Hawˉ hkʼaˆ teˇ gʼaˇ Yaˬhoˉvaˬ htaꞈ oˉ kʼoˍ pui ve Uˇzaˆ mvuhˇ miˬ hkʼaw chehˇ ve yoˬ. Yawˇ lehˬ Yawˇbaˆ meh ve yoˬ. Yawˇ yehˬ kʼa lonˉ hpehꞈ leh paw sha jaˇ. Yawˇbaˆ nyi ma daꞈ leh haˍ gʼawˇ yaˇ, mehˇ chawˇ ma, yaˇ cuˬ shi htaꞈ ga piˇ puiˉ ve yoˬ. Yawˇbaˆ nyi ma daꞈ ve chaw hpehꞈ ve yoˬ. Yawˇ daꞈ ve tiˉ gʼa hpuˇ tuˬ ve laˇ?

Neˇ haiˬ Saˍtanˍ Yawˇbaˆ htaꞈ gʼaꞈ nyi chehˇ ve yawˇ maˇ shiˍ. Yaˬhoˉvaˬ Saˍtanˍ htaꞈ kʼoˆ piˇ ve, ‘ngaˬ ve awˬ ceˬ paˍ Yawˇbaˆ htaꞈ mawˬ chehˇ˗aw laˇ? Miˬ guiˬ hkʼoˆ lo yawˇ hkʼe leˇ ve chaw teˇ gʼaˇ kaꞈ maˇ cawˬ. Yawˇ ngaˬ hkawˇ na yuˬ leh cawˇ ve htaꞈ tiˉ te ve yoˬ.’ Saˍtanˍ kʼoˆ ve, ‘nawˬ haꞈ shaˉ piˇ leh awˬ bon naꞈ piˇ ve pa taw, yawˇ nawˬ ve hkawˇ na yuˬ ve yoˬ. Miˬ guiˬ muiˬ caˇ kuiˬ leh ceˇ caˬ teˇ hpaˍ nawˬ piˇ chehˇ ve yoˬ. Yaꞈ hkʼaˇ, nawˬ yawˇ hkʼa cawˬ ve mawˇ hkʼa peu˗eˬ yuˬ baˬ piˇ ve kʼo, yawˇ nawˬ htaꞈ oˉ kʼoˍ pui tuˬ ve maˇ heˆ.’ Yaˬhoˉvaˬ kʼoˆ ve, ‘nawˬ lawˇ nyi hpehꞈ ve yoˬ. Yaꞈ hkʼaˇ, yawˇ htaꞈ taˇ tiˇ pehˍ.’ Yawˇbaˆ htaꞈ lawˇ nyi tuˬ aˬ htoꞈ ma te Yaˬhoˉvaˬ Saˍtanˍ htaꞈ a hkaw˗anˬ piˇ ve le? Awˬ lawn kʼo, Gʼuiˬ sha Yawˇbaˆ htaꞈ yonˍ gʼa ve yoˬ.

Saˍtanˍ Yawˇbaˆ dawˇ haˍ tuˬ laiˉ ceuˬ lawˇ nyi piˇ ve yoˬ. Awˉ lawˉ teˇ ceuˬ Yawˇbaˆ ve nuˇ leh piˉ laˬ Sheˍbaˆ chaw hkʼawˇ kʼai leh mvuhˇ naw ma hkʼoˆ aˬ miˍ ce yaꞈ la leh yawˬ htaꞈ toꞈ baˬ ve yoˬ. Hkaˍlaˍdehˇ chaw kaˍlaˍoˆ hkʼa peu˗eˬ htaꞈ hkʼawˇ kʼai leh ceˇ ca hawˉ chehˇ ve awˬ ceˬ paˍ hui htaꞈ kaꞈ tiˇ pehˍ piˇ ve yoˬ. Nyi ma luˬ jaˇ ve teˇ ceuˬ lehˬ Yawˇbaˆ ve yaˇ hti caˇ hti dawˬ chehˇ htaˇ, yehˬ paˆ teˍ leh suh peuˬ ve yoˬ. Yawˇbaˆ nyi ma luˬ jaˇ ve htawˇ, Yaˬhoˉvaˬ htaꞈ oˉ kʼoˍ pui chehˇ sheˍ.

Yawˇbaˆ chi aꞈ kehˉ dawˇ haˍ tuˬ Saˍtanˍ kʼawꞈ te piˇ ve yoˬ. Yawˇbaˆ ve awˬ to htaꞈ shaˉ chuˇ hkʼa biˇ tawˆ la piˇ ve yoˬ. Yawˇbaˆ gʼa tuꞈ hkanˍ jaˇ.  Yawˇbaˆ chi hkʼe gʼa hpuˇ ve yawˇ a ciˉ kaꞈ maˇ shiˍ. Yaꞈ hkʼaˇ, Yawˇbaˆ hkʼaˬ htaˆ kaꞈ Yaˬhoˉvaˬ htaꞈ oˉ kʼoˍ pui chehˇ ve yoˬ. Yawˇbaˆ hkʼa hpehꞈ la ve hkʼa peu˗eˬ Gʼuiˬ sha mawˬ leh nyi hkʼaˇ suh jaˇ ve yoˬ.

Oˇ ve hkʼawꞈ nawˉ, Saˍtanˍ Yawˇbaˆ htaꞈ lawˇ nyi tuˬ, hawˉ hkʼaˆ 3 gʼaˇ htaꞈ kʼai tcuh ve yoˬ. Yawˇ hui 3 gʼaˇ Yawˇbaˆ htaꞈ kʼoˆ piˇ ve, ‘nawˬ venˇ baˆ hkʼawˇ te leh Gʼuiˬ sha nawˬ htaꞈ ciˍ yanˍ laˇ ve yoˬ˗ehꞈ.’ Yawˇbaˆ kʼoˆ ve, ‘ngaˬ teꞈ chiˉ maˇ te yaꞈ.’ Yaꞈ hkʼaˇ, hpehꞈ la ve hkʼa peu˗eˬ Yaˬhoˉvaˬ maˇ hteˇ maˇ cawˇ ve te laˇ ve tehꞈ Yawˇbaˆ kʼoˆ ve yoˬ.

Yawˇ hui tawˇ yaw daꞈ chehˇ ve htaꞈ hawˉ hkʼaˆ yaˇ nehˬ Eˇliˇhuˆ taꞈ iˉ gawˬ lehˍ mui na taˍ leh yawˇ kʼoˆ ve, ‘nawˬ hui kʼoˆ ve maˇ cawˇ, Yaˬhoˉvaˬ lehˬ uiˍ jaˇ mvuh jaˇ, yawˇ haiˬ ve htaꞈ maˇ te. Gʼuiˬ sha teˇ ceuˬ le le mawˬ leh dawˇ haˍ chehˇ ve chaw htaꞈ ga piˇ ve yoˬ.’

Oˇ ve hkʼawꞈ nawˉ, Yaˬhoˉvaˬ Yawˇbaˆ htaꞈ na piˇ ve, ‘ngaˬ miˬ guiˬ mvuhˇ naw te hpanˍ htaˇ, nawˬ hkʼaˬ kaˬ lo chehˇ taˍ ve le? Aˬ htoꞈ ma te ngaˬ maˇ hteˇ tehꞈ nawˬ kʼoˆ ve le? Nawˬ teꞈ chiˉ maˇ shiˍ ve kaꞈ kʼoˆ ve law.’ Yawˇbaˆ yawˇ haꞈ yuˬ leh kʼoˆ ve, ‘ngaˬ yaꞈ ve yoˬ. Ngaˬ nawˬ ve awˬ lawn gʼa kaˇ jaw˗aw. Yaꞈ hkʼaˇ, chi teˇ hkui ngaˬ nawˬ htaꞈ awˬ tehˬ awˬ na gʼa shiˍ peuˬ. Nawˬ teˇ ceuˬ le le te gʼa ve ngaˬ yonˍ ve yoˬ. Ngaˬ oˇ hkʼe gʼa kʼoˆ peuˬ ve lawˬ hkawˉ ve yoˬ.’

Lawˇ nyi piˇ peuˬ hkʼawꞈ nawˉ, Yaˬhoˉvaˬ Yawˇbaˆ htaꞈ kʼawꞈ chehˇ sha la piˇ leh oˇ htaˇ aꞈ kehˉ yawˇ paw sha jaˇ ve yoˬ. Yawˇbaˆ co zuhˬ ha zuhˬ cawˬ leh ha lehˬ ve hkʼa biˇ cawˬ ve yoˬ. Yawˇbaˆ dawˇ haˍ ve awˬ ceuˬ gʼa hpuˇ ve htawˇ, yawˇ Yaˬhoˉvaˬ hkawˇ na yuˬ ve pa taw, Gʼuiˬ sha yawˇ htaꞈ awˬ bon naꞈ piˇ ve yoˬ. Nawˬ dawˇ haˍ gaˇ haˍ ve htaꞈ gʼa hpuˇ htaˇ, Yawˇbaˆ hkʼa shuˍ, Yaˬhoˉvaˬ hkawˇ na yuˬ leh yawˇ htaꞈ oˉ kʼoˍ pui tuˬ laˇ?