Tcuh yaˇ hui Yeˍsuˆ kʼoˆ piˇ taˉ ve tawˇ hkawˇ htaꞈ na yuˬ leh miˬ guiˬ hkʼoˆ teˇ kaˬ le le lo daꞈ ve awˬ lawn sha tanˇ maˍ kʼai ve yoˬ. Peˍteˍkoˆteˍ 47 hkʼawꞈ htaˇ, Anˍtiˆawˍ venˇ hkʼaw ve Hkriꞈ yaˇ Pawˇluꞈ leh Baˍnaˍbaˆ htaꞈ teˇ kaˬ le le lo daꞈ ve awˬ lawn sha tanˇ maˍ tuˬ kʼai tcuh ve yoˬ. Yawˇ huiˉ maˬ nyi ma pfuhˇ ve awˬ hkʼaw lo Aˍshaˆ miˬ guiˬ lo Deˍbeˍ venˇ, Luˇtaˍraˆ venˇ leh Iˇkawˇniˆ venˇ chi teˇ hpaˍ hkʼaw bon maˍ˗e tcuh ve yoˬ.

Pawˇluꞈ leh Baˍnaˍbaˆ lehˬ, paw sha ve chaw, haˍ gʼawˇ ve chaw, yaˇ nehˬ leh chaw mawˇ, teˇ gʼaˇ le le htaꞈ kaꞈ maˍ piˇ ve yoˬ. Hkʼe te leh, chaw maˇ maˇ Hkriꞈ yaˇ hpehꞈ la ve yoˬ. Pawˇluꞈ leh Baˍnaˍbaˆ Kuˇpaˍruˆ conˇ hkʼaw uˉ peunˍ paˍ Seˍraˍgiˆ Pawˇluꞈ meh ve htaꞈ bon maˍ piˇ htaˇ, shaˉ te paˍ teˇ gʼaˇ yawˇ hui htaꞈ tawˍ piˇ ve yoˬ. Pawˇluꞈ shaˉ te paˍ htaꞈ kʼoˆ piˇ ve, ‘Yaˬhoˉvaˬ nawˬ htaꞈ suhˉ jehˬ laˇ tuˬ yoˬ.’ Oˇ teˇ hkui shaˉ te paˍ mehˆ cuˉ˗e ve yoˬ. Seˍraˍgiˆ Pawˇluꞈ oˇ ve htaꞈ gʼa mawˬ htaˇ, Hkriꞈ yaˇ hpehꞈ la ve yoˬ.

Pawˇluꞈ leh Baˍnaˍbaˆ teˇ kaˬ le le lo bon maˍ ve yoˬ. Teˇ yehˬ peuˬ teˇ yehˬ, tcuh hkʼaw lo, yaꞈ kʼaw hpuiˇ lo, leh Yuˇdaꞈ chaw ve hpawnˬ daꞈ kuiˬ hkʼaw kaꞈ maˍ ve yoˬ. Yawˇ huiˉ maˬ anˇ tuˬ te leh hkui luˬ laꞈ luˬ ve chaw htaꞈ gu na˗e piˇ ve htaꞈ, Luˇtaˍraˆ chaw hui gʼa mawˬ htaˇ, Yawˇ huiˉ maˬ Gʼuiˬ sha hpehꞈ ve tehꞈ dawˇ leh oˉ kʼoˍ pui ve yoˬ. Yaꞈ hkʼaˇ, Pawˇluꞈ leh Baˍnaˍbaˆ yawˇ hui htaꞈ kʼoˆ piˇ ve, ‘Gʼuiˬ sha htaꞈ oˉ kʼoˍ pui lo! Ngaˬ huiˉ maˬ htawˇ, nawˬ hui hkʼa shuˍ chaw yaˇ hpehꞈ ve yoˬ.’ Yuˇdaꞈ chaw teˇ hpaˍ, chaw awˬ moˍ lonˉ Pawˇluꞈ htaꞈ tawˍ tuˬ awˬ gʼaˇ piˇ ve yoˬ. Yawˇ hui Pawˇluꞈ htaꞈ haˉ pui baˬ leh venˇ awˬ baˬ lo gʼawˬ baˬ leh suh tuˬ te piˇ ve yoˬ. Yaꞈ hkʼaˇ, Pawˇluꞈ maˇ suh! Awˬ viˉ awˬ nyi Hkriꞈ yaˇ hui yawˇ htaꞈ haˆ ga la leh venˇ hkʼaw shiˍ kʼoꞈ˗e ve yoˬ. Oˇ ve hkʼawꞈ nawˉ Pawˇluꞈ Anˍtiˆawˍ venˇ lo kʼai ve yoˬ.

Peˍteˍkoˆteˍ 49 hkʼawꞈ htaˇ, Pawˇluꞈ bon teˇ pawˆ kʼawꞈ maˍ˗e ve yoˬ. Aˍshaˆ miˬ guiˬ lo ve awˬ viˉ awˬ nyi Hkriꞈ yaˇ geh teˇ pawˆ kʼawꞈ guiˇ˗e ve yoˬ. Hkʼe te leh,  Uˉyawˉpaˆ miˬ guiˬ lo hkʼa gaˬ bon maˍ ve yoˬ. Yawˇ Aˍhtenˍ venˇ, Eˇfeˇsuꞈ, Hpiˇliˇpiˆ, Hteˇsaˍlawˇniˆ leh laiˉ kaˬ lo kʼai ve yoˬ. Pawˇluꞈ geh kʼai ve lehˬ Siˍlaˆ, Luˉkaꞈ leh Tiˆmoˉseˍ yoˬ. Yawˇ hui Hkriꞈ yaˇ awˬ moˍ awˬ suhˉ laiˉ kaˬ teh leh Hkriꞈ yaˇ awˬ moˍ hkʼaw awˬ gʼaˇ uiˍ la tuˬ ga piˇ ve yoˬ. Pawˇluꞈ Kawˇrenˍhtuˆ venˇ lo 1 hkʼawꞈ hpaˆ chehˇ leh oˇ kaˬ lo ve Hkriꞈ yaˇ awˬ gʼaˇ uiˍ la tuˬ ga piˇ ve yoˬ. Yawˇ bon maˍ ve, leh Hkriꞈ yaˇ awˬ moˍ laiˉ kaˬ lo liꞈ bvuhꞈ feu piˇ ve yoˬ. Pawˇluꞈ ve kanˉ lehˬ hpa aˉ po kʼo tawˉ ve yoˬ. Peuˬ leh yawˇ Anˍtiˆawˍ venˇ lo kʼoꞈ˗e ve yoˬ.

Peˍteˍkoˆteˍ 52 hkʼawꞈ htaˇ, Pawˇluꞈ bon maˍ ve 3 pawˆ teˇ pawˆ hpehꞈ ve yoˬ. Yawˇ Aˍshaˆ miˬ guiˬ tanˬ leh awˬ na hpawˇ Hpiˇliˇpiˆ venˇ lo gaˬ htaˇ, Kawˇrenˍhtuˆ venˇ lo kʼawꞈ te kʼawꞈ la ve yoˬ. Eˇfeˇsuꞈ venˇ hkʼaw ve chaw htaꞈ maˍ piˇ tuˬ Pawˇluꞈ oˇ kaˬ lo laiˉ hkʼawꞈ chehˇ ve yoˬ. Chaw naˬ htaꞈ gu na˗e piˇ ve, Hkriꞈ yaˇ awˬ moˍ htaꞈ ga piˇ ve, Eˇfeˇsuꞈ venˇ lo liꞈ henˇ cawnˇ yehˬ hkʼaw Pawˇluꞈ teˇ nyi le le bon maˍ piˇ ve yoˬ. Chaw maˇ maˇ Pawˇluꞈ maˍ ve htaꞈ dawˇ cawˇ leh Hkriꞈ yaˇ hpehꞈ la ve yoˬ. Pawˇluꞈ daꞈ ve aw lawn sha tanˇ laiˉ kaˬ lo maˍ peuˬ hkʼawꞈ nawˉ Yeˍruˆsaˍlehnˍ venˇ lo kʼoꞈ˗e ve yoˬ.