Sawˉluꞈ Roˉmaꞈ chaw hpehꞈ leh Taˍsuˆ venˇ lo paw taˍ ve yoˬ. Yawˇ Hpaˍriˍsehˇ hpehꞈ leh Yuˇdaꞈ ve awˬ liˇ tawˇ hkawˇ shiˍ jaˇ ve pa taw, Hkriꞈ yaˇ htaꞈ nyi bawˬ ve yoˬ. Yawˇ Hkriꞈ yaˇ ve yehˬ hkʼaw loꞈ˗e leh hawˉ hkʼaˆ, yaˇ miˇ htaꞈ htawnˍ hkʼaw lo yuˬ keu piˇ ve yoˬ. Saˍteˍhpanˍ meh ve Hkriꞈ yaˇ teˇ gʼaˇ shu nyi ma zuhˆ jaˇ leh haˉ pui baˬ hpehˇ piˇ leh suh htaˇ hkʼa gaˬ Sawˉluꞈ kaꞈ huˉ nyi chehˇ ve yoˬ.

Yeˍruˆsaˍlehnˍ venˇ hkʼaw ceh maˇ heˆ. Awˬ nu ve venˇ hkʼaw chehˇ ve Hkriꞈ yaˇ htaꞈ kaꞈ Sawˉluꞈ hpeh yuˬ gaˇ ve yoˬ. Sawˉluꞈ Daˍmaˍsehˆ venˇ hkʼaw Hkriꞈ yaˇ htaꞈ hpeh yuˬ tuˬ paw hkuˇ a hkaw˗anˬ peꞈ laˇ tuˬ lawˬ ve yoˬ. Venˇ awˬ paˇ lo gaˬ la htaˇ, mvuhˇ naw ma lo awˬ gʼeuˆ laꞈ haˉ ba tawˆ la leh Sawˉluꞈ htaꞈ hti pfuhˍ ve yoˬ. Yawˇ miˬ chaˇ hkʼoˆ lo paiˍ˗e leh awˬ hkawˇ gʼa kaˇ ve, “Sawˉluꞈ˗oˬ, aˬ htoꞈ ma pa taw, nawˬ ngaˬ htaꞈ fawˉ mehˍ laˇ ve le?” Sawˉluꞈ na piˇ ve, “nawˬ a shu le?” Awˬ hkawˇ oˇ ve kʼoˆ ve, ‘ngaˬ lehˬ Yeˍsuˆ yoˬ. Daˍmaˍsehˆ venˇ hkʼaw loꞈ˗e loˬ. Naw aˬ htoꞈ ma gʼa te tuˬ shiˍ la tuˬ yoˬ.’ Yawˇ mehˆ maˇ mawˬ leh shu yawˇ ve laꞈ sheh htaꞈ sheh leh venˇ hkʼaw loꞈ˗e ve yoˬ.

Daˍmaˍsehˆ venˇ hkʼaw Aˍnaˍniˆ meh ve ka tiꞈ yeˬ ve Hkriꞈ yaˇ teˇ gʼaˇ cawˬ ve yoˬ. Aˍnaˍniˆ ve zuhꞈ maˆ hkʼaw Yeˍsuˆ kʼoˆ piˇ ve, ‘hteˇ ve yaꞈ kʼaw tehꞈ kʼoˆ ve teˇ caˆ lo kʼai˗o. Yuˇdaꞈ ve aˉ hkʼaw lo Sawˉluꞈ htaꞈ ca nyi˗o.’ Aˍnaˍniˆ kʼoˆ ve, ‘Jawˇmawˇ˗oˬ, yawˇ lehˬ nawˬ ve awˬ laꞈ gʼawˇ laiˉ gʼaˇ htaꞈ htawnˍ hkʼaw yuˬ keu piˇ ve pa taw, kawˆ tuˬ cawˬ ve yoˬ!’ Yaꞈ hkʼaˇ, Yeˍsuˆ kʼoˆ ve, ‘yawˇ geh kʼai loˬ. Sawˉluꞈ lehˬ laiˉ chaw ceuˬ htaꞈ bon maˍ piˇ tuˬ ngaˬ leuˆ yuˬ taˍ ve yoˬ.’

Aˍnaˍniˆ Sawˉluꞈ geh kʼai leh kʼoˆ piˇ ve, ‘awˬ viˉ awˬ nyi Sawˉluꞈ˗oˬ, nawˬ mehˆ kʼawꞈ mawˬ la tuˬ Yeˍsuˆ ngaˬ htaꞈ nawˬ geh kʼai leh ga piˇ tcuh laˇ ve yoˬ.’ Oˇ ve teˇ yanˇ Sawˉluꞈ mehˆ mawˬ la ve yoˬ. Sawˉluꞈ Yeˍsuˆ ve awˬ lawn henˇ leh Baˆtiˆsaˬ haꞈ yuˬ leh awˬ laꞈ gʼawˇ hpehꞈ la ve yoˬ. Peuˬ hkʼawꞈ nawˉ, yawˇ leh Hkriꞈ yaˇ hui Yuˇdaꞈ ve bon yehˬ hkʼaw bon tanˬ maˍ ve yoˬ. Yawˇ Yeˍsuˆ ve awˬ lawn shu htaꞈ bon maˍ piˇ htaˇ, Yuˇdaꞈ chaw anˇ jaˇ. Yawˇ hui kʼoˆ daꞈ ve, ‘chi  hpaˇ lehˬ Yeˍsuˆ ve awˬ laꞈ gʼawˇ hui htaꞈ te luˬ shehˍ hpaˇ hpehꞈ ve maˇ heˆ laˇ?’

Sawˉluꞈ Daˍmaˍsehˆ venˇ hkʼaw 3 hkʼawꞈ hkʼa gaˬ bon maˍ ve yoˬ. Yuˇdaꞈ chaw yawˇ htaꞈ nyi bawˬ jaˇ leh tiˇ pehˍ tuˬ awˬ hkʼaˇ gu chehˇ ve yoˬ. Yaꞈ hkʼaˇ, Sawˉluꞈ hpaw˗e gʼa tuˬ awˬ viˉ awˬ nyi ga piˇ ve yoˬ. Yawˇ hui Sawˉluꞈ htaꞈ hkʼaˉ puˍ lu hkʼaw keu leh lanˇ venˇ awˬ baˬ lo yawˇ htaꞈ hpehˇ yaꞈ˗e ve yoˬ.

Sawˉluꞈ Yeˍruˆsaˍlehnˍ lo gaˬ la htaˇ, oˇ kaˬ lo ve Hkriꞈ yaˇ htaꞈ awˬ chawˇ hpehꞈ tuˬ te ve yoˬ. Yaꞈ hkʼaˇ, awˬ laꞈ gʼawˇ hui yawˇ htaꞈ kawˆ ve yoˬ. Baˍnaˍbaˆ meh ve teˇ gʼaˇ Sawˉluꞈ htaꞈ tcuh yaˇ hui geh shiˍ kʼai leh Sawˉluꞈ Yeˍsuˆ ve awˬ laꞈ gʼawˇ hpehꞈ˗oˬ ve tehꞈ yawˇ htawˆ hkanˍ ve yoˬ. Sawˉluꞈ nyi ma pfuhˇ ve hkʼaw Yeˍruˆsaˍlehnˍ venˇ Hkriꞈ yaˇ awˬ moˍ geh teˇ geh bon maˍ ve yoˬ. Peuˬ leh yawˇ ve awˬ meh Pawˇluꞈ tehꞈ kʼawꞈ meh ve yoˬ.