Hkui luˬ laꞈ luˬ ve hawˉ hkʼaˆ teˇ gʼaˇ cawˬ ve yoˬ. Hkʼe te leh, yawˇ teˇ nyi le le bon yehˬ lonˉ ve yehˬ miˉ hpeꞈ lo mui leh lawˬ caˇ chehˇ ve yoˬ. Teˇ nyi sha gʼuˇ hkʼawꞈ nawˉ htaˇ, Peˍtruˆ leh Yoˇhanˬ bon yehˬ lonˉ hkʼaw juˇ loꞈ˗e ve htaꞈ yawˇ gʼa mawˬ leh kʼoˆ piˇ ve, ‘ngaˬ htaꞈ hpu a ciˉ peꞈ laˇ˗oˆ.’ Peˍtruˆ kʼoˆ ve, ‘ngaˬ hpu aꞈ kehˉ daꞈ ve teˇ ceuˬ peꞈ laˇ gaˇ ve yoˬ. Hkʼe te leh, Yeˍsuˆ ve awˬ meh awˬ hawˉ lo yawˇ htaꞈ juˇ kʼai loˬ tehꞈ ngaˬ kʼoˆ piˇ ve yoˬ!’ Peˍtruˆ yawˇ htaꞈ gʼawˬ tu piˇ leh yawˇ kaꞈ juˇ kʼai gʼa ve yoˬ! Maˇ˗awˍ ve chaw chi htaꞈ anˇ jaˇ leh chaw maˇ maˇ awˬ laꞈ gʼawˇ hpehꞈ la ve yoˬ.

Yaꞈ hkʼaˇ, paw hkuˇ leh Saˍduˆkehˇ hui beuꞈ jaˇ. Yawˇ hui tcuh yaˇ 2 gʼaˇ htaꞈ hpeh yuˬ leh shaˉ nanˉ lo shiˍ kʼai leh na piˇ ve, ‘hawˉ hkʼaˆ chi teˇ gʼaˇ htaꞈ gu na˗e piˇ tuˬ a shu nawˬ hui htaꞈ kanˇ paˆ peꞈ laˇ ve le?’ Peˍtruˆ kʼoˆ ve, ‘nawˬ hui tiˇ pehˍ piˇ ve Yeˍsuˆ Hkriꞈ geh ngaˬ hui kanˇ paˆ gʼa ve yoˬ.’ Bon awˬ hoˉ kʼoˆ ve, ‘Yeˍsuˆ ve awˬ lawn taˇ kʼoˆ loˬ!’ Yaꞈ hkʼaˇ, tcuh yaˇ 2 gʼaˇ kʼoˆ ve, ‘ngaˬ hui Yeˍsuˆ ve awˬ lawn kʼoˆ tuˬ maˇ jehˇ.’

Peˍtruˆ leh Yoˇhanˬ htaꞈ hpehˇ piˇ peuˬ hkʼawꞈ nawˉ, awˬ nu ve awˬ laꞈ gʼawˇ hui geh kʼai leh aˬ htoꞈ ma hpehꞈ la ve kʼoˆ maˍ piˇ ve yoˬ. Awˬ laꞈ gʼawˇ hui Yaˬhoˉvaˬ geh bon lawˬ leh kʼoˆ ve, ‘nawˬ ve kanˉ caˉ leh te gʼa tuˬ ngaˬ hui haꞈ hanˉ ve cawˬ tuˬ ga laˇ˗oˆ.’ Yaˬhoˉvaˬ yawˇ hui htaꞈ daꞈ kehˬ ve awˬ ha hpu piˇ ve pa taw, yawˇ hui bon maˍ leh chaw naˬ htaꞈ gu na˗e piˇ gʼa ve yoˬ. Awˬ laꞈ gʼawˇ gʼaˇ hteꞈ maˇ la leh Saˍduˆkehˇ hui hkawehˉ jaˇ leh Peˍtruˆ, Yoˇhanˬ htaꞈ htawnˍ hkʼaw hpeh keu piˇ ve yoˬ. Yaꞈ hkʼaˇ, oˇ ve teˇ haˉ Yaˬhoˉvaˬ mvuhˇ naw ma tcuh yaˇ htaꞈ htawnˍ yehˬ miˉ hpaw tcuh leh yawˇ huiˉ maˬ htaꞈ kʼoˆ piˇ ve, ‘nawˬ hui bon yehˬ lonˉ hkʼaw ca kʼawꞈ maˍ piˇ˗oˆ.’

Shawˉ pawˍ mvuhˇ shawˉ htaˇ, Yuˇdaꞈ ve jehˬ daꞈ shehˍ hpaˇ bon awˬ hoˉ teˇ hpaˍ htaꞈ shu kʼoˆ piˇ ve, ‘htawnˍ yehˬ miˉ hoˆ taˍ ve htawˇ, nawˬ hui haw tiˍ taˍ ve chaw maˇ chehˇ˗o law! Yawˇ hui bon yehˬ lonˉ hkʼaw maˍ chehˇ˗oˬ ve yoˬ!’ Peˍtruˆ leh Yoˇhanˬ htaꞈ Yuˇdaꞈ ve jehˬ daꞈ shehˍ hpaˇ awˬ moˍ hkʼaw teˇ pawˆ kʼawꞈ hpehꞈ veu laˇ ve yoˬ. Paw hkuˇ lonˉ yawˇ hui  htaꞈ kʼoˆ piˇ˗oˬ ve, ‘Yeˍsuˆ ve awˬ lawn taˇ kʼoˆ loˬ!’ Peˍtruˆ kʼawꞈ kʼoˆ ve, “chaw yaˇ ve tawˇ hkawˇ aꞈ kehˉ Gʼuiˬ sha ve tawˇ hkawˇ htaꞈ ngaˬ hui gʼa na yuˬ ve yoˬ.”

Bon awˬ hoˉ beuꞈ jaˇ leh Peˍtruˆ leh Yoˇhanˬ htaꞈ tiˇ pehˍ gaˇ ve yoˬ. Yaꞈ hkʼaˇ, Gaˍmaˍleˍlaˆ meh ve Hpaˍriˍsehˇ teˇ gʼaˇ kʼoˆ ve, ‘hkʼa dehꞈ dawˇ nyi. Gʼuiˬ sha yawˇ hui geh chehˇ ve kʼo, nawˬ hui Gʼuiˬ sha htaꞈ tawˍ daꞈ chehˇ ve yoˬ. Nawˬ hui Gʼuiˬ sha htaꞈ tawˍ daꞈ gaˇ tehˬ tehˬ ve laˇ?’ Bon awˬ hoˉ teˇ hpaˍ Gaˍmaˍleˍlaˆ kʼoˆ ve htaꞈ na leh yawˇ hui Peˍtruˆ leh Yoˇhanˬ htaꞈ jawꞈ leh yawˇ huiˉ maˬ htaꞈ Yeˍsuˆ ve awˬ lawn taˇ kʼawꞈ maˍ toˇ tehꞈ kʼoˆ piˇ leh hpehˇ piˇ ve yoˬ. Yaꞈ hkʼaˇ, yawˇ huiˉ maˬ haꞈ hanˉ ve awˬ hkʼaw lo bon yehˬ lonˉ hkʼaw maˇ kʼoˆ, hkʼaˆ hkʼaw lo maˇ kʼoˆ, Yeˍsuˆ ve awˬ lawn maˍ tcuhˉ taˍ ve yoˬ.