Moˉseˍ Hpaˍrawˇ htaꞈ maˇ kʼawꞈ mawˬ daꞈ tuˬ ka tiꞈ te ve yoˬ. Yaꞈ hkʼaˇ, maˇ kʼai sheˍ htaˇ yawˇ Hpaˍrawˇ htaꞈ kʼoˆ piˇ ve, ‘shehˍ kʼaw hkui htaˇ gaˬ kʼo, Hpaˍrawˇ ve yaˇ paˍ htaꞈ te leh awˬ ceˬ ve yaˇ htaˇ hkʼa gaˬ Eˇjiˇtuꞈ chaw yaˇ paˍ uiˍ teˇ gʼaˇ le le gʼa suh tuˬ yoˬ.’

Yaˬhoˉvaˬ Iˉsaˍreˍlaˆ chaw htaꞈ caˇ jaw ve aꞈ kehˉ caˇ tuˬ daꞈ daꞈ caˇ tcuh leh kʼoˆ piˇ ve, ‘a shaꞈ teˇ hkʼawꞈ gaˬ ve yawˬ awˬ paˍ maˇ kʼoˆ, aˉ cheꞈ awˬ paˍ htaꞈ tiˇ pehˍ leh awˬ suhˍ yehˬ miˉ hpeꞈ hkʼoˆ shehˆ taˍ˗oꞈ. Awˬ shaˍ htaꞈ piˍ leh diˇ maˇ keu ve hkaoˍ monˇ geh teˇ geh gʼa caˇ ve yoˬ. Nawˬ hui veuꞈ kʼaˇ veuꞈ leh hkuiˉ nuˆ tcuhˉ leh gu hehnˇ taˍ˗oꞈ. Yaꞈ puiˉ haˉ ngaˬ nawˬ hui htaꞈ ga ponˬ laˇ tuˬ yoˬ.’ Iˉsaˍreˍlaˆ chaw hkʼaˬ hkʼe taw ha lehˬ jaˇ ve nawˬ dawˇ mawˬ gʼa˗aw laˇ?

Shehˍ kʼaw hkui gaˬ leh Yaˬhoˉvaˬ ve mvuhˇ naw ma tcuh yaˇ Eˇjiˇtuꞈ chaw ve yehˬ teˇ yehˬ le le kʼai leh yehˬ miˉ hpeꞈ hkʼoˆ awˬ suhˍ maˇ shehˆ ve hkʼaˬ ve teˇ yehˬ maˇ kʼoˆ, yaˇ paˍ uiˍ gʼa suh ve yoˬ. Yaꞈ hkʼaˇ, yehˬ miˉ hpeꞈ hkʼoˆ awˬ suhˍ shehˆ taˍ ve yehˬ kʼo, mvuhˇ naw ma tcuh yaˇ nyi taˉ leh hpanˍ kʼai ve yoˬ. Eˇjiˇtuꞈ chaw paw sha ve leh haˍ gʼawˇ ve yaˇ paˍ uiˍ hkʼa peu˗eˬ suh ve yoˬ. Yaꞈ hkʼaˇ, Iˉsaˍreˍlaˆ chaw ve yaˇ teˇ gʼaˇ kaꞈ maˇ suh.

Hpaˍrawˇ ve yaˇ paˍ kaꞈ suh ve yoˬ. Hpaˍrawˇ yeunˇ hkanˍ maˇ gʼaˇ˗o. Yawˇ Moˉseˍ htaꞈ kʼoˆ piˇ ve, ‘ngaˬ hui geh tawˆ kʼai loˬ! Gʼuiˬ sha htaꞈ oˉ kʼoˍ ca pui˗o. Nawˬ hui ve ceˇ caˬ teˇ hpaˍ htaꞈ htawˇ yuˬ kʼai˗o!’

 Ha pa hkui teˇ haˉ htaˇ, a shu yawˇ ve awˬ ceuˬ awˬ hkʼaˇ leh a shu yawˇ ve yehˬ yaˇ kʼa yaˇ htaꞈ pehˬ leh Eˇjiˇtuꞈ mvuhˇ miˬ hkʼaw tawˆ kʼai ve yoˬ. Hawˉ hkʼaˆ 600,000 gʼaˇ cawˬ leh yaˇ miˇ yaˇ ehˉ cawˬ maˇ ve yoˬ. Yaˬhoˉvaˬ htaꞈ oˉ kʼoˍ ca pui tuˬ Iˉsaˍreˍlaˆ chaw hui geh awˬ kaˍ awˬ nu chaw kaꞈ gʼaꞈ kʼai ve yoˬ. Awˬ leh meuˇ htaˇ Iˉsaˍreˍlaˆ chaw gʼa ponˬ ve yoˬ!

Iˉsaˍreˍlaˆ chaw htaꞈ Yaˬhoˉvaˬ ga piˇ jaw ve htaꞈ yawˇ hui maˇ leunˇ tuˬ, teˇ hkʼawꞈ le le daꞈ ve caˇ tuˬ caˇ ve yoˬ. Caˇ tuˬ chi ve htaꞈ Paˍsaˍhkaˍ pawehˇ tehꞈ kʼoˆ ve yoˬ.