Aˍdanˍ leh Eˇvaꞈ Eˍdenˍ hko hkʼaw tawˆ˗e peuˬ hkʼawꞈ nawˉ, yaˇ laiˉ gʼaˇ cawˬ la ve yoˬ. Yaˇ paˍ awˉ lawˉ teˇ gʼaˇ Kaˍiˉnaˆ meh leh muiˬ caˇ paˍ hpehꞈ ve yoˬ. Nyiˇ gʼaˇ teˇ gʼaˇ Aˍbeˍlaˆ meh leh yawˬ hawˉ paˍ hpehꞈ ve yoˬ.

Teˇ nyi htaˇ, Kaˍiˉnaˆ leh Aˍbeˍlaˆ Yaˬhoˉvaˬ htaꞈ ca tuˉ tanˇ ve yoˬ. Tuˉ tanˇ tuˬ lehˬ aˬ htoꞈ ma le? Oˇ ve lehˬ Gʼuiˬ sha htaꞈ piˇ tuˬ ve laꞈ shawnˍ hpehꞈ ve yoˬ. Yaˬhoˉvaˬ Aˍbeˍlaˆ ve tanˇ tuˬ htaꞈ dawˇ cawˇ ve yoˬ. Yaꞈ hkʼaˇ, Kaˍiˉnaˆ ve tanˇ tuˬ htaꞈ maˇ dawˇ cawˇ. Hkʼe te leh, Kaˍiˉnaˆ nyi ma zuhˆ jaˇ. Yaˬhoˉvaˬ yawˇ htaꞈ shaˍ tiꞈ piˇ ve, nawˬ nyi ma zuhˆ ve kʼo, maˇ daꞈ ve awˬ ceuˬ te la tuˬ yoˬ. Yaꞈ hkʼaˇ, Kaˍiˉnaˆ maˇ na yuˬ.

Kaˍiˉnaˆ Aˍbeˍlaˆ htaꞈ kʼoˆ piˇ ve, ‘hkeuꞈ heh puiˉ hkʼaw lo kʼai yoˬ.’ Yawˇ huiˉ maˬ heh puiˉ hkʼaw lo teˇ geh chehˇ htaˇ, Kaˍiˉnaˆ awˬ nyi paˍ htaꞈ tiˇ pehˍ  ve yoˬ. Awˬ lawn chi htaꞈ Yaˬhoˉvaˬ hkʼaˬ hkʼe te tuˬ le? Yaˬhoˉvaˬ Kaˍiˉnaˆ htaꞈ ciˍ yanˍ piˇ ve yoˬ. Yawˇ Kaˍiˉnaˆ vuiˇ kuiˬ lo ca chehˇ tcuh leh aˉ hkʼaw kʼawꞈ la tuˬ a hkaw˗anˬ maˇ piˇ ve yoˬ.

Ngaˬ hui aˬ htoꞈ ma gʼa henˇ ve le? Ngaˬ hui dawˇ taˍ ve hkʼe maˇ hpehꞈ la ve kʼo, nyi ma zuhˆ tuˬ yoˬ hehˉ. Ngaˬ hui nyi ma tanˬ zuhˆ htaˇ, maˇ heˆ leh chaw teˇ gʼaˇ mawˬ leh shaˍ tiꞈ peꞈ laˇ ve kʼo, ngaˬ hui nyi ma yuˬ tiˍ gʼaˇ tuˬ haˆ gu cawˇ ve yoˬ. Nyi ma zuhˆ ve ngaˬ hui htaꞈ taˇ gʼaˇ tcuh.

Aˍbeˍlaˆ Yaˬhoˉvaˬ htaꞈ haꞈ leh yawˇ nyi ma cawˇ ve htaꞈ te ve pa taw, Yaˬhoˉvaˬ yawˇ htaꞈ maˇ leunˇ taˬ. Gʼuiˬ sha miˬ guiˬ chi htaꞈ paˍraˍdiˇsuˆ hpehꞈ la tcuh htaˇ, Aˍbeˍlaˆ htaꞈ kʼawꞈ teꞈ tu la piˇ tuˬ yoˬ.