Yoˇsehꞈ htawnˍ hkʼaw chehˇ htaˇ, Eˇjiˇtuꞈ ve jawˇ mawˇ Hpaˍrawˇ zuhꞈ maˆ mawˬ ve htaꞈ chaw teˇ gʼaˇ kaꞈ tcuhˉ kuiˬ kʼoˆ maˍ piˇ maˇ gʼa. Yawˇ ve awˬ ceˬ paˍ yawˇ htaꞈ kʼoˆ maˍ piˇ ve, Yoˇsehꞈ zuhꞈ maˆ tcuhˉ kuiˬ kʼoˆ maˍ laˇ gʼa ve yoˬ. Hpaˍrawˇ Yoˇsehꞈ htaꞈ haˆ ca shiˍ veu laˇ tcuh ve yoˬ.

Hpaˍrawˇ yawˇ htaꞈ na piˇ ve, ‘ngaˬ ve zuhꞈ maˆ tcuhˉ kuiˬ kʼoˆ maˍ laˇ gʼa˗aw laˇ?’ Yoˇsehꞈ Hpaˍrawˇ htaꞈ kʼoˆ piˇ ve, ‘Eˇjiˇtuꞈ mvuhˇ miˬ hkʼaw 7 hkʼawꞈ hkʼa gaˬ caˇ leuˉ dawˬ leuˉ cawˬ tuˬ yoˬ. Yaꞈ hkʼaˇ, oˇ ve hkʼawꞈ nawˉ, 7 hkʼawꞈ hkʼa gaˬ meuꞈ lonˉ kaˆ lonˉ gaˬ la tuˬ yoˬ. Chaw yaˇ maˇ gʼa meuꞈ suh tuˬ, Eˇjiˇtuꞈ mvuhˇ miˬ hkʼaw tawˆ ve awˬ shiˍ awˬ nu shaw hpoˆ tuˬ, cuˇ yiˍ cawˬ ve chaw htaꞈ leuˆ yuˬ˗oˬ.’ Hpaˍrawˇ kʼoˆ ve, ‘ngaˬ nawˬ htaꞈ leuˆ yuˬ ve yoˬ! Eˇjiˇtuꞈ mvuhˇ miˬ chi hkʼaw ngaˬ awˬ hawˉ lo kanˇ paˆ cawˬ ve nyiˇ gʼaˇ teˇ gʼaˇ nawˬ hpehꞈ ve yoˬ!’ Aˬ htoꞈ ma te Yoˇsehꞈ Hpaˍrawˇ ve zuhꞈ maˆ tcuhˉ kuiˬ yuˬ tawˆ gʼa ve le? Awˬ lawn kʼo, Yaˬhoˉvaˬ Yoˇsehꞈ htaꞈ ga piˇ ve yoˬ.

7 hkʼawꞈ peuˬ hkʼawꞈ nawˉ, Yoˇsehꞈ caˇ tuˬ dawˬ tuˬ hkʼa biˇ shaw hpoˆ gʼa ve yoˬ. Yoˇsehꞈ kʼoˆ taˍ ve hkʼe, miˬ guiˬ hkʼoˆ meuꞈ lonˉ kaˆ lonˉ hpehꞈ la ve yoˬ. Laiˉ kaˬ laiˉ ti lo chehˇ ve chaw laˬ leh Yoˇsehꞈ geh ca vuiˬ caˇ la ve yoˬ. Eˇjiˇtuꞈ mvuhˇ miˬ hkʼaw caˇ tuˬ cawˬ ve awˬ lawn yawˇ ve awˬ pa Yaˍkoˆ gʼa kaˇ leh yawˇ ve yaˇ paˍ 10 gʼaˇ htaꞈ oˇ kaˬ lo caˇ tuˬ ca vuiˬ tcuh ve yoˬ.

Yaˍkoˆ ve yaˇ paˍ hui Yoˇsehꞈ geh kʼai leh Yoˇsehꞈ yawˇ hui htaꞈ laꞈ haˉ tawnˇ gʼa ve yoˬ. Yaꞈ hkʼaˇ, awˬ viˉ paˍ hui yawˇ htaꞈ tawnˇ maˇ gʼa. Yawˇ yaˇ ehˉ htaˇ zuhꞈ maˆ mawˬ ve hkʼe, yawˇ hui Yoˇsehꞈ mehˆ gʼuˇ suhˍ boˆ taˍ ve yoˬ. Awˬ viˉ paˍ hui ve te hkʼaˇ oˇ htaˇ hkʼe leˇ cawˬ chehˇ sheˍ leh naˍ Yoˇsehꞈ shiˍ gaˇ ve yoˬ. Yawˇ kʼoˆ ve, ‘nawˬ hui chaw jaˆ hpehꞈ leh ngaˬ hui ve mvuhˇ miˬ hkʼaˬ lo teˇ kaˬ gʼaˇ nuˇ kuiˬ cawˬ ve htaꞈ ca jaˆ nyi la ve laˇ?’ Yawˇ hui kʼoˆ ve, ‘ maˇ heˆ. Ngaˬ hui lehˬ  Hkaˍnanˍ mvuhˇ miˬ hkʼaw chehˇ ve awˬ viˉ awˬ nyi 12 gʼaˇ cawˬ ve yoˬ. Awˬ nyi paˍ leh teˇ gʼaˇ lehˬ, awˬ pa geh chehˇ taˉ leh, teˇ gʼaˇ lehˬ suh kʼai peuˬ.’ Yoˇsehꞈ kʼoˆ ve, ‘nawˬ hui ve awˬ nyi paˍ leh htaꞈ ca kʼawꞈ shiˍ veu laˇ˗oˆ. Nawˬ hui kʼoˆ ve htaꞈ ngaˬ yonˍ tuˬ yoˬ. Hkʼe te leh yawˇ hui awˬ pa geh kʼoꞈ˗e ve yoˬ.

Caˇ tuˬ peuˬ htaˇ, Yaˍkoˆ yawˇ ve yaˇ paˍ htaꞈ Eˇjiˇtuꞈ mvuhˇ miˬ lo kʼawꞈ kʼai tcuh ve yoˬ. Chi teˇ pawˆ yawˇ hui ve awˬ nyi paˍ leh htaꞈ kaꞈ shiˍ kʼai ve yoˬ. Yoˇsehꞈ awˬ viˉ paˍ hui htaꞈ lawˇ nyi tuˬ, Beˍyaˍmenˍ ve caˬ hkʼa htuˉ pui hkʼaw hpu kawˆ hkʼawˇ keu piˇ leh awˬ viˉ paˍ hui htaꞈ chaw hkʼawˇ she pfuhˍ piˇ ve yoˬ. Yoˇsehꞈ ve awˬ ceˬ paˍ Beˍyaˍmenˍ ve htuˉ pui hkʼaw hpu kawˆ oˇ ve htaꞈ mawˬ ve teˇ yanˇ, awˬ viˉ paˍ hui cheˆ˗e kʼai ve yoˬ. Awˬ viˉ paˍ hui Beˍyaˍmenˍ ve awˬ tan yawˇ hui htaꞈ ciˍ yanˍ laˇ˗oˆ tehꞈ lawˬ hkawˉ ve yoˬ.

Chi teˇ hkui awˬ viˉ paˍ hui oˇ htaˇ hkʼe leˇ nyi ma maˇ heh ve htaꞈ gʼa shiˍ ve yoˬ. Yoˇsehꞈ yawˇ nyi ma htaꞈ yuˬ tiˍ maˇ gʼaˇ leh hawˍ leh kʼoˆ ve, ‘ngaˬ lehˬ nawˬ hui ve awˬ nyi paˍ Yoˇsehꞈ hpehꞈ ve yoˬ. A pa teꞈ chehˇ sheˍ laˇ?’ Awˬ viˉ paˍ hui anˇ jaˇ. Yaꞈ hkʼaˇ, Yoˇsehꞈ yawˇ hui htaꞈ kʼoˆ piˇ ve, ‘ngaˬ lehˬ nawˬ hui Eˇjiˇtuꞈ mvuhˇ miˬ lo hawˇ baˬ laˇ ve htaꞈ pa taw, dawˇ haˍ ve taˇ cawˬ piˇ. Gʼuiˬ sha lehˬ chaw yaˇ a shaꞈ gʼa ponˬ tuˬ, nawˬ hui awˬ gʼuˇ suhˍ ngaˬ htaꞈ choˬ kaˬ lo peu laˇ taˍ ve yoˬ. A pa htaꞈ ngaˬ geh haˆ ca shiˍ veu laˇ˗oˆ.’

Yawˇ hui awˬ pa htaꞈ daꞈ ve awˬ lawn ca kʼawꞈ hto piˇ leh Eˇjiˇtuꞈ mvuhˇ miˬ lo shiˍ laˬ ve yoˬ. Yoˇsehꞈ awˬ pa htaꞈ maˇ gʼa mawˬ daꞈ ve laiˉ hkʼawꞈ gaˬ peuˬ ve htawˇ, awˬ leh meuˇ htaˇ yawˇ huiˉ maˬ teˇ geh gʼa kʼawꞈ chehˇ ve yoˬ.