Yeˍsuˆ ve awˬ to tcuh yaˇ hui htaꞈ mawˬ tcuh peuˬ hkʼawꞈ nawˉ maˇ maw, Peˍtruˆ Gaˍliˍlehˇ gʼuiˬ po lo ngaˇ kʼawꞈ ca˗e tuˬ dawˇ cheˆ ve yoˬ. Peˍtruˆ geh Htoˉmaꞈ, Yaˍkoˆ, Yoˇhanˬ leh awˬ nu ve awˬ laꞈ gʼawˇ kaꞈ kʼai ve yoˬ. Yawˇ hui teˇ haˉ mvuhˇ hkʼa htiˇ ngaˇ ca ve htawˇ, maˇ gʼa.

Mvuhˇ shawˉ teˇ naꞈ htaˇ, yawˇ hui gʼuiˬ pfuhˍ lo hawˉ hkʼaˆ teˇ gʼaˇ huˉ taˍ ve htaꞈ gʼa mawˬ ve yoˬ. Leh yawˇ hui htaꞈ na piˇ ve, ‘ngaˇ ca ve gʼa˗aw laˇ?’ yawˇ hui ‘maˇ gʼa!’ tehꞈ kʼoˆ piˇ ve yoˬ. Hawˉ hkʼaˆ oˇ ve teˇ gʼaˇ kʼoˆ ve, “haw loꞈ kʼoˍ laꞈ sha paˉ lo geuꞈ hpehˇ˗oˆ.” Hkʼe te leh, yawˇ hui gʼaꞈ te htaˇ ngaˇ gʼa maˇ jaˇ ve pa taw, geuꞈ gʼawˬ taˆ maˇ gʼaˇ. Yawˇ Yeˍsuˆ hpehꞈ ve tehꞈ Yoˇhanˬ laꞈ haˉ shiˍ la leh kʼoˆ ve, “oˇ ve lehˬ ngaˬ hui ve Jawˇmawˇ yoˬ!” Peˍtruˆ Iˉ kaˆ hkʼaw pawˆ ce leh gʼuiˬ pfuhˍ lo lawehˇ kʼai ve yoˬ. Awˬ nu ve awˬ laꞈ gʼawˇ kʼo haw loꞈ kʼoˍ gʼaꞈ kʼai ve yoˬ.

Yawˇ hui gʼuiˬ pfuhˍ lo gaˬ la htaˇ, hkaoˍ monˇ leh ngaˇ piˬ taˍ ve htaꞈ gʼa mawˬ ve yoˬ. Yeˍsuˆ yawˇ hui ngaˇ ca gʼa taˍ ve htaꞈ yuˬ leh piˬ la˗oꞈ, tehꞈ kʼoˆ piˇ ve yoˬ. Yawˇ yawˇ hui htaꞈ kʼoˆ ve, ‘mvuhˇ shawˉ awˍ caˇ la˗o.’

 Mvuhˇ shawˉ awˍ caˇ peuˬ hkʼawꞈ nawˉ Yeˍsuˆ Peˍtruˆ htaꞈ na piˇ ve, ‘nawˬ ngaˇ ca ve aꞈ kehˉ ngaˬ htaꞈ haꞈ˗aw laˇ?’ Peˍtruˆ hkʼawꞈ piˇ ve, ‘yoˬ. Ngaˬ nawˬ htaꞈ haꞈ ve nawˬ shiˍ ve yoˬ.’ Yeˍsuˆ yawˇ htaꞈ kʼoˆ piˇ ve, ‘nawˬ ngaˬ ve yawˬ ehˉ htaꞈ haꞈ shaˉ˗oˆ.’ Yeˍsuˆ yawˇ htaꞈ 2 pawˆ teˇ pawˆ kʼawꞈ kʼoˆ piˇ ve, ‘Peˍtruˆ˗oˬ, nawˬ ngaˬ htaꞈ haꞈ˗aw laˇ?’ Peˍtruˆ kʼoˆ piˇ ve, ‘Jawˇmawˇ˗oˬ, ngaˬ nawˬ htaꞈ haꞈ ve nawˬ shiˍ ve yoˬ.’ Yeˍsuˆ yawˇ htaꞈ kʼoˆ piˇ ve, “ngaˬ ve yawˬ teˇ hpaˍ htaꞈ haꞈ shaˉ˗oˆ.” Yeˍsuˆ Peˍtruˆ htaꞈ 3 pawˆ teˇ pawˆ kʼawꞈ kʼoˆ piˇ ve, Peˍtruˆ dawˇ haˍ jaˇ leh kʼoˆ ve, ‘Jawˇmawˇ˗oˬ, nawˬ hkʼa peu˗eˬ htaꞈ shiˍ ve yoˬ. Ngaˬ nawˬ htaꞈ haꞈ ve nawˬ shiˍ ve yoˬ.’ Yeˍsuˆ kʼoˆ ve, “ngaˬ ve yawˬ teˇ hpaˍ htaꞈ haꞈ shaˉ˗oˆ.” Leh Yeˍsuˆ Peˍtruˆ htaꞈ kʼoˆ piˇ ve, ‘nawˬ ngaˬ hkʼaˇ suh hkʼaˬ htaˆ kaꞈ laˬ˗oꞈ.’