Yoˇsehꞈ lehˬ Yaˍkoˆ ve yaˇ paˍ hpehꞈ leh awˬ pa yawˇ htaꞈ haꞈ jaˇ. Awˬ lawn kʼo, Yaˍkoˆ mawˇ la htaˇ, Yoˇsehꞈ cawˬ la ve yoˬ. Nawˬ dawˇ kʼo, Yoˇsehꞈ ve awˬ viˉ paˍ hui hkʼaˬ hkʼe dawˇ ve le? Yawˇ hui Yoˇsehꞈ htaꞈ nyi bawˬ leh hkawehˉ jaˇ ve yoˬ. Yoˇsehꞈ yawˇ maˇ mawˬ jaw ve zuhꞈ maˆ mawˬ ve teˇ yanˇ, awˬ viˉ paˍ hui htaꞈ kʼoˆ maˍ piˇ hkʼeh jaˇ ve yoˬ. Zuhꞈ maˆ oˇ ve tcuhˉ kuiˬ lehˬ, awˬ viˉ paˍ hui Yoˇsehꞈ htaꞈ oˉ kʼoˍ gʼa pui ve tehꞈ, shiˍ leh yawˇ hui Yoˇsehꞈ htaꞈ leuˉ leh kʼawꞈ nyi bawˬ jaˇ ve yoˬ.

Teˇ nyi htaˇ, Yoˇsehꞈ awˬ viˉ paˍ hui Sheˍhkenˍ venˇ paˇ lo yawˬ hawˉ chehˇ ve yoˬ. Awˬ viˉ paˍ hui hkʼaˬ hkʼe hpehꞈ chehˇ ve htaꞈ shiˍ gaˇ leh Yaˍkoˆ Yoˇsehꞈ htaꞈ ca nyi tcuh ve yoˬ. Yoˇsehꞈ vuiˇ kuiˬ lo laˬ chehˇ ve htaꞈ awˬ viˉ paˍ hui gʼa mawˬ htaˇ, ‘nyi loˬ. Zuhꞈ maˆ mawˬ shehˍ hpaˇ laˬ chehˇ ve yoˬ. Yawˇ htaꞈ tiˇ pehˍ loˬ’ tehꞈ kʼoˆ daꞈ ve yoˬ. Yawˇ hui Yoˇsehꞈ htaꞈ naˉ jaˇ ve nanˬ bawˍ hkʼaw yuˬ keu piˇ ve yoˬ. Yaꞈ hkʼaˇ, awˬ viˉ paˍ Yuˇdaꞈ kʼoˆ ve, ‘yawˇ htaꞈ taˇ tiˇ pehˍ. Shu ve awˬ ceˬ hpehꞈ tuˬ hawˇ piˇ˗a veuˬ.’ Hkʼe te leh Eˇjiˇtuꞈ mvuhˇ miˬ lo kʼai chehˇ ve Meˇdiˍanˍ chaw tanˇ kaˬ paˍ hui htaꞈ yawˇ hui hpu 20 htehꞈ hawˇ piˇ ve yoˬ.

Oˇ ve hkʼawꞈ nawˉ, awˬ viˉ paˍ hui Yoˇsehꞈ ve aˉ poꞈ zuhˬ ma htaꞈ yuˬ leh aˉ cheꞈ ve awˬ suhˍ hkʼaw tuˍ keu peuꞈ hkʼawꞈ nawˉ, aˉ poꞈ oˇ ve awˬ pa htaꞈ yuˬ maˍ piˇ tuˬ teˇ gʼaˇ htaꞈ kʼai tcuh leh na nyi tcuh ve, “chi ve nawˬ yaˇ paˍ ve aˉ poꞈ maˇ heˆ laˇ?” To nuˇ to shaˆ Yoˇsehꞈ htaꞈ cheꞈ caˇ peuˬ tehꞈ Yaˍkoˆ dawˇ leh nyi ma luˬ jaˇ. Chaw teˇ gʼaˇ kaꞈ yawˇ nyi ma sha la tuˬ te piˇ maˇ gʼa.

Yoˇsehꞈ Eˇjiˇtuꞈ chaw hawˉ yehˬ shaw shehˍ hpaˇ maꞈ poˍ lonˉ Pawˇtiˇhpaˍ meh ve htaꞈ hawˇ piˇ ve yoˬ. Yaꞈ hkʼaˇ, Yaˬhoˉvaˬ Yoˇsehꞈ geh chehˇ ve yoˬ. Yoˇsehꞈ kanˉ te puiˉ leh yonˍ gʼa ve chaw hpehꞈ ve Pawˇtiˆhpaˍ gʼa mawˬ ve yoˬ. Maˇ maw maw gaˬ leh Pawˇtiˆhpaˍ Yoˇsehꞈ htaꞈ yawˇ ve mawˇ jeˬ hkʼa peu˗eˬ nyi haꞈ shaˉ tcuh ve yoˬ.

 Pawˇtiˆhpaˍ awˬ miˇ ma lehˬ Yoˇsehꞈ awˬ hkiˇ awˬ naˬ daꞈ ve htaꞈ gʼa mawˬ ve yoˬ. Yawˇ geh zuhꞈ la˗o tehꞈ teˇ nyi le le kʼoˆ piˇ ve yoˬ. Yoˇsehꞈ hkʼaˬ hkʼe te tuˬ le? Yawˇ kʼoˆ ve, ‘maˇ hpehꞈ! Chi hkʼe te ve maˇ daꞈ. Ngaˬ ve awˬ shehˍ hpaˇ ngaˬ htaꞈ yonˍ gʼa leh nawˬ kaꞈ yawˇ ve awˬ miˇ ma hpehꞈ ve yoˬ. Ngaˬ nawˬ geh zuhꞈ ve kʼo, Gʼuiˬ sha htaꞈ te yaꞈ ve yoˬ!’

Teˇ nyi gaˬ leh Pawˇtiˆhpaˍ awˬ miˇ ma Yoˇsehꞈ yawˇ geh zuhꞈ la tuˬ kʼoˆ piˇ ve yoˬ. Yoˇsehꞈ hpaw tawˆ˗e leh yawˇ Yoˇsehꞈ ve aˉ poꞈ htaꞈ tcuhˆ yuˬ taˉ ve yoˬ. Pawˇtiˆhpaˍ kʼawꞈ la htaˇ, Yoˇsehꞈ behˇ laˇ ve tehꞈ awˬ miˇ ma awˬ hpawˇ htaꞈ heˍ hto piˇ ve yoˬ. Pawˇtiˆhpaˍ nyi ma zuhˆ jaˇ leh Yoˇsehꞈ htaꞈ htawnˍ hkʼaw yuˬ keu piˇ ve yoˬ. Yaꞈ hkʼaˇ, Yaˬhoˉvaˬ Yoˇsehꞈ htaꞈ maˇ leunˇ.