Pawˇluꞈ 3 pawˆ teˇ pawˆ bon maˍ peuˬ hkʼawꞈ nawˉ, Yeˍruˆsaˍlehnˍ venˇ lo kʼawꞈ la leh shu yawˇ htaꞈ htawnˍ hkʼaw yuˬ keu piˇ ve yoˬ. Teˇ haˉ htaˇ Pawˇluꞈ ve zuhꞈ maˆ hkʼaw Yeˍsuˆ kʼoˆ piˇ ve, ‘nawˬ Roˉmaꞈ venˇ lo bon gʼa ca maˍ tuˬ yoˬ.’ Hkʼe te leh, maꞈ yaˇ Pawˇluꞈ htaꞈ Yeˍruˆsaˍlehnˍ venˇ lo yuˬ leh Kehˉsaˍriˆ venˇ htawnˍ hkʼaw 2 hkʼawꞈ haw piˇ ve yoˬ. Jawˇmawˇ Hpeˍtuˆ geh Pawˇluꞈ htaꞈ suhˉ jehˬ piˇ htaˇ Pawˇluꞈ kʼoˆ ve, ‘ngaˬ htaꞈ jawˇ mawˇ Kehˉsaˍ suhˉ jehˬ cheˆ laˇ tuˬ Roˉmaꞈ venˇ lo kʼai tcuh laˇ˗oˆ.’ Hpeˍtuˆ kʼoˆ ve, ‘nawˬ Kehˉsaˍ suhˉ jehˬ laˇ tuˬ lawˬ ve pa taw yawˇ geh kʼai loˬ.’ Yawˇ hui Pawˇluꞈ Roˉmaꞈ venˇ lo kʼai tuˬ haw loꞈ kʼoˍ hkʼaw shiˍ keu piˇ ve yoˬ. Pawˇluꞈ geh kʼai ve Luˉkaꞈ leh Aˍriˍtaˍhkuˆ kaꞈ yoˬ.

Laˇ tsuhˇ gʼuiˬ hkʼaw chehˇ htaˇ, yawˇ hui mvuhˇ haw lonˉ laiˉ nyi gʼa hpuˇ ve yoˬ. Haw loꞈ kʼoˍ hkʼaw chehˇ ve chaw hkʼa peu˗eˬ gʼa suh tuˬ yoˬ tehꞈ dawˇ ve yoˬ. Pawˇluꞈ kʼoˆ piˇ ve, ‘awˬ chawˇ teˇ hpaˍ˗oˬ, ngaˬ ve zuhꞈ maˆ hkʼaw mvuhˇ naw ma tcuh yaˇ kʼoˆ laˇ ve, ‘Pawˇluꞈ˗oˬ taˇ kawˆ. Nawˬ Roˉmaꞈ venˇ lo gʼa kʼai leh haw loꞈ kʼoˍ hkʼaw ciˇ ve chaw gʼa ponˬ tuˬ yoˬ. Hkʼe te leh, taˇ kawˆ ngaˬ hui maˇ gʼa suh taˬ!’

Mvuhˇ yeˬ mvuhˇ haw lonˉ 14 nyi hkʼa gaˬ laˬ ve yoˬ. Leh yawˇ hui Meˍleˍteˍ conˇ htaꞈ gʼa mawˬ ve yoˬ. Laˇ tsuhˇ gʼuiˬ maˇ naˉ kuiˬ gaˬ leh haw loꞈ kʼoˍ paˆ˗e ve yoˬ. Yaꞈ hkʼaˇ, 276 gʼaˇ gʼa ponˬ tuˬ iˉ kaˆ lawehˇ tawˆ˗e leh chaw teˇ hpaˍ suhˆ baˉ htaꞈ kʼuˉ tawˆ˗e ve yoˬ. Meˍleˍteˍ conˇ hkʼaw chehˇ ve chaw ngaˬ hui htaꞈ ga laˇ leh aˬ miˍ ceh lehˍ laˇ ve yoˬ.

3 ha pa peuˬ hkʼawꞈ nawˉ, maꞈ yaˇ Pawˇluꞈ Roˉmaꞈ venˇ lo kʼai tuˬ awˬ nu ve haw loꞈ kʼoˍ hkʼaw shiˍ keu piˇ ve yoˬ. Oˇ kaˬ lo awˬ viˉ awˬ nyi laiˉ gʼaˇ Pawˇluꞈ geh laˬ ve yoˬ. Pawˇluꞈ awˬ viˉ awˬ nyi htaꞈ gʼa mawˬ htaˇ, Yaˬhoˉvaˬ ve awˬ bon htaꞈ chiˇ mvuh leh awˬ gʼaˇ uiˍ la ve yoˬ. Oˇ htaˇ Pawˇluꞈ htawnˍ yaˇ hpehꞈ ve htawˇ, yawˇ yehˬ ngaˍ taˍ ve hkʼaw chehˇ gʼa tuˬ a hkaw˗anˬ gʼa leh maꞈ yaˇ teˇ gʼaˇ shaw taˍ ve yoˬ. Yehˬ oˇ ve hkʼaw 2 hkʼawꞈ chehˇ ve awˬ yanˇ chaw maˇ maˇ yawˇ geh laˬ ve yoˬ. Yawˇ geh laˬ ve chaw htaꞈ Gʼuiˬ sha ve mvuhˇ miˬ awˬ lawn maˍ piˇ leh Yeˍsuˆ ve awˬ lawn kaꞈ maˍ piˇ ve yoˬ. Pawˇluꞈ lehˬ Aˍshaˆ miˬ guiˬ leh Yuˇdaꞈ mvuhˇ miˬ hkʼaw ve Hkriꞈ yaˇ laiˉ moˍ htaꞈ liꞈ bvuhꞈ feu piˇ ve yoˬ. Yaˬhoˉvaˬ lehˬ Pawˇluꞈ htaꞈ daꞈ ve awˬ lawn sha tanˇ laiˉ mvuhˇ miˬ lo maˍ tcuh ve yoˬ.