Luˇtaˍraˆ venˇ Hkriꞈ yaˇ awˬ moˍ hkʼaw Tiˆmoˉseˍ lehˬ yaˇ nehˬ hpehꞈ ve yoˬ. Yawˇ ve awˬ pa Heˍlaˍsaˆ chaw hpehꞈ leh yawˇ ve awˬ e Yuˇdaꞈ chaw hpehꞈ ve yoˬ. Yawˇ ve awˬ e Uˇniˆ leh yawˇ ve awˬ pi Lawˇiˆ Tiˆmoˉseˍ yaˇ ehˉ htaˇ kaꞈ Yaˬhoˉvaˬ ve awˬ lawn maˍ piˇ ve yoˬ.

Pawˇluꞈ 2 pawˆ teˇ pawˆ bon maˍ toˇ htaˇ, yawˇ Luˇtaˍraˆ Hkriꞈ yaˇ awˬ moˍ geh laˬ ve yoˬ. Tiˆmoˉseˍ leh awˬ viˉ awˬ nyi Hkriꞈ yaˇ htaꞈ haꞈ leh nyi ma awˬ tawˬ hkʼa gaˬ ga piˇ ve htaꞈ Pawˇluꞈ mawˬ ve yoˬ. Tiˆmoˉseˍ Pawˇluꞈ geh kʼai tuˬ jehˬ piˇ leh shu htaꞈ daꞈ ve awˬ lawn sha tanˇ maˍ piˇ puiˉ tuˬ awˬ hkʼaˇ maˍ piˇ ve yoˬ.

Pawˇluꞈ leh Tiˆmoˉseˍ bon hkʼaˬ kaˬ lo maˍ˗e tuˬ Gʼuiˬ sha ve daꞈ kehˬ ve awˬ ha hpu sheh kʼai piˇ ve yoˬ. Teˇ haˉ htaˇ Pawˇluꞈ awˬ ha awˬ hkʼaw lo Maˍkeˍdawˇniˆ chaw teˇ gʼaˇ ngaˬ hui htaꞈ a ciˉ ga laˇ˗oˆ tehꞈ kʼoˆ ve htaꞈ gʼa mawˬ ve yoˬ. Pawˇluꞈ, Tiˆmoˉseˍ, Siˍlaˆ, Luˉkaꞈ oˇ kaˬ lo bon maˍ leh Hkriꞈ yaˇ awˬ moˍ teh ve yoˬ.

Maˍkeˍdawˇniˆ mvuhˇ miˬ Hteˇsaˍlawˇniˆ venˇ hkʼaw hawˉ hkʼaˆ leh yaˇ miˇ Hkriꞈ yaˇ maˇ maˇ hpehꞈ la ve yoˬ. Venˇ oˇ ve hkʼaw chehˇ ve Yuˇdaꞈ chaw teˇ hpaˍ Pawˇluꞈ leh awˬ chawˇ hui htaꞈ hkawehˉ ve yoˬ. Yawˇ hui Hkriꞈ yaˇ teˇ hpaˍ htaꞈ shoꞈ shaꞈ tuˬ te piˇ leh mvuhˇ miˬ uˉ peunˍ paˍ geh shiˍ kʼai ve yoˬ. Yawˇ hui kʼoˆ ve, ‘chaw chi teˇ hpaˍ Roˉmaꞈ mvuhˇ miˬ htaꞈ hpfuhˆ paˍ hpehꞈ ve yoˬ.’ Oˇ teˇ yanˇ Pawˇluꞈ leh Tiˆmoˉseˍ kawˆ tuˬ cawˬ leh oˇ ve teˇ haˉ Beˍriˆ venˇ lo hpaw˗e ve yoˬ.

Beˍriˆ venˇ chaw daꞈ ve awˬ lawn sha tanˇ dawˇ cawˇ ve yoˬ. Venˇ chi ve hkʼaw Heˍlaˍsaˆ chaw leh Yuˇdaꞈ chaw laiˉ gʼaˇ Hkriꞈ yaˇ hpehꞈ la ve yoˬ. Hteˇsaˍlawˇniˆ venˇ lo laˬ ve Yuˇdaꞈ chaw teˇ hpaˍ, oˇ kaˬ lo shoꞈ shaꞈ tuˬ te la ve yoˬ. Pawˇluꞈ Aˍhtenˍ venˇ lo kʼai ve yoˬ. Yaꞈ hkʼaˇ, Tiˆmoˉseˍ leh Siˍlaˆ Beˍriˆ venˇ lo chehˇ taˉ leh awˬ viˉ awˬ nyi yonˍ hkʼaˇ uiˍ la tuˬ ga piˇ ve yoˬ. Peuˬ leh Pawˇluꞈ leh Tiˆmoˉseˍ Hteˇsaˍlawˇniˆ venˇ hkʼaw lo kʼawꞈ kʼoꞈ˗e leh awˬ viˉ awˬ nyi shu fawˉ mehˍ piˇ jaˇ ve htaꞈ ga piˇ ve yoˬ. Oˇ ve hkʼawꞈ nawˉ Pawˇluꞈ leh Tiˆmoˉseˍ awˬ nu ve Hkriꞈ yaˇ awˬ moˍ geh kʼai leh awˬ gʼaˇ piˇ ve yoˬ.

 Pawˇluꞈ Tiˆmoˉseˍ htaꞈ kʼoˆ piˇ ve, ‘Yaˬhoˉvaˬ ve kanˉ te gaˇ ve chaw fawˉ mehˍ ve htaꞈ gʼa hkanˍ tuˬ ve yoˬ.’ Tiˆmoˉseˍ Gʼuiˬ sha htaꞈ yonˍ ve pa taw, shu fawˉ mehˍ piˇ leh htawnˍ hkʼaw hpeh keu piˇ ve yoˬ. Tiˆmoˉseˍ Yaˬhoˉvaˬ htaꞈ ka tiꞈ yeˬ ve tehꞈ hpeuꞈ maw piˇ gʼa ve pa taw ha lehˬ jaˇ.

Hpiˇliˇpiˆ venˇ hkʼaw ve awˬ viˉ awˬ nyi htaꞈ Pawˇluꞈ kʼoˆ piˇ ve, ‘nawˬ hui geh ngaˬ Tiˆmoˉseˍ htaꞈ peu laˇ tuˬ yoˬ. Yawˇ nawˬ hui htaꞈ Yaˬhoˉvaˬ ve kanˉ te tuˬ leh nawˬ hui daꞈ ve awˬ lawn sha tanˇ gʼa henˇ tuˬ awˬ hkʼaˇ maˍ laˇ tuˬ yoˬ.’ Pawˇluꞈ Tiˆmoˉseˍ htaꞈ yonˍ gʼa ve yoˬ. Yawˇ hui awˬ chawˇ hpehꞈ leh Gʼuiˬ sha ve kanˉ teˇ geh laiˉ hkʼawꞈ te ve yoˬ.