Yaˬhoˉvaˬ Yaˍkoˆ htaꞈ ka tiꞈ te piˇ ve, Aˍbraˍhanˍ leh Iˉcaˆ htaꞈ nyi haꞈ shaˉ piˇ jaw ve hkʼa shuˍ, nawˬ htaꞈ kaꞈ nyi haꞈ shaˉ laˇ tuˬ yoˬ. Yaˍkoˆ Haˍranˍ venˇ hkʼaw chehˇ ve yoˬ. Yawˇ oˇ kaˬ lo awˬ miˇ ma heuˆ leh yehˬ kʼa lonˉ hpehꞈ la leh paw sha jaˇ.

Awˬ hkʼawꞈ nawˉ htaˇ, Yaˬhoˉvaˬ Yaˍkoˆ htaꞈ kʼoˆ piˇ ve, ‘nawˬ paw kuiˬ mvuhˇ miˬ lo kʼawꞈ kʼoꞈ˗e loˬ’ Yaˍkoˆ leh yawˇ ve yehˬ kʼa yaꞈ kʼaw gʼa juˇ vuiˇ jaˇ. Yaꞈ kʼaw kʼaˉ lo chaw teˇ gʼaˇ laˬ leh Yaˍkoˆ htaꞈ kʼoˆ piˇ ve, ‘nawˬ viˉ paˍ Iˉsawˇ chaw 400 gʼaˇ htaꞈ shiˍ leh laˬ chehˇ ve yoˬ!’ Yaˍkoˆ yawˇ leh yawˇ ve yehˬ kʼa htaꞈ Iˉsawˇ yaꞈ la tuˬ ve htaꞈ kawˆ ve yoˬ. Yawˇ Yaˬhoˉvaˬ geh bon lawˬ leh kʼoˆ ve, ‘ngaˬ viˉ paˍ Iˉsawˇ ve laꞈ sheh hkʼaw a ciˉ ponˬ laˇ˗oˆ.’ Hkʼawꞈ nawˉ teˇ nyi gaˬ leh Yaˍkoˆ Iˉsawˇ htaꞈ laꞈ shawnˍ piˇ tuˬ yawˬ, aˉ cheꞈ, nuˇ, kaˍlaˍoˆ, piˉ laˬ maˇ maˇ yuˬ kʼai ve yoˬ.

Oˇ teˇ haˉ htaˇ, Yaˍkoˆ teˇ gʼaˇ tiˉ chehˇ taˍ ve teˇ yanˇ, mvuhˇ naw ma tcuh yaˇ teˇ gʼaˇ htaꞈ teˇ haˉ mvuhˇ hkʼa htiˇ behˇ daꞈ ve yoˬ. Yaˍkoˆ gʼa naˬ ve htawˇ, yawˇ maˇ hpehˇ. Mvuhˇ naw ma tcuh yaˇ yawˇ htaꞈ kʼoˆ piˇ ve, ‘ngaˬ htaꞈ hpehˇ laˇ˗oˆ.’ Yaˍkoˆ kʼawꞈ kʼoˆ ve, ‘nawˬ ngaˬ htaꞈ awˬ bon maˇ naꞈ laˇ ve kʼo maˇ hpehˇ.’ Yaˍkoˆ yawˇ htaꞈ Yaˬhoˉvaˬ nyi haꞈ shaˉ laˇ ve htaꞈ yonˍ gʼa tuˬ yawˇ chi hkʼe kʼoˆ ve yoˬ.

Awˬ leh meuˇ gaˬ leh mvuhˇ naw ma tcuh yaˇ yawˇ htaꞈ awˬ bon naꞈ piˇ ve yoˬ. Yaˬhoˉvaˬ lehˬ Iˉsawˇ Yaˍkoˆ htaꞈ awˬ tehˬ awˬ na maˇ te luˬ tcuh ve tehꞈ chi teˇ hkui yawˇ shiˍ ve yoˬ.

Oˇ ve teˇ shawˉ Iˉsawˇ chaw 400 gʼaˇ shiˍ laˬ chehˇ ve htaꞈ Yaˍkoˆ gʼa mawˬ ve yoˬ. Yaˍkoˆ lehˬ yawˇ ve yehˬ yaˇ kʼa yaˇ hkʼa peu˗eˬ awˬ gʼaˇ suhˍ lo kʼai tcuh leh  awˬ viˉ paˍ Iˉsawˇ mehˆ gʼuˇ suhˍ lo yawˇ boˆ sheˬ leh suhˍ pawˆ hkʼa gaˬ oˉ kʼoˍ pui ve yoˬ. Iˉsawˇ Yaˍkoˆ htaꞈ behˇ kʼuˉ sheˬ ve yoˬ. Yawˇ huiˉ maˬ hawˍ leh kʼawꞈ cawˇ daꞈ la ve yoˬ. Nawˬ dawˇ kʼo, Yaˍkoˆ kʼawꞈ cawˇ daꞈ tuˬ yawˇ gu ve awˬ hkʼaˇ Yaˬhoˉvaˬ hkʼaˬ hkʼe dawˇ ve le?

Oˇ ve hkʼawꞈ nawˉ, Iˉsawˇ yawˇ ve aˉ hkʼaw lo kʼawꞈ kʼoꞈ˗e ve yoˬ. Yaˍkoˆ htawˇ yawˇ paw kuiˬ mvuhˇ miˬ lo kʼoꞈ˗e ve yoˬ. Yaˍkoˆ yaˇ paˍ 12 gʼaˇ cawˬ ve yoˬ. Ruˇbenˍ, Suˉmonˍ, Leˍviˆ, Yuˇdaꞈ, Danˍ, Naˍtaˍliˆ, Gaˆ, Aˍshaˍ, Iˉsaˍhkaˍ, Zaˍbuˆlonˍ, Yoˇsehꞈ, Beˍyaˍmenˍ hui hpehꞈ ve yoˬ. Maˇ maw maw kʼo, Yaˬhoˉvaˬ yawˇ ve chaw htaꞈ ga piˇ tuˬ, yawˇ Yoˇsehꞈ htaꞈ yehˇ ve yoˬ. Gʼuiˬ sha yawˇ htaꞈ hkʼaˬ hkʼe te yehˇ tuˬ le shiˍ˗aˬ laˇ? Teˇ geh nyi sheˍ.