Kehˉsaˍriˆ venˇ lo Kawˍneˍliˆ meh ve Roˉmaꞈ ve maꞈ poˍ teˇ gʼaˇ cawˬ ve yoˬ. Yawˇ Yuˇdaꞈ chaw maˇ heˆ ve htawˇ, yawˇ hui yawˇ htaꞈ yawˆ yan ve yoˬ. Yawˇ ha kʼaˉ puiˉ leh haˍ yaˇ gʼawˇ yaˇ htaꞈ ga piˇ puiˉ ve yoˬ. Kawˍneˍliˆ Yaˬhoˉvaˬ htaꞈ yonˍ leh yawˇ geh bon lawˬ tcuhˉ taˍ ve yoˬ. Teˇ nyi htaˇ mvuhˇ naw ma tcuh yaˇ yawˇ geh laˬ leh kʼoˆ piˇ ve, ‘nawˬ ve bon lawˬ hkawˇ Gʼuiˬ sha na yuˬ peuˬ. Yuˇpeˍ venˇ lo nawˬ ve chaw kʼai tcuh leh Peˍtruˆ meh ve htaꞈ nawˬ ve aˉ hkʼaw lo laˬ tuˬ ca kuˬ tcuh˗o.’ Kawˍneˍliˆ mvuhˇ naw ma tcuh yaˇ kʼoˆ piˇ ve hkʼe laꞈ haˉ gʼaꞈ te ve yoˬ. Yawˇ Yuˇpeˍ venˇ lo chaw 3 gʼaˇ kʼai tcuh leh venˇ oˇ ve lehˬ Kehˉsaˍriˆ awˬ hawˉ hpawˇ lo aˬ laˬ hkʼe 48 kiˇ loˇ vuiˇ ve yoˬ.

Peˍtruˆ Yuˇpeˍ venˇ lo chehˇ htaˇ, chaꞈ chiˆ ve to nuˇ to shaˆ laiˉ ceuˬ Yuˇdaꞈ chaw htaꞈ Gʼuiˬ sha maˇ caˇ tcuh ve zuhꞈ maˆ mawˬ ve yoˬ. To nuˇ to shaˆ oˇ ve caˇ hpehꞈ ve yoˬ tehꞈ kʼoˆ ve awˬ hkawˇ gʼa kaˇ ve yoˬ. Peˍtruˆ kʼoˆ ve, ‘to nuˇ to shaˆ chi hkʼe ve htaꞈ ngaˬ maˇ caˇ jaw.’ Awˬ hkawˇ oˇ ve yawˇ htaꞈ kʼoˆ ve, ‘Gʼuiˬ sha daꞈ piˇ kehˬ piˇ peuˬ ve awˬ ceuˬ htaꞈ chaꞈ chiˆ ve taˇ kʼoˆ.’ Awˬ hkawˇ oˇ ve Peˍtruˆ htaꞈ kʼoˆ piˇ ve, ‘hawˉ hkʼaˆ 3 gʼaˇ nawˬ ve yehˬ miˉ hpeꞈ lo gaˬ la peuˬ. Nawˬ yawˇ hui geh kʼai loˬ.’ Peˍtruˆ hawˉ hkʼaˆ 3 gʼaˇ htaꞈ na piˇ ve, ‘nawˬ hui aˬ htoꞈ ma ca te la ve le?’ Yawˇ hui kʼoˆ ve, ‘Kehˉsaˍriˆ venˇ lo chehˇ ve Kawˍneˍliˆ meh ve Roˉmaꞈ ve maꞈ poˍ ve aˉ hkʼaw lo nawˬ laˬ tuˬ ngaˬ hui htaꞈ ca kuˬ tcuh laˇ ve yoˬ.’ Peˍtruˆ kʼoˆ piˇ ve,  ‘ngaˬ geh teˇ haˉ haˉ sheꞈ.’ Mvuhˇ htiˇ la leh Peˍtruˆ yawˇ hui geh Kehˉsaˍriˆ venˇ lo kʼai ve yoˬ. Yuˇpeˍ venˇ lo ve Hkriꞈ yaˇ teˇ hpaˍ yawˇ geh kʼai ve yoˬ.

Kawˍneˍriˆ Peˍtruˆ htaꞈ gʼa mawˬ htaˇ, hkui tcuhˉ teh leh oˉ kʼoˍ pui ve yoˬ. Peˍtruˆ yawˇ htaꞈ kʼoˆ ve, ‘tu loˬ! Ngaˬ htawˇ nawˬ hkʼa shuˍ chaw yaˇ hpehꞈ ve yoˬ. Yuˇdaꞈ chaw maˇ˗awˍ ve buiˇ shaˆ aˉ naˆ chaw ve aˉ hkʼaw maˇ kʼai. Yaꞈ hkʼaˇ, Gʼuiˬ sha ngaˬ htaꞈ nawˬ ve aˉ hkʼaw lo kʼai tcuh laˇ ve yoˬ. Aˬ htoꞈ ma pa taw nawˬ ngaˬ htaꞈ laˬ tcuh laˇ ve le? A ciˉ kʼoˆ laˇ sheˍ’

Kawˍneˍriˆ Peˍtruˆ htaꞈ kʼoˆ piˇ ve, ‘peuˬ taˉ ve 4 nyi htaˇ ngaˬ Gʼuiˬ sha geh bon lawˬ chehˇ leh mvuhˇ naw ma tcuh yaˇ teˇ gʼaˇ nawˬ htaꞈ kuˬ laˬ˗oꞈ tehꞈ kʼoˆ laˇ ve yoˬ. Yaˬhoˉvaˬ aˬ htoꞈ ma maˍ laˇ ve ngaˬ hui htaꞈ a ciˉ kʼoˆ laˇ sheˍ.’ Peˍtruˆ kʼoˆ ve, ‘Gʼuiˬ sha lehˬ chaw mehˆ hpfuhˇ htaꞈ maˇ nyi ve ngaˬ awˬ tehˬ awˬ na gʼa shiˍ ve yoˬ. Gʼuiˬ sha lehˬ yawˇ htaꞈ oˉ kʼoˍ pui la ve chaw teˇ gʼaˇ le le htaꞈ haꞈ yuˬ ve yoˬ.’ Hkʼe te leh, Peˍtruˆ Yeˍsuˆ htaꞈ caˉ daꞈ ve laiˉ lawn maˍ piˇ ve yoˬ. Kawˍneˍriˆ leh yawˇ ve yehˬ hkʼaw ve chaw teˇ gʼaˇ le le daꞈ kehˬ ve awˬ ha hpu gʼa leh Baˆtiˆsaˬ haꞈ yuˬ ve yoˬ.