Hpiˇliˇpiˆ venˇ hkʼaw awˬ ceˬ ma ehˉ teˇ gʼaˇ htaꞈ neˇ geh ve yoˬ. Neˇ yawˇ htaꞈ awˬ gʼuˇ suhˍ hpawˇ ve awˬ lawn mawˬ tcuh ve yoˬ. Yawˇ ve awˬ shehˍ hpaˇ htaꞈ paw sha la tuˬ te piˇ ve yoˬ. Pawˇluꞈ leh Siˍlaˆ Hpiˇliˇpiˆ venˇ lo gaˬ la htaˇ yaˇ miˇ ehˉ yawˇ huiˉ maˬ geh laiˉ nyi gʼaꞈ toˇ ve yoˬ. Neˇ yawˇ htaꞈ kʼoˆ tcuh ve, ‘chaw chi lehˬ uiˍ jaˇ mvuh jaˇ ve Gʼuiˬ sha ve awˬ ceˬ hpehꞈ ve yoˬ.’ Pawˇluꞈ neˇ htaꞈ kʼoˆ piˇ ve, ‘Yeˍsuˆ ve awˬ meh awˬ hawˉ lo yawˇ awˬ hkʼaw lo tawˆ kʼai˗o!’ Neˇ laꞈ haˉ tawˆ˗e ve yoˬ.

Yawˇ ve awˬ shehˍ hpaˇ teˇ hpaˍ lehˬ, yawˇ yawˇ hui htaꞈ paw sha la tuˬ te piˇ maˇ gʼa ve htaꞈ shiˍ la htaˇ, nyi ma zuhˆ jaˇ. Pawˇluꞈ leh Siˍlaˆ htaꞈ hpeh yuˬ leh jawˇ mawˇ teˇ hpaˍ geh gʼawˬ kʼai leh kʼoˆ ve, ‘chaw chi teˇ hpaˍ lehˬ, ngaˬ hui ve venˇ hkʼaw awˬ liˇ htaꞈ te yaꞈ leh shoꞈ shaꞈ tuˬ te chehˇ ve yoˬ!’ Jawˇmawˇ teˇ hpaˍ kʼoˆ ve, yawˇ huiˉ maˬ htaꞈ jawꞈ leh htawnˍ hkʼaw keu piˇ loˬ. Htawnˍ awˬ hoˉ yawˇ huiˉ maˬ htaꞈ yuˬ leh htawnˍ awˬ kʼaw ji teˇ bawehˇ naˆ hoꞈ jaˇ kuiˬ lo keu piˇ leh yawˇ huiˉ maˬ ve hkui sheh htaꞈ suhˆ htawˆ taˍ ve hkʼaw keu piˇ ve yoˬ.

Shehˍ kʼaw hkui htaˇ Pawˇluꞈ leh Siˍlaˆ Yaˬhoˉvaˬ htaꞈ kʼa muiˬ chiˇ mvuh chehˇ ve teˇ yanˇ, htawnˍ yaˇ yawˇ huiˉ maˬ hkawˇ na chehˇ ve yoˬ. Oˇ ve teˇ yanˇ miˬ hiˆ hehnˇ jaˇ leh htawnˍ yehˬ hiˆ hiˆ naˇ naˇ hpehꞈ la ve yoˬ. Htawnˍ yehˬ miˉ teˇ maˬ le le hpaw baˬ sheˬ leh htawnˍ yaˇ sho caˆ keu taˬ ve leh suhˆ htawˆ keu taˬ ve kʼehˆ tawˆ˗e ve yoˬ. Htawnˍ awˬ hoˉ nawˇ la leh yehˬ miˉ hpaw baˬ taˍ ve htaꞈ gʼa mawˬ ve yoˬ. Htawnˍ yaˇ hkʼa peu˗eˬ hpaw˗eˬ peuˬ hehˉ tehꞈ dawˇ leh yawˇ awˬ to htaꞈ aˉ htaw gʼawˬ leh juˆ pehˬ˗a tehꞈ te ve yoˬ.

Yaꞈ hkʼaˇ, Pawˇluꞈ kuˬ leh kʼoˆ ve, ‘nawˬ awˬ to htaꞈ teꞈ chiˉ taˇ te, ngaˬ hui hkʼa peu˗eˬ chehˇ taˍ ve yoˬ!’ Htawnˍ awˬ hoˉ Pawˇluꞈ leh Siˍlaˆ mehˆ gʼuˇ suhˍ boˆ taˍ leh kʼoˆ ve, ‘ngaˬ htaiˍ hkʼawꞈ ve htaꞈ gʼa tuˬ hkʼaˬ hkʼe gʼa te cawˇ ve le?’ Pawˇluꞈ leh Siˍlaˆ kʼoˆ ve, ‘nawˬ leh nawˬ ve yehˬ kʼa Yeˍsuˆ htaꞈ gʼa yonˍ ve yoˬ.’ Pawˇluꞈ leh Siˍlaˆ yawˇ leh yawˇ ve yehˬ kʼa htaꞈ Yaˬhoˉvaˬ ve awˬ lawn maˍ piˇ ve yoˬ. Hkʼe te leh, yawˇ leh yehˬ kʼa hkʼaw ve chaw hkʼa peu˗eˬ Baˆtiˆsaˬ haꞈ yuˬ ve yoˬ.