Gaˍliˍlehˇ mvuhˇ miˬ lo Yeˍsuˆ awˬ laꞈ gʼawˇ hui htaꞈ mawˬ daꞈ leh a yeˇ uiˍ ve tawˇ piˇ taˉ ve yoˬ. Yeˍsuˆ kʼoˆ ve, ‘nawˬ hui kʼai leh chaw ceuˬ hkʼa peu˗eˬ ngaˬ ve awˬ laꞈ gʼawˇ hpehꞈ la tuˬ ca te˗o. Ngaˬ nawˬ hui htaꞈ maˍ laˇ ve hkʼe yawˇ hui htaꞈ maˍ piˇ leh Baˆtiˆsaˬ piˇ˗oˆ.’ Leh yawˇ ka tiꞈ te piˇ ve, “ngaˬ nawˬ hui geh hkʼaˬ htaˆ kaꞈ chehˇ tuˬ yoˬ.”

Yeˍsuˆ kʼawꞈ teꞈ tu la peuˬ hkʼawꞈ nawˉ 40 nyi ve awˬ yanˇ hkʼaw Gaˍliˍlehˇ mvuhˇ miˬ leh Yeˍruˆsaˍlehnˍ venˇ lo awˬ laꞈ gʼawˇ laiˉ ha gʼaˇ htaꞈ yawˇ awˬ to mawˬ tcuh ve yoˬ. Yawˇ a yeˇ uiˍ ve laiˉ lawn maˍ leh anˇ tuˬ kaꞈ te maˍ piˇ ve yoˬ. Yeˍsuˆ Shaˍlonˍ hkʼaw hkʼoˆ lo tcuh yaˇ hui htaꞈ mawˬ daꞈ ve awˬ leh meuˇ teˇ pawˆ hpehꞈ ve yoˬ. Yawˇ yawˇ hui htaꞈ kʼoˆ piˇ ve, ‘ngaˬ Awˬ pa ka tiꞈ te taˍ ve awˬ ceuˬ maˇ gʼa sheˍ ve ceh ceh law taˍ leh, Yeˍruˆsaˍlehnˍ venˇ lo taˇ tawˆ˗e.’

Yeˍsuˆ kʼoˆ ve htaꞈ tcuh yaˇ hui maˇ na gʼa. Yawˇ hui Yeˍsuˆ htaꞈ na piˇ ve, ‘chi teˇ hkui nawˬ Iˉsaˍreˍlaˆ ve Jawˇmawˇ te tuˬ laˇ?’ Yeˍsuˆ kʼoˆ piˇ ve, ‘chi teˇ hkui Yaˬhoˉvaˬ ngaˬ htaꞈ Jawˇmawˇ te tcuh laˇ tuˬ awˬ yanˇ maˇ gaˬ sheˍ. Maˇ maw kʼo, nawˬ hui Gʼuiˬ sha ve daꞈ ve kehˬ ve awˬ ha hpu gʼa leh Yeˍruˆsaˍlehnˍ venˇ htaꞈ tanˬ leh Yuˇdaꞈ mvuhˇ miˬ, Saˍmaˍriˆ mvuhˇ miˬ leh mvuhˇ leh miˬ leh hkʼa gaˬ, nawˬ hui ngaˬ ve shaˉ hkiˆ hkanˍ ve chaw gʼa hpehꞈ tuˬ yoˬ.’

Yeˍsuˆ mvuhˇ naw ma hkʼoˆ kʼoꞈ˗e leh yawˇ htaꞈ moˬ beh taˍ ve yoˬ. Hkʼe te leh awˬ laꞈ gʼawˇ hui yawˇ htaꞈ mawˬ htaˇ hkʼa gaˬ nyi chehˇ ve yoˬ.

Yawˇ hui Shaˍlonˍ hkʼaw lo yaꞈ la leh Yeˍruˆsaˍlehnˍ venˇ lo kʼai ve yoˬ. Awˬ laꞈ gʼawˇ hui yehˬ awˬ htaꞈ teˇ htaiꞈ hkʼoˆ lo hpawnˬ daꞈ la leh hkʼaˬ htaˆ kaꞈ bon lawˬ ve yoˬ. Yeˍsuˆ aˬ htoꞈ ma kʼawꞈ te tcuh laˇ tuˬ naˍ yawˇ hui law nyi chehˇ ve yoˬ.