Yeˍsuˆ mvuhˇ naw ma hkʼoˆ kʼawꞈ kʼoꞈ˗e ve 10 nyi gaˬ leh yawˇ ve awˬ laꞈ gʼawˇ daꞈ ve kehˬ ve awˬ ha hpu gʼa ve yoˬ. Oˇ ve teˇ yanˇ Peˍteˍkoˆteˍ 33 hkʼawꞈ htaˇ hpehꞈ ve yoˬ. Pawehˇ chi ve Yeˍruˆsaˍlehnˍ venˇ hkʼaw te ve pa taw, laiˉ mvuhˇ miˬ lo ve chaw laˬ ve yoˬ. Yeˍsuˆ ve awˬ laꞈ gʼawˇ aˬ laˬ hkʼe 120 gʼaˇ yehˬ teˇ yehˬ awˬ htaꞈ teˇ htaiꞈ hkʼoˆ hpawnˬ daꞈ chehˇ ve yoˬ. Oˇ ve teˇ hkui anˇ tuˬ hpehꞈ la leh awˬ laꞈ gʼawˇ teˇ gʼaˇ le le ve oˉ kʼoˍ hkʼoˆ aˬ miˍ ha hkʼa shuˍ jehˇ taˍ ve yoˬ. Leh yawˇ hui laiˉ chaw ceuˬ tawˇ hkawˇ yaw gʼa leh yehˬ oˇ ve hkʼaw mvuhˇ haw hkʼa shuˍ awˬ hkawˇ bvuhˬ ve yoˬ.

Yeˍruˆsaˍlehnˍ venˇ pawehˇ hkʼaw laˬ ve laiˉ mvuhˇ miˬ lo ve chaw yehˬ teˇ yehˬ hkʼaw awˬ hkawˇ bvuhˬ jaˇ ve gʼa kaˇ leh ca gʼuiˇ nyi la ve yoˬ. Laiˉ chaw ceuˬ ve tawˇ hkawˇ awˬ laꞈ gʼawˇ hui yaw gʼa ve pa taw, yawˇ hui anˇ ve yoˬ. Yawˇ hui kʼoˆ daꞈ ve, ‘chaw chi teˇ hpaˍ lehˬ Gaˍliˍlehˇ chaw hpehꞈ ve yoˬ. Aˬ htoꞈ ma te ngaˬ hui ve tawˇ hkawˇ yaw gʼa ve le?’

Peˍtruˆ leh awˬ nu ve tcuh yaˇ shu mehˆ gʼuˇ suhˍ lo tu huˉ ve yoˬ. Yeˍsuˆ htaꞈ shu hkʼaˬ hkʼe te tiˇ pehˍ piˇ ve, Yaˬhoˉvaˬ Yeˍsuˆ htaꞈ kʼawꞈ teꞈ tu la piˇ ve yawˇ  shu htaꞈ kʼoˆ maˍ piˇ ve yoˬ. Peˍtruˆ kʼoˆ ve, ‘chi teˇ hkui Yeˍsuˆ mvuhˇ naw ma hkʼoˆ Gʼuiˬ sha ve laꞈ sha paˉ lo chehˇ taˍ ve yoˬ. Yawˇ ngaˬ hui htaꞈ ka tiꞈ te laˇ ve hkʼe daꞈ kehˬ ve awˬ ha hpu peꞈ laˇ ve yoˬ. Yaꞈ nyi anˇ tuˬ chi nawˬ hui gʼa kaˇ gʼa mawˬ peuˬ ve yoˬ.’

Peˍtruˆ kʼoˆ ve htaꞈ gʼa kaˇ ve chaw venˇ baˆ dawˇ hpfuhˆ ve yoˬ. Yawˇ hui kʼoˆ ve, “ngaˬ hui hkʼaˬ hkʼe gʼa te tuˬ le?” Peˍtruˆ yawˇ hui htaꞈ kʼoˆ piˇ ve, ‘nawˬ hui venˇ baˆ dawˇ hpfuhˆ leh Yeˍsuˆ ve awˬ meh awˬ hawˉ lo Baˆtiˆsaˬ haꞈ yuˬ ve kʼo, nawˬ hui kaꞈ daꞈ kehˬ ve awˬ ha hpu gʼa tuˬ yoˬ.’ Oˇ ve teˇ nyi hkʼaw Baˆtiˆsaˬ haꞈ yuˬ ve chaw aˬ laˬ hkʼe 3,000 gʼaˇ cawˬ ve yoˬ. Oˇ htaˇ tanˬ leh Yeˍruˆsaˍlehnˍ venˇ hkʼaw awˬ laꞈ gʼawˇ gʼaˇ hteꞈ maˇ la ve yoˬ. Yeˍsuˆ piˇ taˉ laˇ ve tawˇ hkawˇ awˬ laꞈ gʼawˇ hui htaꞈ maˍ piˇ ve yoˬ. Hkʼe te leh, daꞈ kehˬ ve awˬ ha hpu yawˇ hui htaꞈ ga piˇ leh Hkriꞈ yaˇ awˬ moˍ laiˉ kaˬ teh gʼa ve yoˬ.