Iˉsaˍreˍlaˆ chaw htaꞈ kanˉ gʼaˇ hteꞈ nyiˉ te tcuh ve yoˬ. Yaˬhoˉvaˬ Moˉseˍ leh Aˍronˍ Hpaˍrawˇ htaꞈ ca kʼoˆ piˇ tcuh ve, ‘ngaˬ ve chaw teˇ hpaˍ, heh puiˉ hkʼaw lo ngaˬ htaꞈ oˉ kʼoˍ ca pui tuˬ yawˇ hui htaꞈ haˆ te hpehˇ piˇ˗oˆ.’ Yaꞈ hkʼaˇ, Hpaˍrawˇ nyi ma uiˍ leh kʼoˆ ve, ‘Yaˬhoˉvaˬ hkʼaˬ hkʼe kʼoˆ ve ngaˬ maˇ shiˍ. Iˉsaˍreˍlaˆ chaw hui htaꞈ ngaˬ maˇ hpehˇ piˇ.’ Hkʼe te leh, Hpaˍrawˇ yawˇ hui htaꞈ kanˉ gʼaˇ hteꞈ kʼawꞈ nyiˉ te tcuh ve yoˬ. Yaˬhoˉvaˬ Hpaˍrawˇ htaꞈ maˍ piˇ tuˬ dawˇ cheˆ ve yoˬ. Yaˬhoˉvaˬ aˬ htoꞈ ma te ve le shiˍ˗aˬ laˇ? Yawˇ Eˇjiˇtuꞈ mvuhˇ miˬ hkʼaw kawˆ tuˬ uiˍ ve 10 ceuˬ cawˬ la piˇ ve yoˬ. Yaˬhoˉvaˬ Moˍseˉ htaꞈ kʼoˆ piˇ ve, ‘Hpaˍrawˇ ngaˬ hkawˇ maˇ na. Mvuhˇ shawˉ teˇ naꞈ yawˇ Niˍlaˆ iˉ kaˆ lawˬ lo kʼai ve yoˬ. Nawˬ yawˇ geh kʼai˗o. Ngaˬ ve chaw htaꞈ maˇ hpehˇ piˇ ve kʼo, iˉ kaˆ chi ve suhˍ hpehꞈ la tuˬ yoˬ.’ Moˉseˍ na yuˬ leh Hpaˍrawˇ geh kʼai ve yoˬ. Aˍronˍ juˇ fuiˍ htaꞈ yuˬ leh Niˍlaˆ iˉ kaˆ lawˬ htaꞈ dawˆ leh iˉ kaˆ suhˍ hpehꞈ la ve htaꞈ Hpaˍrawˇ nyi chehˇ ve yoˬ. Ngaˇ kaꞈ suh ve, Niˍlaˆ iˉ kaˆ lawˬ kaꞈ kuiˇ nuˬ ve dawˬ maˇ hpehꞈ. Yaꞈ hkʼaˇ, Hpaˍrawˇ Iˉsaˍreˍlaˆ chaw htaꞈ maˇ hpehˇ piˇ sheˍ.

7 nyi gaˬ leh Yaˬhoˉvaˬ Moˉseˍ Hpaˍrawˇ htaꞈ ca kʼawꞈ kʼoˆ piˇ tcuh ve, ‘ngaˬ ve chaw htaꞈ maˇ hpehˇ piˇ ve kʼo, Eˇjiˇtuꞈ mvuhˇ miˬ hkʼaw paˍ tehˉ nehˆ hkʼa biˇ  cawˬ la tuˬ yoˬ.’ Aˍronˍ juˇ fuiˍ taˬ htaꞈ chiˇ taˆ ve teˇ yanˇ, paˍ tehˉ nehˆ hkʼa biˇ cawˬ la leh Eˇjiˇtuꞈ chaw ve aˉ hkʼaw, hkehˇ hkʼaw, zuhꞈ kuiˬ hkʼaw lo kaꞈ hkʼa biˇ chehˇ ve yoˬ. Eˇjiˇtuꞈ mvuhˇ miˬ teˇ kaˬ le le lo paˍ tehˉ nehˆ hkʼa biˇ cawˬ ve yoˬ! Paˍ tehˉ nehˆ chi htaꞈ yuˬ tawˆ laˇ tuˬ, Yaˬhoˉvaˬ geh bon lawˬ laˇ˗oˆ tehꞈ Hpaˍrawˇ Moˉseˍ htaꞈ kʼoˆ piˇ ve yoˬ. Oˇ ve hkʼawꞈ nawˉ, Iˉsaˍreˍlaˆ chaw htaꞈ hpehˇ piˇ tuˬ yoˬ tehꞈ ngaˬ ka tiꞈ te piˇ ve yoˬ. Yaˬhoˉvaˬ kawˆ tuˬ uiˍ ve chi htaꞈ mehˉ kʼai piˇ ve yoˬ. Eˇjiˇtuꞈ chaw paˍ tehˉ nehˆ suh taˍ ve htaꞈ awˬ hpoˆ awˬ hpoˆ te gʼawˆ teh leh mvuhˇ miˬ hkʼa peu˗eˬ hkʼaw kuiˇ nuˬ jaˇ ve yoˬ. Yaꞈ hkʼaˇ, Hpaˍrawˇ Iˉsaˍreˍlaˆ chaw htaꞈ maˇ kʼawꞈ hpehˇ piˇ sheˍ.

Yaˬhoˉvaˬ Moˉseˍ htaꞈ kʼoˆ piˇ ve, ‘juˇ fuiˍ taˬ miˬ guiˬ htaꞈ dawˆ keu˗o tehꞈ Aˍronˍ htaꞈ kʼoˆ piˇ˗oˆ. Oˇ ve hkʼawꞈ nawˉ, jeꞈ meu˗e puiˉ suhˆ naˆ hpehꞈ la tuˬ yoˬ.’ Teˇ cawˬ haˉ, puiˉ suhˆ naˆ hkʼa biˇ cawˬ leh chaw yaˇ leh to nuˇ to shaˆ htaꞈ cheꞈ ve yoˬ. Hpaˍrawˇ ve chaw yawˇ htaꞈ kʼoˆ piˇ ve, ‘chi ve lehˬ Gʼuiˬ sha te ve kanˉ hpehꞈ ve yoˬ.’ Yaꞈ hkʼaˇ, Hpaˍrawˇ Iˉsaˍreˍlaˆ chaw htaꞈ maˇ hpehˇ piˇ sheˍ.