Paˍmoˆ conˇ lo tcuh yaˇ Yoˇhanˬ htawnˍ yaˇ hpehꞈ chehˇ htaˇ, awˬ gʼuˇ suhˍ hpawˇ hpehꞈ la tuˬ ve awˬ heˆ 16 ceuˬ Yeˍsuˆ Yoˇhanˬ htaꞈ zuhꞈ maˆ mawˬ tcuh ve yoˬ. Zuhꞈ maˆ chi ve hkʼaw mawˬ ve Yaˬhoˉvaˬ yawˇ ve awˬ meh htaꞈ yawˆ yan tuˬ te piˇ lawˬ leh yawˇ ve mvuhˇ miˬ, miˬ guiˬ hkʼoˆ uˉ peunˍ la tuˬ yoˬ tehꞈ shiˍ tuˬ te piˇ ve yoˬ. Leh mvuhˇ naw ma hkʼoˆ leh miˬ guiˬ hkʼoˆ Gʼuiˬ sha dawˇ law taˍ ve hkʼe hpehꞈ la tuˬ yoˬ.

Zuhꞈ maˆ teˇ maˬ hkʼaw Yaˬhoˉvaˬ awˬ meꞈ awˬ hponˇ cawˬ ve kʼaw jaw hkʼoˆ mui taˍ ve htaꞈ gʼa mawˬ ve yoˬ. Kʼaw jaw awˬ gʼuˇ suhˍ lo chaw mawˇ chaw kehˉ 24 gʼaˇ aˉ poꞈ hpuˉ˗ehˍ veuꞈ leh shi uˉ tcuhˍ hkʼawˆ taˍ ve htaꞈ gʼa mawˬ ve yoˬ. Gʼuiˬ sha ve kʼaw jaw lo mvuhˇ tiˉ po˗eꞈ ba tawˆ la ve yoˬ. Chaw mawˇ chaw kehˉ 24 gʼaˇ boˆ taˍ leh Yaˬhoˉvaˬ htaꞈ oˉ kʼoˍ pui ve yoˬ. Yoˇhanˬ zuhꞈ maˆ teˇ maˬ kʼawꞈ mawˬ ve, chaw teˇ ceuˬ le le leh mvuhˇ miˬ teˇ peˆ le le hkʼaw laˬ ve chaw awˬ moˍ lonˉ Yaˬhoˉvaˬ htaꞈ oˉ kʼoˍ pui la ve yoˬ. Gʼuiˬ sha ve yawˬ ehˉ Yeˍsuˆ yawˇ hui htaꞈ nyi haꞈ shaˉ leh a shaꞈ teꞈ piˇ lawˬ ve iˉ kaˆ lawˬ paˇ lo shiˍ kʼai piˇ ve yoˬ. Peuˬ leh Yoˇhanˬ Yeˍsuˆ mvuhˇ naw ma hkʼoˆ Jawˇmawˇ te leh chaw mawˇ chaw kehˉ 24 gʼaˇ yawˇ geh uˉ peunˍ chehˇ ve htaꞈ mawˬ sheˍ ve yoˬ. Yoˇhanˬ kʼawꞈ mawˬ sheˍ ve Yeˍsuˆ cawˇ shehˍ ma lonˉ htaꞈ bawˆ daꞈ ve yoˬ. Oˇ ve lehˬ Saˍtanˍ leh neˇ teˇ hpaˍ yoˬ. Yeˍsuˆ Saˍtanˍ leh neˇ teˇ hpaˍ htaꞈ miˬ guiˬ hkʼoˆ lo gʼaꞈ ce piˇ ve yoˬ.

 Oˇ ve hkʼawꞈ nawˉ, Yoˇhanˬ anˇ lawꞈ lawꞈ ve zuhꞈ maˆ kʼawꞈ mawˬ ve yoˬ. Gʼuiˬ sha ve yawˬ ehˉ leh 144,000 gʼaˇ Ziˉonˍ hkʼaw hkʼoˆ huˉ chehˇ taˍ ve htaꞈ gʼa mawˬ ve yoˬ. Gʼuiˬ sha htaꞈ kawˆ leh yawˇ htaꞈ chiˇ mvuh gaˇ ve chaw htaꞈ mvuhˇ naw ma tcuh yaˇ teˇ gʼaˇ miˬ guiˬ hkʼoˆ teˇ kaˬ le le lo poˬ kʼai leh maˍ piˇ chehˇ ve htaꞈ Yoˇhanˬ gʼa mawˬ ve yoˬ.

Aˍmaˍgeˍdonˍ hkʼaw bawˆ daꞈ chehˇ ve htaꞈ Yoˇhanˬ kʼawꞈ mawˬ ve yoˬ. Yeˍsuˆ leh yawˇ ve maꞈ moˍ Saˍtanˍ htaꞈ bawˆ gʼaˇ leh yawˇ ve kanˉ hkʼaˇ htaꞈ te luˬ piˇ ve yoˬ. Yoˇhanˬ ve zuhꞈ maˆ awˬ leh meuˇ teˇ maˬ mvuhˇ naw ma hkʼoˆ leh miˬ guiˬ hkʼoˆ cawˇ daꞈ hawˍ daꞈ ve htaꞈ mawˬ ve yoˬ. Saˍtanˍ leh yawˇ ve awˬ yaˇ awˬ duˬ htaꞈ te luˬ piˇ ve yoˬ. Mvuhˇ naw ma hkʼoˆ leh miˬ guiˬ hkʼoˆ a shaꞈ teꞈ ve hkʼa peu˗eˬ Yaˬhoˉvaˬ ve awˬ meh htaꞈ yawˆ yan te piˇ leh yawˇ htaꞈ ceh tiˉ oˉ kʼoˍ pui tuˬ yoˬ.