Aˍbraˍhanˍ yawˇ ve yaˇ paˍ Iˉcaˆ Yaˬhoˉvaˬ htaꞈ haꞈ tuˬ, Yaˬhoˉvaˬ ve ka tiꞈ teˇ ceuˬ le le htaꞈ yonˍ gʼa tuˬ maˍ piˇ ve yoˬ. Yaꞈ hkʼaˇ, Iˉcaˆ a shaꞈ aˬ laˬ hkʼe 25 hkʼawꞈ htaˇ, haˍ jaˇ ve teˇ ceuˬ Yaˬhoˉvaˬ Aˍbraˍhanˍ htaꞈ te tcuh ve yoˬ. Gʼuiˬ sha yawˇ htaꞈ aˬ htoꞈ ma te tcuh ve le?

Gʼuiˬ sha Aˍbraˍhanˍ htaꞈ kʼoˆ piˇ ve, ‘nawˬ haꞈ jaˇ ve yaˇ paˍ teˇ gʼaˇ tiˉ cawˬ ve ngaˬ htaꞈ tuˉ tanˇ laˇ tuˬ Mawˇriˆ mvuhˇ miˬ lo shiˍ kʼai˗o.’ Aˬ htoꞈ ma te Yaˬhoˉvaˬ chi hkʼe te tcuh ve Aˍbraˍhanˍ maˇ shiˍ. Yaꞈ hkʼaˇ, yawˇ Yaˬhoˉvaˬ hkawˇ na yuˬ ve yoˬ.

Shawˉ pawˍ gaˬ leh Aˍbraˍhanˍ lehˬ Iˉcaˆ leh awˬ ceˬ paˍ nyiˇ gʼaˇ htaꞈ shiˍ veu leh Mawˇriˆ mvuhˇ miˬ lo kʼai ve yoˬ. Yawˇ hui yaꞈ kʼaw juˇ ve shehˆ nyi gaˬ leh vuiˇ kuiˬ lo hkʼaw pui oˇ ve htaꞈ gʼa mawˬ ve yoˬ. Aˍbraˍhanˍ awˬ ceˬ paˍ htaꞈ choˬ kaˬ lo law taˍ˗oꞈ tehꞈ kʼoˆ piˇ leh yawˇ Iˉcaˆ htaꞈ shiˍ veu leh ca tuˉ tanˇ˗e ve yoˬ. Aˍbraˍhanˍ Iˉcaˆ htaꞈ suhˆ taˆ tcuh ve yoˬ. Yawˇ kʼo aˉ htaw ka taˍ ve yoˬ. Iˉcaˆ awˬ pa htaꞈ na nyi piˇ ve, ‘a pa˗oˬ, tuˉ tanˇ tuˬ yawˬ ehˉ hkʼaˬ lo le?’ Aˍbraˍhanˍ hkʼawꞈ piˇ ve, ‘ngaˬ yaˇ paˍ˗oˬ, Yaˬhoˉvaˬ gu taˍ laˇ tuˬ yoˬ.’

Hkʼaw pui hkʼoˆ lo gaˬ la htaˇ, yawˇ huiˉ maˬ tuˉ tanˇ kuiˬ te peuˬ hkʼawꞈ nawˉ, Aˍbraˍhanˍ Iˉcaˆ hkui sheh laꞈ sheh htaꞈ hpeh tsuhꞈ leh tuˉ tanˇ kuiˬ suhˆ hpoˆ hkʼoˆ chiˇ teh taˍ ve yoˬ.

Aˍbraˍhanˍ aˉ htaw ka taˍ ve yoˬ. Oˇ teˇ yanˇ, Yaˬhoˉvaˬ ve mvuhˇ naw ma tcuh yaˇ yawˇ htaꞈ kʼoˆ piˇ ve, ‘Aˍbraˍhanˍ˗oˬ! Nawˬ ve yaˇ paˍ htaꞈ teꞈ chiˉ taˇ te. Nawˬ yaˇ paˍ teˇ gʼaˇ tiˉ cawˬ ve htawˇ maˇ sheˉ lai leh tuˉ tanˇ ve pa taw, nawˬ Gʼuiˬ sha hkawˇ na yuˬ puiˉ ve chaw hpehꞈ  ve htaꞈ chi beuꞈ ngaˬ gʼa shiˍ peuˬ.’ Oˇ ve hkʼawꞈ nawˉ, Aˍbraˍhanˍ yawˬ awˬ paˍ teˇ hkeh awˬ hkaw suhˆ buiˇ hkʼaw kʼaˉ taˍ ve htaꞈ gʼa mawˬ ve yoˬ. Aˍbraˍhanˍ Iˉcaˆ htaꞈ haˆ te hpui baˬ leh yawˬ oˇ ve htaꞈ yuˬ leh tuˉ tanˇ ve yoˬ.

Oˇ htaˇ tanˬ leh Yaˬhoˉvaˬ Aˍbraˍhanˍ htaꞈ awˬ chawˇ tehꞈ kuˬ ve yoˬ. Aˬ htoꞈ ma pa taw le shiˍ˗aˬ laˇ? Awˬ lawn kʼo, Yaˬhoˉvaˬ te tcuh ve awˬ ceuˬ Aˍbraˍhanˍ maˇ shiˍ ve htawˇ, Aˍbraˍhanˍ teˇ ceuˬ le le te ve yoˬ.

Yaˬhoˉvaˬ Aˍbraˍhanˍ htaꞈ ka tiꞈ teˇ pawˆ kʼawꞈ te piˇ ve, ‘ngaˬ nawˬ ve awˬ ceuˬ awˬ hkʼaˇ maˇ la piˇ tuˬ yoˬ.’ Kʼoˆ gaˇ ve lehˬ Aˍbraˍhanˍ htaꞈ cuˇ leh daꞈ ve chaw teˇ gʼaˇ le le Yaˬhoˉvaˬ awˬ bon naꞈ piˇ tuˬ yoˬ.