Baˍbuˍlonˍ venˇ htaꞈ maˇ vuiˇ daꞈ ve venˇ teˇ venˇ cawˬ ve Uˇraˆ meh ve yoˬ. Venˇ chi hkʼaw chehˇ ve chaw Yaˬhoˉvaˬ htaꞈ oˉ kʼoˍ maˇ pui. Awˬ nu ve gʼuiˬ sha laiˉ gʼaˇ htaꞈ oˉ kʼoˍ pui ve yoˬ. Yaꞈ hkʼaˇ, Uˇraˆ venˇ hkʼaw chehˇ ve teˇ gʼaˇ Yaˬhoˉvaˬ htaꞈ ceh tiˉ oˉ kʼoˍ pui ve yoˬ. Yawˇ lehˬ Aˍbraˍhanˍ meh ve yoˬ.

Yaˬhoˉvaˬ Aˍbraˍhanˍ htaꞈ kʼoˆ piˇ ve, ‘nawˬ ve mvuhˇ miˬ, nawˬ ve awˬ ceuˬ awˬ hkʼaˇ htaꞈ teh taˉ leh, ngaˬ maˍ laˇ ve mvuhˇ miˬ lo kʼai˗o.’ Leh Gʼuiˬ sha yawˇ htaꞈ ka tiꞈ te piˇ ve, ‘nawˬ htaꞈ chaw ceuˬ lonˉ hpehꞈ la piˇ leh nawˬ htaꞈ pa taw, miˬ guiˬ chaw yaˇ ngaˬ geh daꞈ ve awˬ ceuˬ gʼa tuˬ yoˬ.’

Aˍbraˍhanˍ lehˬ Yaˬhoˉvaˬ hkʼaˬ kaˬ lo kʼai tcuh laˇ tuˬ maˇ shiˍ ve htawˇ, yawˇ Yaˬhoˉvaˬ htaꞈ gʼaˇ va ve yoˬ. Hkʼe te leh, Aˍbraˍhanˍ yawˇ ve awˬ miˇ ma Saˍraˇ, awˬ pa Teˍraˆ, leh awˬ shaˍ paˍ Lawˇtaˍ, yawˇ hui mawˇ gʼawˆ leh Gʼuiˬ sha kʼoˆ taˍ ve hkʼe tawˆ kʼai ve yoˬ.

 Aˍbraˍhanˍ leh yawˇ ve awˬ ceuˬ awˬ hkʼaˇ htaꞈ Yaˬhoˉvaˬ mawˬ tcuh gaˇ ve mvuhˇ miˬ lo gaˬ la htaˇ, Aˍbraˍhanˍ a shaꞈ 75 hkʼawꞈ gaˬ ve yoˬ. Mvuhˇ miˬ oˇ ve Hkaˍnanˍ meh ve yoˬ. Oˇ kaˬ lo Gʼuiˬ sha Aˍbraˍhanˍ htaꞈ tawˇ yaw piˇ leh ka tiꞈ te piˇ ve, ‘mvuhˇ miˬ chi ve ngaˬ nawˬ ve awˬ ceuˬ awˬ hkʼaˇ htaꞈ piˇ laˇ tuˬ yoˬ.’ Yaꞈ hkʼaˇ, Aˍbraˍhanˍ leh Saˍraˇ mawˇ la peuˬ yaˇ kaꞈ maˇ cawˬ sheˍ. Yaˬhoˉvaˬ yawˇ ka tiꞈ te taˍ ve htaꞈ awˬ tehˬ awˬ na biˇ la tuˬ, yawˇ hkʼaˬ hkʼe te tuˬ le?