Lawˇtaˍ Hkaˍnanˍ mvuhˇ miˬ lo yawˇ ve aˉ shuˍ paˍ Aˍbraˍhanˍ geh chehˇ ve yoˬ. Awˬ yanˇ maw la leh, Aˍbraˍhanˍ leh Lawˇtaˍ ceˇ caˬ maˇ jaˇ ve pa taw, teˇ geh maˇ chehˇ gʼa. Aˍbraˍhanˍ Lawˇtaˍ htaꞈ kʼoˆ piˇ ve, ‘nawˬ chehˇ gaˇ ve chehˇ kuiˬ htaꞈ leuˆ yuˬ˗oꞈ. Nawˬ teˇ hpawˇ kʼai ve kʼo, ngaˬ awˬ nu ve teˇ hpawˇ lo kʼai tuˬ yoˬ.’ Aˍbraˍhanˍ yawˇ awˬ to pon ceh tiˉ maˇ dawˇ nyi ve mawˬ˗aw laˇ?

Lawˇtaˍ Sawˉdonˍ venˇ paˇ lo daꞈ jaˇ ve awˬ ti teˇ tawn leuˆ yuˬ ve yoˬ. Oˇ kaˬ lo mvuhꞈ nawˉ lehˍ cawˬ lehˬ iˉ kaˆ daꞈ jaˇ. Lawˇtaˍ leh yawˇ ve yehˬ kʼa oˇ kaˬ lo ca chehˇ˗e ve yoˬ.

Sawˉdonˍ venˇ lehˬ Gawˇmawˇraꞈ venˇ awˬ paˇ lo dawꞈ chehˇ taˍ ve yoˬ. Chi 2 venˇ hkʼaw chehˇ ve chaw haiˬ jaˇ. Yawˇ hui htaꞈ te luˬ tuˬ, Yaˬhoˉvaˬ dawˇ cheˆ taˍ peuˬ. Yaꞈ hkʼaˇ, Lawˇtaˍ ve yehˬ kʼa htaꞈ Gʼuiˬ sha ponˬ piˇ gaˇ ve yoˬ. Hkʼe te leh yawˇ hui “venˇ chi hkʼaw haˆ haˆ tawˆ kʼai” tuˬ Gʼuiˬ sha mvuhˇ naw ma tcuh yaˇ 2 gʼaˇ htaꞈ kʼai peu leh shaˍ tiꞈ piˇ tcuh ve yoˬ. ‘Yaˬhoˉvaˬ venˇ chi htaꞈ te luˬ piˇ tuˬ yoˬ.’

Lawˇtaˍ naiˇ naiˇ te chehˇ ve pa taw, yawˇ ve awˬ miˇ ma leh yawˇ ve yaˇ miˇ 2 gʼaˇ ve laꞈ sheh htaꞈ mvuhˇ naw ma tcuh yaˇ gʼawˬ leh venˇ baˬ lo shiˍ tawˆ˗e ve yoˬ. Mvuhˇ naw ma tcuh yaˇ yawˇ hui htaꞈ kʼoˆ piˇ ve, ‘nawˬ hui gʼa ponˬ tuˬ, gʼaˇ hteꞈ gʼuiˇ hpaw˗e loˬ. Awˬ hkʼawꞈ nawˉ taˇ kʼawꞈ hpfuhˆ nyi. Hpfuhˆ nyi ve kʼo, gʼa suh tuˬ yoˬ!’

Yawˇ hui Zawˇraˆ venˇ lo gaˬ la htaˇ, Yaˬhoˉvaˬ Sawˉdonˍ venˇ leh Gawˇmawˇraꞈ venˇ htaꞈ mvuhˇ yeˬ hkʼa shuˍ mvuhˇ naw ma lo aˬ miˍ leh maꞈ shiˉ ce la piˇ ve yoˬ. Venˇ chi 2 venˇ teꞈ chiˉ kaꞈ maˇ leuˉ˗o. Lawˇtaˍ ve awˬ miˇ  ma Yaˬhoˉvaˬ hkawˇ maˇ na yuˬ ve yoˬ. Yawˇ hkʼawꞈ nawˉ hpfuhˆ nyi leh aˉ lehꞈ hkuiˉ daw hpehꞈ kʼai ve yoˬ! Yaꞈ hkʼaˇ, Lawˇtaˍ leh awˬ yaˇ miˇ 2 gʼaˇ Yaˬhoˉvaˬ hkawˇ na yuˬ leh ponˬ ve yoˬ. Lawˇtaˍ ve awˬ miˇ ma maˇ na yuˬ ve pa taw, yawˇ hui nyi ma luˬ jaˇ ve yoˬ hehˉ. Awˬ lawn chi ve Yaˬhoˉvaˬ hkawˇ na yuˬ ve a yeˇ uiˍ jaˇ tehꞈ ngaˬ hui htaꞈ maˍ laˇ ve yoˬ.