Gʼuiˬ sha Moˉseˍ leh Aˍronˍ Hpaˍrawˇ htaꞈ ca kʼawꞈ kʼoˆ piˇ tcuh ve, ‘ngaˬ ve chaw htaꞈ maˇ kʼawꞈ hpehˇ laˇ sheˍ ve kʼo, ngaˬ mvuhˇ miˬ chi hkʼaw puiˉ ma cawˬ la piˇ tuˬ yoˬ.’ Puiˉ ma chi teˇ hpaˍ Eˇjiˇtuꞈ chaw paw sha ve leh haˍ gʼawˇ ve chaw aˉ hkʼaw loꞈ˗e tuˬ yoˬ. Miˬ guiˬ hkʼa peu˗eˬ hkʼoˆ puiˉ ma biˇ kʼai ve yoˬ. Yaꞈ hkʼaˇ, Iˉsaˍreˍlaˆ chaw chehˇ taˍ ve Gawˍshenˍ mvuhˇ miˬ hkʼaw puiˉ ma teˇ hkeh kaꞈ maˇ cawˬ. Chi lehˬ kawˆ tuˬ uiˍ ve 4 ceuˬ teˇ ceuˬ htaꞈ tanˬ leh Eˇjiˇtuꞈ chaw htaꞈ ceh tiˉ te luˬ te sheˆ piˇ ve yoˬ. Hpaˍrawˇ lawˬ hkawˉ leh kʼoˆ ve, ‘puiˉ ma chi teˇ hpaˍ htaꞈ yuˬ baˬ laˇ tuˬ, Yaˬhoˉvaˬ geh bon lawˬ laˇ˗oˆ. Oˇ ve hkʼawꞈ nawˉ, ngaˬ Iˉsaˍreˍlaˆ chaw htaꞈ hpehˇ piˇ tuˬ yoˬ.’ Yaꞈ hkʼaˇ, Yaˬhoˉvaˬ yawˇ hui geh puiˉ ma maˇ cawˬ tcuh ve teˇ yanˇ, Hpaˍrawˇ nyi ma kʼawꞈ pa ve yoˬ. Hpaˍrawˇ Yaˬhoˉvaˬ htaꞈ tawˍ daꞈ maˇ gʼaˇ tehꞈ haꞈ yuˬ cawˇ ve maˇ heˆ laˇ?

Yaˬhoˉvaˬ kʼoˆ ve, ‘Hpaˍrawˇ nawˬ ngaˬ ve chaw htaꞈ maˇ hpehˇ laˇ sheˍ ve kʼo, Eˇjiˇtuꞈ ve ceˇ caˬ naˬ leh suh kʼai tuˬ yoˬ.’ Awˬ hkʼawꞈ nawˉ teˇ nyi gaˬ leh ceˇ caˬ suh kʼai ve yoˬ. Yaꞈ hkʼaˇ, Iˉsaˍreˍlaˆ chaw ve ceˇ caˬ teˇ hkeh kaꞈ maˇ suh. Hpaˍrawˇ nyi ma kʼawꞈ heh leh Iˉsaˍreˍlaˆ chaw htaꞈ maˇ kʼawꞈ hpehˇ piˇ sheˍ ve yoˬ.

Yaˬhoˉvaˬ Moˉseˍ htaꞈ kʼoˆ piˇ ve, hkʼawꞈ laˉ hkaˆ veu leh Hpaˍrawˇ geh kʼai leh mvuhˇ hpe lo baˬ peu˗o. Hkʼawꞈ laˉ jeꞈ meu˗e hkʼa shuˍ hkʼaˬ ti chi ti lo gaˬ leh Eˇjiˇtuꞈ chaw htaꞈ nehˉ ve yoˬ. Eˇjiˇtuꞈ mvuhˇ miˬ hkʼaˬ ti chi ti lo chaw yaˇ leh to nuˇ to shaˆ shaˉ chuˇ tawˆ la piˇ ve yoˬ. Yaꞈ hkʼaˇ, Hpaˍrawˇ Iˉsaˍreˍlaˆ chaw htaꞈ maˇ kʼawꞈ hpehˇ piˇ.

Yaˬhoˉvaˬ Moˉseˍ Hpaˍrawˇ htaꞈ ca kʼawꞈ kʼoˆ piˇ tcuh ve, ‘aˬ htoꞈ ma te ngaˬ ve chaw htaꞈ maˇ kʼawꞈ hpehˇ piˇ sheˍ ve le? Shawˉ pawˍ kʼo, ngaˬ hehnˇ jaˇ ve vaˇ shiˍ ce  la piˇ tuˬ yoˬ.’ Awˬ hkʼawꞈ nawˉ teˇ nyi gaˬ leh Yaˬhoˉvaˬ lehˬ Eˇjiˇtuꞈ mvuhˇ miˬ hkʼaw maˇ hpehꞈ la jaw ve hehnˇ jaˇ ve vaˇ shiˍ, mvuhˇ tawˍ mvuhˇ htehˆ, aˬ miˍ ce la piˇ ve yoˬ. Gʼawˇ hpaꞈ mvuhˬ naweh, suhˆ cehˬ hkʼa peu˗eˬ luˬ kʼai ve yoˬ. Yaꞈ hkʼaˇ, awˬ ceu chi ve teˇ hpaˍ Gawˍshenˍ lo maˇ hpehꞈ la. Hpaˍrawˇ kʼoˆ ve, ‘chi htaꞈ jehˇ kʼai tuˬ Yaˬhoˉvaˬ geh bon lawˬ laˇ˗oˆ. Oˇ ve hkʼawꞈ nawˉ, ngaˬ nawˬ hui htaꞈ hpehˇ laˇ tuˬ yoˬ.’ Yaꞈ hkʼaˇ, vaˇ shiˍ leh mvuhˇ yeˬ jehˇ peuˬ hkʼawꞈ nawˉ, Hpaˍrawˇ nyi ma kʼawꞈ pa ve yoˬ.

Hkʼe te leh Moˉseˍ kʼoˆ ve, ‘chi teˇ hkui vaˇ shiˍ ce la htaˇ maˇ luˬ leh cawˬ taˉ ve gʼawˇ hpaꞈ mvuhˬ naweh hkʼa peu˗eˬ htaꞈ te luˬ te sheˆ piˇ tuˬ, paˉ ceꞈ awˬ moˍ lonˉ cawˬ la piˇ tuˬ yoˬ.’ Oˇ ve hkʼawꞈ nawˉ, leuˉ taˍ ve awˬ ceuˬ hkʼa peu˗eˬ htaꞈ paˉ ceꞈ awˬ moˍ lonˉ te luˬ te sheˆ piˇ ve yoˬ. Hpaˍrawˇ lawˬ hkawˉ leh kʼoˆ ve, ‘paˉ ceꞈ chi teˇ hpaˍ mehˉ kʼai tuˬ Yaˬhoˉvaˬ geh bon lawˬ laˇ˗oˆ.’ Yaꞈ hkʼaˇ, Yaˬhoˉvaˬ paˉ ceꞈ htaꞈ yuˬ baˬ piˇ peuˬ hkʼawꞈ nawˉ, Hpaˍrawˇ nyi ma kʼawꞈ heh ve yoˬ.

Yaˬhoˉvaˬ Moˉseˍ htaꞈ kʼoˆ piˇ ve, ‘nawˬ ve laꞈ sheh mvuhˇ hpe lo chiˇ taˆ˗oˆ.’ Oˇ teˇ hkui naˆ hoꞈ lehˍ hpehꞈ leh Eˇjiˇtuꞈ chaw 3 nyi hkʼa gaˬ mehˆ maˇ mawˬ. Iˉsaˍreˍlaˆ chaw chehˇ kuiˬ lo ceh tiˉ awˬ gʼeuˆ cawˬ ve yoˬ.

Hpaˍrawˇ Moˉseˍ htaꞈ kʼoˆ piˇ ve, ‘ngaˬ nawˬ hui htaꞈ kʼai tcuh laˇ tuˬ yoˬ. Yaꞈ hkʼaˇ, to nuˇ to shaˆ teˇ hpaˍ taˇ yuˬ kʼai.’ Moˉseˍ kʼoˆ ve, ‘ngaˬ hui ve to nuˇ to shaˆ htaꞈ gʼa yuˬ kʼai ve yoˬ. Awˬ lawn kʼo, ngaˬ hui Gʼuiˬ sha htaꞈ to nuˇ to shaˆ gʼa tuˉ tanˇ piˇ ve yoˬ.’ Hpaˍrawˇ nyi ma zuhˆ jaˇ. Yawˇ gʼaˇ hteꞈ kuˬ leh kʼoˆ ve, ‘haˆ tawˆ kʼai lo! Nawˬ hui ngaˬ geh teˇ pawˆ kʼawꞈ laˬ ve kʼo, gʼa suh tuˬ yoˬ.’