawˉ Yoˇsehꞈ meh ve paw sha paˍ teˇ gʼaˇ, Piˉlaꞈ geh suhˆ hkuiˉ hkʼoˆ lo ve Yeˍsuˆ ve awˬ to htaꞈ lawˬ ve yoˬ. Yoˇsehꞈ Yeˍsuˆ ve awˬ to htaꞈ hpaˍ hpu yuˬ htiˆ leh sha hawnˉ kaꞈ keu leh haˉ pui htawˆ taˍ ve tuˍ hpfuh awˬ hkʼaw lo ca keu taˍ ve yoˬ. Tuˍ hpfuh awˬ hkʼoˇ meuˇ lo haˉ pui hpfuhˆ tsuhˇ taˉ ve yoˬ. Hkʼe te leh, paw hkuˇ lonˉ hui Piˉlaꞈ htaꞈ kʼoˆ piˇ ve, ‘Yeˍsuˆ ve awˬ to awˬ laꞈ gʼawˇ hui hkʼawˇ yuˬ leh mvuhˇ miˬ yaˇ htaꞈ Yeˍsuˆ kʼawꞈ teꞈ tu la peuˬ tehꞈ kʼoˆ piˇ la ve htaꞈ ngaˬ hui kʼawˆ ve yoˬ.’ Piˉlaꞈ kʼoˆ ve, ‘haˉ pui awˬ hkʼoˇ meuˇ lo hkʼa dehꞈ hoˆ taˍ leh chaw htaꞈ shaw tcuh taˍ˗oꞈ.’

3 nyi peuˬ hkʼawꞈ nawˉ, mvuhˇ shawˉ teˇ naꞈ yaˇ miˇ teˇ hpaˍ tuˍ hpfuh lo ca nyi leh tuˍ hpfuh awˬ hkʼoˇ meuˇ lo ve haˉ pui hpfuhˆ baˬ laˇ ve htaꞈ gʼa mawˬ ve yoˬ. Tuˍ hpfuh lo gaˬ la htaˇ, mvuhˇ naw ma tcuh yaˇ teˇ gʼaˇ yawˇ hui htaꞈ kʼoˆ piˇ ve, ‘taˇ kawˆ. Yeˍsuˆ kʼawꞈ teꞈ tu la peuˬ. Yawˇ ve awˬ laꞈ gʼawˇ hui htaꞈ Gaˍliˍlehˇ mvuhˇ miˬ lo yawˇ htaꞈ ca mawˬ daꞈ la tuˬ ca hto piˇ˗oˆ.’

Oˇ ve teˇ yanˇ Maˍriˆ maˍgaˍdaˍlaˆ, Peˍtruˆ leh Yoˇhanˬ geh haˆ kʼai leh kʼoˆ piˇ ve, ‘Yeˍsuˆ ve awˬ to htaꞈ shu yuˬ kʼai˗oˬ law!’ Peˍtruˆ leh Yoˇhanˬ tuˍ hpfuh lo gʼuiˇ kʼai ve yoˬ. Yaꞈ hkʼaˇ, Yeˍsuˆ ve awˬ to htaꞈ maˇ mawˬ leh yawˇ hui aˉ hkʼaw kʼoꞈ˗e ve yoˬ.

Maˍriˆ tuˍ hpfuh lo kʼawꞈ laˬ htaˇ, mvuhˇ naw ma tcuh yaˇ 2 gʼaˇ htaꞈ mawˬ ve yoˬ. Yawˇ mvuhˇ naw ma tcuh yaˇ htaꞈ kʼoˆ piˇ ve, ‘ngaˬ ve Jawˇmawˇ htaꞈ yawˇ hui hkʼaˬ kaˬ lo yuˬ kʼai ve naˍ maˇ shiˍ.’ Maˍriˆ hawˉ hkʼaˆ teˇ gʼaˇ htaꞈ mawˬ leh hko nyi haꞈ shaˉ paˍ tehꞈ dawˇ ve yoˬ. Maˍriˆ yawˇ htaꞈ kʼoˆ piˇ ve, ‘nawˬ Yeˍsuˆ htaꞈ hkʼaˬ kaˬ lo teh taˍ ve ngaˬ htaꞈ kʼoˆ laˇ˗oˆ’. Yaꞈ hkʼaˇ, yawˇ ‘Maˍriˆ˗oˬ!’ tehꞈ kʼoˆ htaˇ, Maˍriˆ kaꞈ Yeˍsuˆ hpehꞈ ve htaꞈ laꞈ haˉ shiˍ la ve yoˬ. Maˍriˆ “Saˍlaꞈ˗oˬ!” tehꞈ kʼoˆ leh yawˇ htaꞈ ca kuˉ˗e ve yoˬ. Yeˍsuˆ yawˇ htaꞈ kʼoˆ piˇ ve, ‘nawˬ ngaˬ htaꞈ gʼa mawˬ peuˬ tehꞈ ngaˬ ve awˬ viˉ awˬ nyi htaꞈ ca hto piˇ˗oˆ.’ Maˍriˆ Yeˍsuˆ htaꞈ gʼa mawˬ peuˬ tehꞈ awˬ laꞈ gʼawˇ hui htaꞈ kʼoˆ piˇ ve yoˬ.

Oˇ ve teˇ nyi Yeˍsuˆ ve awˬ laꞈ gʼawˇ 2 gʼaˇ Yeˍruˆsaˍlehnˍ venˇ te leh Eˇmawꞈ hkʼaˆ lo kʼai chehˇ htaˇ, hawˉ hkʼaˆ teˇ gʼaˇ, nawˬ hui aˬ htoꞈ ma awˬ lawn yaw daꞈ ve le? tehꞈ na piˇ ve yoˬ. Yawˇ hui yawˇ htaꞈ hkʼawꞈ piˇ ve, ‘nawˬ teꞈ chiˉ awˬ lawn maˇ gʼa kaˇ ve laˇ? Paw hkuˇ lonˉ hui Yeˍsuˆ htaꞈ tiˇ pehˍ ve 3 nyi gaˬ˗oˬ. Leh yaꞈ nyi yaˇ miˇ teˇ hpaˍ kʼoˆ ve, Yeˍsuˆ a shaꞈ teꞈ chehˇ sheˍ!’ Hawˉ hkʼaˆ oˇ ve teˇ gʼaˇ na piˇ ve, ‘nawˬ hui tcuh kaˍ paˍ ve tawˇ hkawˇ htaꞈ maˇ yonˍ ve laˇ? Yawˇ hui kʼoˆ  ve, Hkriꞈ lehˬ suh kuiˬ lo kʼawꞈ teꞈ tu la tuˬ yoˬ.’ Leh yawˇ Liꞈ hpu hkʼaw ve awˬ lawn awˬ laꞈ gʼawˇ 2 gʼaˇ htaꞈ kʼoˆ maˍ piˇ ve yoˬ. Eˇmawꞈ hkʼaˆ lo gaˬ la htaˇ, hawˉ hkʼaˆ chi teˇ gʼaˇ yawˇ hui geh haˉ tuˬ jehˬ piˇ ve yoˬ. Mvuhˇ hpeuꞈ awˍ maˇ caˇ sheꞈ htaˇ, hawˉ hkʼaˆ chi teˇ gʼaˇ hkaoˍ monˇ htaꞈ yuˬ leh bon lawˬ ve yoˬ. Awˬ laꞈ gʼawˇ chi 2 gʼaˇ yawˇ Yeˍsuˆ hpehꞈ ve tehꞈ shiˍ la htaˇ, yawˇ laꞈ haˉ mehˉ kʼai ve yoˬ.

Awˬ laꞈ gʼawˇ chi 2 gʼaˇ Yeˍruˆsaˍlehnˍ venˇ lo haˆ kʼawꞈ˗e leh, aˬ htoꞈ ma hpehꞈ la ve tcuh yaˇ hui htaꞈ kʼoˆ piˇ ve yoˬ. Yawˇ hui yehˬ teˇ yehˬ hkʼaw teˇ geh chehˇ htaˇ, Yeˍsuˆ ve awˬ to teˇ gʼaˇ le le htaꞈ mawˬ tcuh ve yoˬ. Awˉ lawˉ htaˇ Yeˍsuˆ hpehꞈ ve tehꞈ yawˇ hui maˇ yonˍ. Yawˇ kʼoˆ ve, “ngaˬ ve laꞈ sheh leh ngaˬ ve awˬ to htaꞈ kaꞈ htawˇ nyi sheꞈ. Awˬ lawn kʼo, Yeˍsuˆ kʼawꞈ teꞈ tu la tuˬ ve awˬ lawn Liꞈ hpu hkʼaw bvuhꞈ taˍ ve yoˬ.”