Eˇjiˇtuꞈ mvuhˇ miˬ lo Yaˍkoˆ leh yawˇ ve awˬ yaˇ awˬ duˬ htaꞈ Iˉsaˍreˍlaˆ chaw tehꞈ shu kʼoˆ ve yoˬ. Yaˍkoˆ leh Yoˇsehꞈ suh peuˬ hkʼawꞈ nawˉ, Hpaˍrawˇ awˬ suhˉ teˇ gʼaˇ kʼawꞈ uˉ peunˍ ve yoˬ. Iˉsaˍreˍlaˆ chaw Eˇjiˇtuꞈ chaw aꞈ kehˉ kanˇ paˆ cawˬ la ve htaꞈ Hpaˍrawˇ kawˆ ve pa taw, yawˇ Iˉsaˍreˍlaˆ chaw htaꞈ awˬ ceˬ nyiˉ te ve yoˬ. Li kiˉ shiˍ te tcuh leh ti mi hkʼaw kanˉ gʼaˇ hteꞈ te tcuh ve yoˬ. Yaꞈ hkʼaˇ, yawˇ hui Iˉsaˍreˍlaˆ chaw htaꞈ kanˉ gʼaˇ hteꞈ te tcuh ve kʼo, Iˉsaˍreˍlaˆ chaw shaˬ te shaˬ kʼawꞈ maˇ la ve yoˬ. Hkʼe te leh, Hpaˍrawˇ nyi ma zuhˆ jaˇ. Iˉsaˍreˍlaˆ chaw hkʼa paw la ve yaˇ paˍ htaꞈ tiˇ pehˍ tuˬ tawˇ piˇ ve yoˬ. Iˉsaˍreˍlaˆ chaw hkʼaˬ hkʼe taw kawˆ jaˇ ve htaꞈ nawˬ dawˇ mawˬ gʼa˗aw laˇ?

Iˉsaˍreˍlaˆ chaw Yawˇhkeˍbehˆ yawˇ yaˇ paˍ teˇ gʼaˇ paw la ve yoˬ. Yaˇ paˍ ehˉ chi daꞈ jaˇ ve htaꞈ maˇ gʼa tiˇ pehˍ tuˬ, po kʼoˍ hkʼaw yuˬ keu leh iˉ kaˆ gʼuiˬ pfuhˍ paˇ lo cawˬ ve lo de hkʼaw faˉ taˍ ve yoˬ. Yaˇ paˍ ehˉ ve awˬ viˉ ma Meˇriˆanˍ yawˇ ve awˬ nyi paˍ hkʼaˬ hkʼe hpehꞈ la ve htaꞈ shiˍ tuˬ awˬ paˇ lo jaˆ nyi taˍ ve yoˬ.

Hpaˍrawˇ yaˇ miˇ iˉ kaˆ ca hehˉ la htaˇ, po kʼoˍ oˇ ve htaꞈ mawˬ leh hpaw nyi ve teˇ yanˇ, yaˇ ehˉ hawˬ chehˇ ve htaꞈ yawˇ gʼa mawˬ leh ha kʼaˉ jaˇ ve yoˬ.  Meˇriˆanˍ yawˇ htaꞈ na nyi piˇ ve, ‘yaˇ paˍ ehˉ chi ve htaꞈ cuˉ taw piˇ tuˬ ve chaw heuˆ gaˇ˗aˬ laˇ?’ Hpaˍrawˇ yaˇ miˇ heuˆ gaˇ˗aˬ tehꞈ kʼoˆ piˇ leh Meˇriˆanˍ yawˇ ve awˬ e Yawˇhkeˍbehˆ htaꞈ shiˍ veu laˇ ve yoˬ. Hpaˍrawˇ yaˇ miˇ Yawˇhkeˍbehˆ htaꞈ kʼoˆ piˇ ve, ‘yaˇ ehˉ chi htaꞈ a ciˉ hu laˇ˗oˆ. Ngaˬ awˬ hpfuhˇ peꞈ laˇ tuˬ yoˬ.’

Yaˇ ehˉ uiˍ la ve teˇ yanˇ, Yawˇhkeˍbehˆ Hpaˍrawˇ yaˇ miˇ geh shiˍ veu laˇ piˇ ve yoˬ. Hpaˍrawˇ yaˇ miˇ yaˇ ehˉ chi htaꞈ yawˇ yaˇ tehꞈ shawˍ leh Moˉseˍ meh piˇ ve yoˬ. Yawˇ lehˬ Hpaˍrawˇ yaˇ miˇ ve yaˇ paˍ hpehꞈ leh yawˇ heuˆ gaˇ ve teˇ ceuˬ le le cawˬ gʼa ve yoˬ. Yaꞈ hkʼaˇ, Moˉseˍ Yaˬhoˉvaˬ htaꞈ maˇ leunˇ. Yawˇ Eˇjiˇtuꞈ chaw maˇ heˆ. Awˬ tehˬ awˬ na Iˉsaˍreˍlaˆ chaw hpehꞈ ve tehꞈ shiˍ leh Yaˬhoˉvaˬ ve kanˉ te tuˬ leuˆ yuˬ ve yoˬ.

Moˉseˍ a shaꞈ 40 hkʼawꞈ htaˇ, yawˇ ve chaw ceuˬ htaꞈ ga piˇ ve yoˬ. Eˇjiˇtuꞈ chaw teˇ gʼaˇ Iˉsaˍreˍlaˆ chaw htaꞈ dawˆ chehˇ ve htaꞈ mawˬ leh yawˇ Eˇjiˇtuꞈ chaw oˇ ve teˇ gʼaˇ htaꞈ tiˇ pehˍ leh shehˇ shiˍ hkʼaw gaˆ fiˆ ve yoˬ. Hpaˍrawˇ shiˍ ve teˇ yanˇ, Moˉseˍ htaꞈ tiˇ pehˍ tuˬ gʼaꞈ ca ve yoˬ. Yaꞈ hkʼaˇ, Moˉseˍ Meˉdiˍanˍ mvuhˇ miˬ lo hpaw˗e leh Yaˬhoˉvaˬ yawˇ htaꞈ nyi haꞈ shaˉ piˇ ve yoˬ.